میرا اپنا نہیں کوئی تیرے سوا تم سے نہ کہوں تو کس سے کہوں
تم سے تو نہیں مرا حال چھپا تم سے نہ کہوں تو کس سے کہوں
ترا نام غفور ہے پیارے خدا بخشش میں تجھے آتا ہے مزا
رکھ لینا غریب کا پاسِ حیا تم سے نہ کہوں تو کس سے کہوں
دلدل ہے گناہوں کی گہری ٹکتے نہیں میرے پاؤں کہیں
تو زور سے تھام لے ہاتھ مرا تم سے نہ کہوں تو کس سے کہوں
مالک مجھ سے وہ کام کرا جس سے ہو حاصل تیری رضا
لینا نا حساب کتاب مرا تم سے نہ کہوں تو کس سے کہوں
میں اپنے کئے پر نادم ہوں کر رحم مری حالت پہ سدا
مجھ سے نہ کبھی بھی ہونا خفا تم سے نہ کہوں تو کس سے کہوں
دشمن کو حسد نے اندھا کیا، کرتے ہیں جفا بےخوفِ خدا
دل کرچی کرچی ٹوٹ گیا تم سے نہ کہوں تو کس سے کہوں
ظلمت کی اندھی راہوں میں نفرت کی ظالم بانہوں میں
اب ہوگیا بالکل حال بُرا تم سے نہ کہوں تو کس سے کہوں
جو گھاؤ دئے ہیں اپنوں نے گہرے ہیں ہردم رِستے ہیں
میں نے چپکے چپکے درد سہا تم سے نہ کہوں تو کس سے کہوں
(امۃ الباری ناصر۔امریکہ)
