اللہ کیا عجیب یہ نعمت نماز ہے
دنیا و دین میں باعثِ راحت نمازہے
حکمِ خدا یہ ہے کہ پڑھو مل کے پانچ وقت
افضل عبادتوں میں عبادت نماز ہے
پھریہ بھی حکم ہے کہ جماعت کے ساتھ ہو
اس طرح اور جاذبِ رحمت نمازہو
بہرِنمازِ جمعہ یہ ہو اہتمامِ خاص
سب جان لیں کہ وجہِ مسرّت نماز ہے
لازم ہے ذوق و شوق برائے نماز ِ عید
یہ مومنوں کی مظہرِ شوکت نماز ہے
جو ظلمتِ گناہ کو آنے نہ دے قریب
وہ نورِ حق ، وہ شمعِ ہدایت نماز ہے
بیمار کو مزہ نہیں ملتا طعام کا
دل صاف ہو تو موجبِ لذت نماز ہے
پھیلا ہوا ہے اس کا اثر دو جہان میں
جس کو نہیں زوال وہ دولت نماز ہے
اس کے سوا اب اور ذریعہ کوئی نہیں
قُربِ خدا کی ایک ہی صورت نمازہے
صحت ہو یا مرض ہو حضر ہو کہ ہو سفر
مومن کی روح کے لیے فرحت نمازہے
لازم ہے یہ ادا ہو خشوع و خضوع سے
بے شبہ اِک وسیلۂ جنت نمازہے
جرم و سزا سے ہم کو بچاتی ہے روزو شب
فضلِ خدا سے دافعِ زحمت نمازہے
(حضرت حافظ سید مختار احمد مختار ؔشاہجہانپوری صاحب ؓ)
