ہم بات کریں اُس بستی کی جس میں انوار برستے تھے
وہ ایسی مقدس بستی تھی جس میں کہ ملائک بستے تھے
پنج وقت اذانیں گونجتی تھیں اُس پیاری سوہنی بستی میں
ہم اپنے خدا کے قدموں میں دل رکھ کر سجدے کرتے تھے
اِک شجرِ خلافت دھوپ میں اس بستی کو چھاؤں دیتا تھا
وہ ہم سے محبت کرتا تھا، ہم اُس پر جان چھڑکتے تھے
مل جل کر دکھ سکھ بانٹتے تھے، غُربت میں بھی ہر گھر خوش تھا
سکھ چین تھا اُس کی مٹی میں ہم جس بستی میں رہتے تھے
سب دنیا میں مشہور تھی وہ، ظُلمت کے دور میں نُور تھی وہ
اِن سیدھے سادہ لوگوں کی بستی کے گُن سب گاتے تھے
اِک چھپتا پِھرتا نُور تھا واں، درویش صفت مسرور تھا واں
یہ بستی ایک گلستاں تھی، جس میں گلِ نور مہکتے تھے
کہساروں کے دامن میں کچے پکے گھر تھے لوگوں کے
کچھ مٹی کے ٹیلے بھی تھے جن پر ہم کھیلا کرتے تھے
کچھ عالی شان مساجد تھیں جو اس بستی کا جھومر تھیں
وہ مسجدِ اقصیٰ اور مبارک جِن میں جمعے پڑھتے تھے
(عبدالجلیل عباد – جرمنی)
