رہبر ہے رہبری ہے قرآن کی تلاوت
ہر صبح سر خوشی ہے قرآن کی تلاوت
لگتا ہے ایسے جیسے خوشبو خدا کی لائی
ایماں کی تازگی ہے قرآن کی تلاوت
معبود اور بندے کے درمیاں لڑی ہے
اک ربطِ باہمی ہے قرآن کی تلاوت
پانچوں نمازیں بے شک ہیں قرب کا ہی زینہ
اور اس پہ دلکشی ہے قرآن کی تلاوت
دنیا کے راستے کے اُجڑے ہوئے دلوں کو
سر سبز کر رہی ہے قرآن کی تلاوت
اترا نبیؐ کے دل پر جبریل لے کے آیا
احمدؐ کی پیروی ہے قرآن کی تلاوت
پڑھتے ہوئے ٹھہرنا اور غور و خوض کرنا
بے شک یوں آگہی ہے قرآن کی تلاوت
اس کے بغیر خالی خاکی بدن ہے لاشہ
سانسیں ہیں زندگی ہے قرآن کی تلاوت
اس نے کیا ہے روشن دل کو دیا بنا کر
جس جس نے بھی سنی ہے قرآن کی تلاوت
(دیا جیم۔ فجی)
