ہر تصوّر سے ماورا ہیں آپؐ
خاص تخلیقِ کبریا ہیں آپؐ
آپؐ احمد بھی ہیں محمد بھی
مصطفیٰ آپؐ، مجتبیٰ ہیں آپؐ
آپؐ مظہر ہیں حسنِ کامل کے
ذاتِ باری کا آئینہ ہیں آپؐ
قابَ قوسین پر ہیں متمکن
بشریت کی انتہا ہیں آپؐ
دین و دنیا کی رہبری کے لیے
بخدا نائبِ خدا ہیں آپؐ
ماضی و حال ہوں کہ مستقبل
ہر زمانے کا معجزہ ہیں آپؐ
آپ سرخیل ہیں رسولوں کے
نازشِ جملہ انبیاء ہیں آپؐ
آپؐ خیر البشر ہیں، خیر الخَلق
ابتدا آپؐ، انتہا ہیں آپؐ
آپؐ ہی ہیں دعائے ابراہیمؑ
اور کعبے کی التجا ہیں آپؐ
میم جب گر گیا تو راز کھلا
اپنے محبوب میں فنا ہیں آپؐ
آپؐ ہی ہیں طبیبِ روحانی
ہر مرض کی فقط دوا ہیں آپؐ
(آصف محمود ڈار)
