میری ہیں لغزشیں اتنی کروں کیسے بیاں آقاؐ
بتانے سے لرزتی ہے میری نادم زباں آقاؐ
تیرے دیدار کی حسرت لئے پھرتا ہوں سینے میں
تیری نصرت کا طالب ہوں تُو سُن اے مہرباں آقاؐ
میں تیری خاکِ پا ہوتا تو کتنا شادماں ہوتا
مگر میں جانتا ہوں تُو کہاں اور میں کہاں آقاؐ
ہر اک ترسی نگاہ جَمتی ہے پیارے تیرے چہرے پر
امیدیں تجھ سے باندھے ہے جہاں کا کارواں آقاؐ
یہ الفت ہے تیری آقاؐ رُلاتی ہے مجھے ہر دم
تیرے عُشاقِ صادق کا بھی تُو ہے قدرداں آقاؐ
تیری ہی روشنی سے جگمگا اُٹھا جہاں سارا
جماعت انبیاء بھی ہے تری ہی کہکشاں آقاؐ
نرالی شان ہے تیری نرالے تیرے جلوے ہیں
حبیبِ کبریا تُو ہے تُو ہے شاہِ جہاں آقاؐ
زماں سارے ہی ہیں محتاج یاں تیری شفاعت کے
منیر بے نوا کو بھی عطا کر تُو اَماں آقاؐ
(منیر باجوہؔ)
