محض اللہ تعالیٰ کے فضل سے مورخہ 13مارچ 2022ء کو جماعت احمدیہ ایڈیلیڈ ویسٹ کے چھ احباب پر مشتمل ایک گروپ کو موآنہ (Moana) مارکیٹ میں قرآن کریم کی نمائش اور بکسٹال لگانے کی توفیق ملی۔ الحمدللہ۔ موآنہ، ایڈیلیڈ شہر سے تقریباً 36 کلومیٹر جنوب میں واقع ہے اور ساؤتھ آسٹریلیا سٹیٹ کا ایک مشہور سیاحتی مقام ہے۔موآنہ مارکیٹ کا انعقاد مہینے میں ایک بار موآنہ beach کے قریب واقع پایونئیر میموریل ہال اور اس سے ملحقہ گراؤنڈ ز میں کیا جاتا ہے۔
ہم نماز فجر کی ادائیگی کے بعد مسجد محمود سے موآنہ کے لئے روانہ ہوئے اور تقریباً پچاس منٹ کی مسافت کے بعد وہاں پہنچے۔ وہاں پہنچ کرہم نے مارکیٹ کے مین ایریا میں قرآن کریم کی نمائش اور بک سٹال لگایا۔ جماعتی پیغام
Love for All Hatred for None,
Muslims for Peace
اور
Muslim for Loyalty
سے مزین مارکی نے خاص طور پر لوگوں کی توجہ کو اپنی جانب مرکوز کیا۔ یہ بات بھی قابل ذکر ہے کہ کسی بھی مسلم کمیونٹی کی جانب سے اس مارکیٹ میں پہلی بار سٹال لگایا اور الحمدللہ یہ سعادت جماعت احمدیہ کے حصہ میں آئی۔ تبلیغی مساعی کا آغاز دعا کے ساتھ دوسرے سٹال پر موجود لوگوں کو جماعت احمدیہ کا تعارف کروانے کے ساتھ شروع ہوا۔
صبح نوبجے مارکیٹ کو عوام کے کے لئے کھولا گیا۔ الحمدللہ مقامی آبادی کی جانب سے بہت اچھا response ملا اور سینکڑوں کی تعداد میں لوگ قرآن کریم کی نمائش اور بکسٹال کو دیکھنےکے لئے تشریف لائے۔ ہم نے ان کو اسلام کی پرامن تعلیم سے آگاہ کیا۔ علاوہ ازیں کافی لوگوں کے ساتھ مندرجہ ذیل موضوعات پر تفصیلی بحث ہوئی۔
- اسلام میں عورتوں کے حقوق
- روس اوریوکرین کے مابین جنگ
- شریعہ لاء
- آسٹریلیا میں ملٹی کلچرازم
- آنحضور ﷺ کی حیات مبارکہ
الحمدللّٰہ اس سٹال کے دوران ہمیں متعدد نئے تبلیغی راوبط بنانے کی توفیق ملی۔ کل دس جماعتی کتب اور کثیر تعداد میں جماعتی لٹریچر بھی پڑھنے کے لئے تقسیم کیا گیا۔
نمائش کو دیکھنے کے لئے آنے والے لوگوں کے چند تاثرات درج ذیل ہیں:
مسٹر Richard Shaw نے ہمارے سٹال کو وزٹ کیا اور بتایا کہ انہوں نے آنحضور ﷺ کی سیرت وسوانح پر ایک کتا ب پڑھی ہوئی ہے۔ انہوں نے آنحضور ﷺ کے بارے میں اپنے تاثرات کا اظہار کرتے ہوئے کہا: ’’آپ ﷺ کرہ ارض پر سب سے عظیم شخص تھے۔ آپ ﷺ میری فہرست میں سرِفہرست ہیں‘‘۔ ہم نے ان کو آنحضور ﷺ کی حیات مبارکہ کے متعلق میں مزید پڑھنے کے لئے
Life of Muhammad (saw)
کتاب دی۔
ایک مقامی عورت نے کہا:
’’یہ سٹال بہت اچھا ہے۔ یہ بہت معلوماتی ہے۔ یہاں کھڑے ہو کر اچھا محسوس ہو رہا ہے۔ یہاں صرف کھڑے ہونے سے ہی مثبت vibes آرہی ہیں‘‘۔
دعا ہے کہ اللہ تعالیٰ ہماری تبلیغی مساعی میں برکت ڈالے اور ہمیں احسن رنگ میں اسلام احمدیت کا پیغام پہنچانے کی توفیق عطا فرمائے۔ آمین
(رپورٹ: عاطف احمد زاہد۔ مبلغ سلسلہ آسٹریلیا)
