رہی ہے تجھ سے محبّت میں اک کمی باقی

رہی ہے تجھ سے محبّت میں اک کمی باقی
کہ جاں لُٹانے کی ہے رسمِ دلبری باقی
ہزار اشک بہائے ہیں چشمۂ دل نے
ہماری آنکھوں میں اب تک بھی ہے نمی باقی
رہا حیات کا مقصد تمہاری خوشنودی
ہمارے دل میں تھی جب تک کہ روشنی باقی
گزر گئی ہے جو گزری اسے تُو جانتا ہے
رہی ہے اب تو ہمیشہ کی زندگی باقی
جو پی رہے ہیں ترے میکدے سے روز و شب
کہیں یہ کیسے، رہی اب بھی تشنگی باقی
ہمیں جو دیکھ کے بے ساختہ تمہیں آئی
ہماری یادوں میں اب تک ہے وہ ہنسی باقی
ہے طارقؔ اب بھی ہمیں انتظار اس کا ہی
ہماری رہ گئی جو وصل کی گھڑی باقی

(ڈاکٹر طارق انور باجوہ۔ لندن)