تیز کانٹوں پر بچھا لیتی ہوں بستر رات کو
لازما میں جھانکتی ہوں اپنے اندر رات کو
جیسے گھر بھر جائے تو نکلے دریچوں سے دھؤاں
یونہی ہو جاتے ہیں کچھ اشعار اکثر رات کو
دن کو جولاں گہ مری گنجائشِ زنجیر تک
بے تکاں اُڑتی ہوں سارے آسماں پر رات کو
آنکھ کے پانی سے دُھل کر فرش ہو جاتا ہے عرش
خشک صحرا میں اُترتے ہیں سمندر رات کو
اُس کی جانب سے بھی خود ہی دیتی رہتی ہوں جواب
گفتگو یونہی ہؤا کرتی ہے اکثر رات کو
فتویٰ ہائے کفر کے ڈر سے لگی رہتی ہے چپ
ورنہ کچھ ہوتا ہے نازل میرے دل پر رات کو
خوف رہتا ہے مجھے اُن کا کہ جو بے خوف ہیں
رات سے دن کو زیادہ، دن سے بڑھ کر رات کو
عیش سے فرصت ملے تو اُن کا دُکھ بھی سوچنا
پیٹ پر جو باندھ کر سوتے ہیں پتھر رات کو
میری یادیں، میری سوچیں، میرے ارماں، میرے خواب
تازہ دم ہو جاتے ہیں مجھ سے لپٹ کر رات کو
(امۃ الباری ناصر۔ امریکہ)
