رسول اللہ صلی اللہ علیہ وسلم کے لئے سلامتی کی دعا
حضرت صاحبزادہ مرزا بشیر احمد ؓ صاحب تحریر کرتے ہیں کہ خواجہ عبد الرحمٰن صاحب ساکن کشمیر نے مجھ سے بذریعہ تحریر بیان کیا کہ میرے والد صاحب نے ایک مرتبہ ذکر کیا کہ جب میَں شروع شروع میں احمدی ہوا تو قصبہ شوپیاں علاقہ کشمیر کے بعض لوگوں نے مجھ سے کہا کہ میں حضرت مسیح موعود علیہ السلام سے ’’صَلَّی اللّٰہُ عَلَیْکَ یَا رَسُوْ لَ اللّٰہِ وَسَلَّمَکَ اللّٰہُ یَا رَسُوْ لَ اللّٰہِ‘‘ کے پڑھنے کے متعلق استفار کروں۔ یعنی آیا یہ پڑھنا جائز ہے یا نہیں۔ سو میں نے حضرت اقدس علیہ السلام کی خدمت میں اس بارہ میں خط لکھا۔ حضور نے جواب تحریر فرمایا کہ یہ پڑھنا جائز ہے۔
خاکسار عرض کرتا ہے کہ اس استفسار کی غرض یہ ہوتی ہے کہ چونکہ آنحضرت صلی اللہ علیہ وسلم وفات پا چکے ہیں تو کیا اس صورت میں بھی آپؐ کو ایک زندہ شخص کی طرح مخاطب کر کے دُعا دینا جائز ہے سو اگر یہ روایت درست ہے تو حضرت مسیح موعود ؑ کا فتویٰ یہ ہے کہ ایسا کرنا جائز ہے اور اس کی وجہ یہ معلوم ہوتی ہے کہ چونکہ آپؐ کی روحانیت زندہ ہے اور آپؐ اپنی امّت کے واسطے سے بھی زندہ ہیں۔ اس لئے آپ کے خطاب کے رنگ میں دعا کرنا جائز ہے۔ بلکہ حضرت مسیح موعود علیہ السلام نے تو اپنے ایک شعر میں آنحضرت صلی اللہ علیہ وسلم سے مخاطب ہو کر آپؐ سے مدد اور نصرت بھی چاہی ہے۔ چنانچہ فر ماتے ہیں: ’’اے سیّد الوریٰ! مددے وقتِ نصرت است‘‘
یعنی اے رسول اللہ! آپؐ کی امّت پر ایک نازک گھڑی آئی ہوئی ہے۔ میری مدد کو تشریف لائیے کہ یہ نصرت کا وقت ہے۔
(سیرت المہدی جلد1 صفحہ553۔554)
(مرسلہ: داؤد احمد عابد۔ استاد جامعہ احمدیہ برطانیہ)
