مرے کام سارے ہیں عصیاں کی صورت
تری رحمتیں ابرِ باراں کی صورت
کڑی دھوپ میں جو چلایا ہے تُو نے
وہ جھونکا ہوا کا زمستاں کی صورت
جو گزری سو گزری مگر خوب گزری
مری زندگی عشق پیچاں کی صورت
مہکتا وجود اس کا خوشبو ہی خوشبو
تصور میں ہے نکہتِ جاں کی صورت
وہ اک شخص یوں تو بہت دور مجھ سے
مگر درد دل کا ہے درماں کی صورت
مکاں ایستادہ مکینوں سے خالی
کواڑ ان کے خاموش زنداں کی صورت
پڑاؤ جہاں بھی کیا، چھوڑ آئے
دھواں، راکھ، دل آہِ سوزاں کی صورت
نہ دیکھے گئے، اَب بھی ان منظروں پر
گڑی ہے نظر چشمِ حیراں کی صورت
قدم دو قدم ہی چلے تھے کہ صحرا
بنے نوکِ خارِ مغیلاں کی صورت
بہت خوب صورت خیالِ رُخِ جاں
مگر ایک خوابِ پریشاں کی صورت
کوئی آخرِ شب دعا دے گیا
چڑھے دن مبارک بہاراں کی صورت
(ڈاکٹرعبدالکریم خالد)
