شعبان اسلامی کیلنڈر کا آٹھواں مہینہ ہے۔ اس ماہ کی 15 تاریخ کی رات عوام میں شب برات اور شب قدر کے نام سے مشہور ہے۔ اس رات کو لیلۃ البراءت۔ لیلۃ الصک، لیلۃ الرحمۃ، اور لیلۃ المبارکہ بھی کہا جاتا ہے۔
شب برا ت کے معانی
شب برأت دراصل فارسی اور عربی کے دو لفظوں کامجموعہ ہے۔ شب، فارسی میں رات کو کہتے ہیں۔ اور برات اگر الف اور ت کے درمیان ہمزہ (ء) ہو تو عربی کا لفظ ہے یعنی براءت۔ جس کے معنی بری ہونے اور نجات پانے کے ہیں۔
اگر لفظ برات کے الف اور ت کے درمیان ہمزہ نہ ہو تو یہ سنسکرت سے ماخوذ ہوگا۔ فارسی اور اُردو دونوں میں الگ الگ معنی کے لئے بولا جاتا ہے۔ فارسی میں برات بمعنی حصہ، نقد، تقدیر وغیر ہے۔ اور اُردو میں وہ جلوس جو دولہا کی شادی میں اس کے ساتھ جاتا ہے۔
قرآن کریم میں شب برات کا ذکر
سب سے پہلے ہم اس بات پر غور کرتے ہیں کہ آیا قرآن کریم میں شب برات یعنی 15 شعبان کی فضلیت کے بارہ میں کیا بیان ہوا ہے تو ہمیں معلوم ہوتاہے کہ سارے قرآن کریم میں صرف ایک رات کی غیر معمولی فضیلت بیان کی گئی ہے۔ یعنی ‘‘لیلۃ القدر’’ وہ رات جس میں قرآن کریم نازل کیا گیا۔ اس کی اہمیت قرآن کریم میں ان الفاظ میں بیان ہوئی ہے :
اِنَّاۤ اَنۡزَلۡنٰہُ فِیۡ لَیۡلَۃِ الۡقَدۡرِ ۚ﴿ۖ۲﴾ وَمَاۤ اَدۡرٰٮکَ مَا لَیۡلَۃُ الۡقَدۡرِ ؕ﴿۳﴾ لَیۡلَۃُ الۡقَدۡرِ ۬ۙ خَیۡرٌ مِّنۡ اَلۡفِ شَہۡرٍ ؕ﴿ؔ۴﴾ تَنَزَّلُ الۡمَلٰٓئِکَۃُ وَالرُّوۡحُ فِیۡہَا بِاِذۡنِ رَبِّہِمۡ ۚ مِنۡ کُلِّ اَمۡرٍ ۙ﴿ۛ۵﴾ سَلٰمٌ ۟ۛ ہِیَ حَتّٰی مَطۡلَعِ الۡفَجۡرِ ﴿۶﴾
(سورۃ القدر)
یقیناً ہم نے اسے قدر کی رات میں اتارا ہے۔ اور تجھے کیا سمجھائے کہ قدر کی رات کیا ہے۔ قدر کی رات ہزار مہینوں سے بہتر ہے۔ بکثرت نازل ہوتے ہیں اُس میں فرشتے اور روح القدس اپنے ربّ کے حکم سے۔ ہر معاملہ میں۔ سلام ہے۔ یہ (سلسلہ) طلوعِ فجر تک جاری رہتا ہے۔۔
احادیث میں لیلۃ القدر کے متعلق آتا ہے کہ یہ ماہ رمضان کے آخری عشرہ کی طاق راتوں میں آتی ہے اور اس کی بڑی فضیلت بیان کی گئی ہے۔
لیلۃ القدر کے علاوہ کسی اور رات کی اس قدر فضیلت قرآن کریم میں بیان نہیں کی گئی۔
قائلین شب برات کا موقف
شب برات منانے کے قائلین قرآن کریم کی درج ذیل آیت سے استدلال کرتے ہیں کہ اس میں شب برات کا ذکر ہے:
اِنَّاۤ اَنۡزَلۡنٰہُ فِیۡ لَیۡلَۃٍ مُّبٰرَکَۃٍ اِنَّا کُنَّا مُنۡذِرِیۡنَ ﴿۴﴾ فِیۡہَا یُفۡرَقُ کُلُّ اَمۡرٍ حَکِیۡمٍ ۙ﴿۵﴾
(الدخان:4-5)
یقیناً ہم نے اسے (یعنی قرآن کو) ایک بڑی مبارک رات میں اتارا ہے۔ ہم بہر صورت اِنذارکرنے والے تھے۔ اس (رات) میں ہر حکمت والے معاملہ کا فیصلہ کیا جاتا ہے۔
شب برات کے قائلین ‘‘لیلہ مبارکہ’’ سے شب برات مراد لیتے ہیں۔ انہوں نے ’’لیلہ مبارکہ‘‘ یعنی برکت والی رات کو الگ رات قرار دے کر ‘‘لیلۃ القدر’’ کی تمام فضیلتیں شب برات کے ساتھ منسوب کر دی ہیں جو درست نہیں ہے۔ لیلۃ القدر کو ہی دوسری جگہ لیلہ مبارکہ یعنی خیر وبرکت والی رات کہا گیا ہے جس میں قرآن کریم نازل ہوا۔ قرآن کریم ماہ رمضان میں نازل ہونا شروع ہوا۔ جیسا کہ اللہ تعالیٰ فرماتا ہے کہ شَہۡرُ رَمَضَانَ الَّذِیۡۤ اُنۡزِلَ فِیۡہِ الۡقُرۡاٰنُ (البقرہ:186) کہ رمضان کا مہینہ وہ مہینہ ہے جس میں قرآن کریم نازل ہوا۔
لیلۃ القدر رمضان کے آخری عشرہ کی طاق راتوں میں سے ایک رات ہے۔ اور اس میں عبادت کرنے کی بہت فضیلت بیان کی گئی ہے۔
صحابہ کرام رضی اللہ عنہ کا عقیدہ
صحابہ کرام میں قرآن کریم سمجھنے کے حوالہ سے حضرت عبداللہ بن عباسؓ اور حضرت عبداللہ بن عمرؓ کا مرتبہ بہت بلند ہے۔ صحابہ رسولﷺ میں سے حضرت عبداللہ بن عباسؓ اور حضرت ابن عمرؓ اور دیگر مفسرین میں سے حضرت قتادہؓ، حضرت مجاہد ؒ، حضرت حسن بصری ؒکے نزدیک ’’لیلہ مبارکہ‘‘ سے مراد لیلۃ القدر ہی ہے۔ کیونکہ دونوں راتوں میں قرآن کریم کا نزول قدرِ مشترک ہے۔ لہٰذا ’’لیلہ مبارکہ‘‘ سے ’’شب برات‘‘ مراد لینا درست نہیں ہے۔ ’’لیلہ مبارکہ‘‘ اور لیلۃ القدر ایک ہی رات کے دو نام ہیں۔
حضرت امام رازیؒ کا موقف
حضرت امام رازیؒ تفسیر کبیر میں سورۃ الدخان کی تفسیر میں تحریر کرتے ہیں کہ : ’’لیلہ مبارکہ کے متعلق مفسرین نے اختلاف کیا ہے۔ اکثر مفسرین کہتے ہیں کہ یہ دراصل لیلۃ القدر ہی ہے۔ عکرمہ اور کچھ دوسرے لوگ کہتے ہیں کہ یہ شب براءت ہے جو پندرہ شعبان کو آتی ہے۔مفسرین کی اکثریت نے جو لیلہ مبارکہ کو لیلۃ القدر قرار دیتی ہے اپنے قول کی تائید میں درج ذیل دلائل سے استنباط کیا ہے :
اول۔ اللہ تعالیٰ نے قرآن مجید کے متعلق سورۃ القدر میں فرمایا ہے کہ إِنَّا أَنزَلْنَاہُ فِیْ لَیْلَۃِ الْقَدْر کہ ہم نے قرآن کو لیلۃ القدر میں نازل کیا۔ اورسورہ دخان کی اس آیت میں فرمایا إِنَّا أَنزَلْنَاہُ فِیْ لَیْلَۃٍ مُّبَارَکَۃٍ کہ ہم نے اس قرآن کو لیلہ مبارکہ میں نازل کیا۔ پس اس سے لازم آتا ہے کہ لیلہ مبارکہ کو ہی لیلۃ القدر کا نام دیا گیا ہے تاکہ دونوں آیات میں تناقض نہ رہے۔
دوسری دلیل یہ ہے اللہ تعالیٰ فرماتا ہے کہ: شَہۡرُ رَمَضَانَ الَّذِیۡۤ اُنۡزِلَ فِیۡہِ الۡقُرۡاٰنُ (البقرہ:186)کہ رمضان کا مہینہ وہ مہینہ ہے جس میں قرآن کریم نازل ہوا۔ یہاں خداتعالیٰ نے واضح فرما دیا کہ قرآن کا نزول رمضان کے مہینہ میں ہوا اورسورۃ دخان کی اس آیت میں فرمایا کہ إِنَّا أَنزَلْنَاہُ فِیْ لَیْلَۃٍ مُّبَارَکَۃ کہ ہم نے قرآن کو لیلہ مبارکہ میں نازل کیا۔ پس اس سے لازم آیا کہ یہ رات رمضان کے مہینوں میں سے ایک رات ہے (نہ کہ شعبان کی رات)۔ اور جس کسی نے لیلہ مبارکہ کو رمضان کے مہینہ میں تسلیم کیا ہے اس نے اسے لیلۃ القدر ہی قرار دیا ہے۔ پس ثابت ہوا کہ یہ لیلۃ القدر ہی ہے۔
تیسری دلیل یہ ہے کہ اللہ تعالیٰ نے لیلۃ القدر کی صفت میں بیان فرمایا ہے تَنَزَّلُ الْمَلَائِکَۃُ وَالرُّوحُ فِیْہَا بِإِذْنِ رَبِّہِم مِّن کُلِّ أَمْر سَلَامٌ کہ اس رات میں فرشتے اور روح القدس اپنے رب کے حکم سے نازل ہوتے ہیں اور یہاں لیلہ مبارکہ کی صفت میں فرمایا فِیْہَا یُفْرَقُ کُلُّ أَمْرٍ حَکِیْمٍ کہ اس میں ہر حکمت والے امر کا فیصلہ کیا جاتا ہے۔ اور یہ خداتعالیٰ کے اس قول سے مناسبت رکھتا ہے کہ تنزل الملائکۃ والروح فیھا کہ اس رات میں فرشتے اور روح القدس نازل ہوتے ہیں۔
لیلہ مبارکہ کی صفت میں فرمایا اَمْرًا مِّنْ عِنْدِنَا اور لیلۃ القدر کی صفت میں فرمایا بِاِذْنِ رَبِّھِمْ مِّنْ کُلِّ اَمْر۔ یہاں فرمایا: رَحْمَۃٌ مِّنْ رَّبِّکَ اور سورہ القدر میں فرمایا سَلَامٌ ھِیَ۔ پس جب اس قدر اوصاف مشترک ہیں تو ثابت ہوا کہ دونوں راتیں دراصل ایک ہی رات کے دو نام ہیں۔۔۔۔۔
جہاں تک اس گروہ کا تعلق ہے جو شعبان کی پندرھویں رات کو لیلہ مبارکہ قرار دیتا ہے تو میں نے ان کے پاس کوئی ایسی دلیل نہیں پائی جس پر اعتماد کیا جاسکے۔ انہوں نے عام افراد سے نقل کرنے پر ہی قناعت کی ہے۔
(تفسیر کبیر امام رازی زیر آیت الدخان : 1 تا9)
حضرت علامہ زمخشریؒ کا موقف
حضرت علامہ زمخشریؒ تفسیر کشاف میں لیلہ مبارکہ والی آیت کی تفسیر میں تحریر کرتے ہیں کہ :
لیلہ مبارکہ سے مراد لیلۃ القدر ہے۔ البتہ بعض لوگ اس سے نصف شعبان کی رات مراد لیتے ہیں جس کے چار نام بیان کیے جاتے ہیں۔
- لیلہ مبارکہ
- لیلۃ البراءۃ
- لیلۃ الصک (دستاویز والی رات)۔
- لیلۃ الرحمت
کہا جاتا ہے کہ اس رات اور لیلۃ القدر کے درمیان چالیس راتیں ہیں۔ لیلۃ البراءۃ یعنی شب برات اور لیلۃ الصک کی وجہ تسمیہ میں یہ بیان کیا جاتا ہے کہ جس طرح ٹیکس collector جب کسی سے ٹیکس لے لیتا ہے تو اس کے حق میں بریت والی دستاویز لکھ دیتا ہے۔ اسی طرح خدا تعالیٰ اس رات میں اپنے بندوں کے لیے جہنم سے بریت لکھتا ہے۔
پانچ خصوصیات
کہا جاتا ہے کہ اس رات کی پانچ خصوصیات ہیں :
(1) اس میں ہر حکمت والے امر کا فیصلہ کیا جاتا ہے اور اس رات عبادت کی بہت فضیلت ہے۔ چنانچہ رسول اللہﷺ نے فرمایا : جس نے اس رات 100 رکعات ادا کیں اللہ تعالیٰ اس کی طرف 100 فرشتے بھیجے گا جن میں سے 30 فرشتے اسے جنت کی بشارت دیں گے، 30 فرشتے اسے آگ کے عذاب سے امن میں رکھیں گے، 30 فرشتے اس سے دنیا کی آفات دور کریں گے اور 10 فرشتے اس سے شیطان کی تدبیروں کو دور کریں گے۔
(2) اس رات رحمت کا نزول ہوتا ہے۔ چنانچہ آنحضرتﷺ فرماتے ہیں : اس رات اللہ تعالیٰ میری امت پر بنو کلب قبیلہ کی بکریوں کے بالوں کے برابر رحم کرے گا۔
(3) اس رات حصول مغفرت ہوتی ہے۔ چنانچہ آپؐ نے فرمایا : اللہ تعالیٰ اس رات سب مسلمانوں کو بخش دیتا ہے سوائے کاہن، جادوگر، کینہ پرور، شراب کا عادی، والدین کا نافرمان اور زنا پر اصرار کرنے والے کے۔
(4) رسول اللہﷺ کو اس رات مکمل شفاعت کا حق دیا گیاہے۔ وہ اس طرح کہ آپ نے شعبان کی تیرھویں رات اپنی امت کے بارے میں یہ حق مانگا تو آپ کو تیسرے حصے کی شفاعت کا حق دیا گیا پھر چودھویں رات کو یہ حق مانگا تو آپ کو امت کے دو تہائی حصے کے بارہ میں شفاعت کا حق دیا گیا پھر آپ نے پندرھویں شعبان کو یہ حق مانگا تو آپ کو ساری امت کی شفاعت کا حق دے دیا گیا سوائے ایسے شخص کے جو اللہ کی اطاعت سے ایسے بدک کر نکل جائے جیسے اونٹ اپنے مالک کے سامنے بدک کر بھاگ جاتا ہے۔
(5) اس رات اللہ تعالیٰ زمزم کے پانی کو ظاہری طور پر زیادہ کر دیتا ہے۔
تاہم اکثریت لیلہ مبارکہ سے لیلۃ القدر ہی مراد لیتی ہے۔ کیونکہ لیلۃ القدر اور لیلۃ البراءۃ کے متعلق خداتعالیٰ کے اقوال باہم مطابقت رکھتے ہیں جیسے فرمایا: اِنَّاۤ اَنۡزَلۡنٰہُ فِیۡ لَیۡلَۃِ الۡقَدۡرِ پھر فرمایا: فِیْہَا یُفْرَقُ کُلُّ أَمْرٍ حَکِیْمٍ یہ قول تَنَزَّلُ الْمَلَائِکَۃُ وَالرُّوحُ فِیْہَا بِإِذْنِ رَبِّہِم مِّن کُلِّ أَمْر والے قول کے مطابق ہے۔ اللہ تعالیٰ کا یہ فرمان کہ شَہۡرُ رَمَضَانَ الَّذِیۡۤ اُنۡزِلَ فِیۡہِ الۡقُرۡاٰنُ۔ مطابقت رکھتا ہے اس سے کہ لیلۃ القدر ماہ رمضان میں آتی ہے۔
(تفسیر کشاف للعلامہ زمخشری زیر آیت الدخان :1تا8)
15 شعبان کی فضیلت کے متعلق احادیث
احادیث کا مطالعہ کرنے سے شعبان اور 15 شعبان کی اہمیت و فضیلت کےحوالہ سے بعض احادیث ملتی ہیں۔ چنانچہ ان میں سب سے مشہور حدیث حضرت عائشہ رضی اللہ تعالیٰ عنہ سے مروی ہے۔
عَنْ عَائِشَةَ قالت فَقَدتُّ رسولَ اللّٰہ صلی اللّٰہ علیہ وسلم لَیْلَةً فَخَرَجْتُ فَاِذَا ھُوَ بِالبَقِیْعِ فَقَالَ أَکُنْتِ تَخَافِیْنَ اَنْ یَّحِیْفَ اللہُ عَلَیْکِ؟ قُلْتُ: یَا رَسُوْلَ اللّٰہِ! ظَنَنْتُ اَنَّکَ اَتَیْتَ بَعْضَ نِسَائِکَ فَقَالَ اِنَّ اللّٰہَ تَبَارَکَ وتَعَالٰی یَنْزِلُ لَیْلَةَ النِّصْفِ مِنْ شَعْبَانَ اِلٰی سَمَاءِ الدُّنْیَا فَیَغْفِرُ لِاَکْثَرَ مِنْ عَدَدِ شَعْرِ غَنَمِ کَلْبٍ
(جامع ترمذی)
ترجمہ: حضرت عائشہ صدیقہؓ سے روایت ہے، فرماتی ہیں: میں نے ایک رات نبی کریمﷺ کو اپنے بستر پر نہ پایا، تو میں آپﷺ کی تلاش میں نکلی، تو میں نے دیکھا کہ آپﷺ بقیع (مدینہ طیبہ کا قبرستان) میں ہیں، آپﷺ نے (مجھے دیکھ کر) ارشاد فرمایا: کیا تو یہ اندیشہ رکھتی ہے کہ اللہ اور اس کا رسول تیرے ساتھ بے انصافی کرے گا؟ (یعنی تیری باری میں کسی دوسری بیوی کے پاس چلا جائے گا؟) میں نے عرض کیا کہ یا رسول اللہ! مجھے یہ خیال ہوا کہ آپ اپنی کسی دوسری بیوی کے پاس تشریف لے گئے ہوں، آپﷺ نے ارشاد فرمایا: اللہ تعالیٰ شعبان کی پندرہویں شب میں آسمانِ دنیا پر نزول فرماتا ہے اور قبیلہٴ بنوکلب کی بکریوں کے بالوں سے زیادہ لوگوں کی مغفرت فرماتا ہے۔ (بنوکلب عرب کا ایک قبیلہ تھا، عرب کے تمام قبائل سے زیادہ اس کے پاس بکریاں ہوتی تھیں۔)
اسی طرح ایک دوسری حدیث حضرت علیؓ سے مروی ہے۔ مندرجہ ذیل ہے۔
عَنْ عَلِیِّ بنِ اَبِیْ طالبٍ قَالَ قَالَ رَسُوْلُ اللّٰہِ صَلّی اللّٰہُ عَلَیْہِ وَسَلّمَ اِذَا کانَتْ لَیْلَةُ النِّصْفِ مِنْ شَعْبَانَ فَقُوْمُوا لَیْلَھَا وصُوْمُوْا نَھَارَھَا فَاِنَّ اللّٰہَ یَنْزِلُ فِیْھَا لِغُرُوْبِ الشَّمْسِ اِلٰی سَمَاءِ الدُّنْیَا فیَقُولُ اَلاَ مِنْ مُسْتَغْفِرٍ لِیْ فَاَغْفِرَ لَہ اَلاَ مِنْ مُسْتَرْزِقٍ فَاَرْزُقَہ اَلاَ مُبْتَلاً فَاُعَافِیْہِ کَذَا اَلاَ کَذَا حتّٰی یَطْلُعَ الْفَجْرُ
(ابن ماجہ)
ترجمہ: حضرت علی بن ابی طالبؓ سے روایت ہے کہ رسول اللہﷺ کا ارشاد ہے: جب نصف شعبان کی رات آجائے تو تم اس رات میں قیام کیا کرو اور اس کے دن (پندرہویں تاریخ) کا روزہ رکھا کرو؛ اس لیے کہ اس رات میں اللہ تعالیٰ سورج غروب ہونے سے طلوعِ فجر تک قریب کے آسمان پر نزول فرماتا ہے اور ارشاد فرماتا ہےکہ کیا ہے کوئی مجھ سے مغفرت طلب کرنے والا جس کی میں مغفرت کروں؟، کیا ہے کوئی مجھ سے رزق کا طالب کہ میں اس کو رزق عطا کروں؟ کیا ہے کوئی کسی مصیبت یا بیماری میں مبتلا کہ میں اس کو عافیت عطا کروں؟ کیا ہے کوئی ایسا؟ کیا ہے کوئی ایسا؟ اللہ تعالیٰ برابر یہ آواز دیتا رہتا ہے؛ یہاں تک کہ سورج طلوع ہوجاتا ہے۔
15 شعبان کے متعلق احادیث کی صحت
ان احادیث کے بارے میں علماء کا ایک بڑا طبقہ یہ مانتا ہے کہ ان کے بعض راوی ضعیف ہیں اور یہ احادیث موضوع ہیں چنانچہ علامہ بدرالدین عینی حنفیؒ عمدۃ ح القاری شرح صحیح بخاری میں لکھتے ہیں کہ :
’’نصف شعبان میں عبادت کرنے والی احادیث کی بابت ابو الخطاب کہتے ہیں کہ یہ سب وضعی ہیں۔ ان میں سے ایک حدیث جو ترمذی میں ہے اس کی سند مقطوع ہے۔ وہ حدیث یہ ہے کہ: عروۃؓ حضرت عائشہؓ سے روایت کرتے ہیں کہ انہوں نے بیان کیا کہ: اپنی باری میں ایک رات میں نے رسول اللہﷺ کو نہ پایا چنانچہ میں تلاش میں نکلی تو دیکھا کہ آپ ’’بقیع‘‘ میں ہیں۔ آپ نے فرمایا : کیا تمہیں خوف تھا کہ اللہ اور اس کا رسول تم پر ظلم کریں گے۔ میں نے عرض کیا یا رسول اللہﷺ میں نے سمجھا کہ شاید آپ کسی دوسری بیوی کے پاس تشریف لے گئے ہوں گے۔ آپ نے فرمایا : اللہ تعالیٰ شعبان کی پندرھویں رات کو دنیا کے آسمان پر نزول فرماتا ہے اور بنو کلب کی بکریوں کے بالوں سے زیادہ تعداد میں لوگوں کی مغفرت فرماتا ہے۔
امام ترمذی یہ حدیث درج کرنے کے بعد لکھتے ہیں کہ ہم حدیث عائشہ کو حجاج کی روایت سے صرف اسی سند سے جانتے ہیں اور امام محمد بن اسماعیل البخاری نے اس حدیث کو ضعیف قرار دیا ہے اور کہا ہے کہ اس کی سند میں یحییٰ بن کثیر نے عروہ سے اور حجاج نے یحییٰ بن کثیر سے کوئی حدیث نہیں سنی۔ سنن ابن ماجہ نے بھی اس حدیث کو مذکورہ سند سے ہی نقل کیا ہے۔ اور ابو الخطاب کا قول کہ اس کی سند مقطوع ہے کا مطلب ہے کہ اس کی سند دو جگہ سے منقطع ہے۔ ایک حجاج اور یحییٰ کی طرف سے اور ایک یحییٰ اور عروہ کی طرف سے۔ یعنی ان دونوں کی آپس میں ملاقات ثابت نہیں ہے۔۔۔
سنن ابن ماجہ میں روایت ہے کہ حضرت علیؓ بیان کرتے ہیں کہ رسول اللہﷺ نے فرمایا : جب نصف شعبان کی رات ہو تو رات کو عبادت کرو اور آئندہ دن روزہ رکھو اس لئے کہ اس میں غروبِ شمس سے فجر طلوع ہونے تک آسمانِ دنیا میں اللہ تعالیٰ نزول فرماتا ہے اور کہتا ہے کہ کیا کوئی مغفرت کا طلبگارہے کہ میں اس کی مغفرت کروں؟ کیا کوئی رزق کا طلبگار ہے کہ میں اسے رزق دوں؟ کیا کوئی بیماری میں مبتلا ہے کہ میں اسے شفا دوں؟ کوئی ایسا ہے کوئی ویسا ہے؟ یہاں تک کہ فجر طلوع ہو جاتی ہے۔
اس حدیث کی سند بھی ضعیف ہے۔ ابن ابی سبرہ جس کا اصل نام ابوبکر بن عبداللہ بن محمد بن سبرۃ ہے یہ راوی بھی ضعیف ہیں اور ابراہیم بن محمد جو ابن ابی یحییٰ کے نام سے جانے جاتے ہیں اسے بھی جمہور نے ضعیف قرار دیا ہے۔
حضرت علی بن ابی طالب کی سند سے ایک اور حدیث مروی ہے کہ:
میں نے رسول اللہﷺ کو پندرہویں شعبان کی رات کو دیکھا کہ آپ نے 14 رکعات ادا کیں پھر آپ بیٹھ گئے 14 مرتبہ آپ نے سورۃ فاتحہ پڑھی۔
اس حدیث کے آخر میں ہے کہ آنحضرتﷺ نے فرمایا کہ جس شخص نے ایسا کیا تو اس نے گویا بیس حج مبرور کیے اور بیس سال کے مقبول روزے رکھے۔ پھر اگر وہ اگلے دن روزہ رکھتا ہے تو اس نے گویا گزشتہ 60 سالوں اور آئندہ 60 سالوں کے روزے رکھ لیے۔ اس روایت کو ابن جوزی ؒ نے اپنی کتاب موضوعات میں درج کیا ہے اور اسے وضعی قرار دیا ہے اور اس کی سند کو تاریک و سیاہ کہا ہے۔
حضرت علیؓ کے واسطہ سے ایک اور روایت بھی ہے اسے بھی امام جوزیؒ نے موضوعات میں شمار کیا ہے۔ وہ روایت یہ ہے کہ آنحضرتؐ نے فرمایا :
جس نے پندرہ شعبان کی رات کو 100 رکعات ادا کیں اور ہر رکعت میں ایک مرتبہ سورۃ فاتحہ اور دس مرتبہ سورۃ اخلاص پڑھی تو جو شخص ایسی نماز پڑھے گا تو خدا اس کی ہر دعا جو اس نے اس رات کی ہو گی قبول فرما لے گا۔ امام جوزیؒ اس روایت کے متعلق فرماتے ہیں کہ اس میں کوئی شک نہیں کہ یہ روایت موضوع ہے۔
(عمدۃ القاری شرح صحیح بخاری کتاب الصوم باب صوم شعبان)
شب برات کی حقیقت
قرآن کریم اور مستند احادیث میں کوئی ثبوت نہیں ہے کہ آنحضرتﷺ اس دن خصوصیت کے ساتھ روزہ رکھتے ہوں۔ اس سلسلہ میں جتنی بھی احادیث بیان کی جاتی ہیں ان کی اسناد ضعیف ہیں۔ اس رات کے ساتھ منسلک کام (حلوہ پکانا، آتش بازی کرنا وغیرہ) جو بڑی دھوم دھام سے کیے جاتے ہیں ان کا ثبوت کسی صحیح حدیث سے نہیں ملتا۔
ماہ شعبان کے بارہ میں مستند احادیث سے پتہ چلتا ہے کہ آنحضرتﷺ اس مہینہ میں کثرت کے ساتھ نفلی روزے رکھا کرتے تھے لیکن آپ نے اپنی امت کو اس مہینہ میں بکثرت نفلی روزے رکھنے سے منع فرمایا ہے تاکہ وہ ماہ رمضان کے روزے پوری مستعدی کے ساتھ رکھ سکیں اور ایسا نہ ہو کہ ماہ شعبان میں بکثرت نفلی روزے رکھنے کے نتیجہ میں ماہ رمضان کے فرض روزوں کے سلسلے میں انہیں دشواری ہو۔
15 شعبان کے متعلق مفروضے اور قصے
اس قسم کی روایت کی موجودگی میں وقت کےسا تھ شب برأت کےساتھ مفروضے اور قصے بھی شامل ہو گئےہیں۔ گو ان قصوں کا شب برات سے کوئی تعلق معلوم نہیں ہوتا۔
(الف) جیسے مشہور ہے کہ جنگ اُحد میں آنحضرتﷺ نے اپنے دندان مبارک شہید ہونے کے بعد آج کے روز سخت غذا کھانے کےقابل ہوئے تھے۔ اس خوشی میں مٹھائیاں اور حلوے تیار کر کے تقسیم کئے جاتے ہیں۔
(ب) شیعہ حضرات اس روز کو امام غائب کی پیدائش کا دن تصور کرتے ہیں۔
(ج) بعض لوگوں کا خیال ہے کہ جس طرح زمین پر انسانوں کے لئے دو خوشیاں یعنی عید الفطر اور عید الاضحی مقرر ہیں اسی طرح آسمان پر فرشتوں کی دو عیدیں یعنی شب برأت اور شب قدر ہیں۔
جہاں تک روایات میں اس رات کی فضیلتوںکا تعلق ہے وہ مختلف زاویوں سے بیان ہوئی ہیں۔ مثلاً:
- اس رات انسانوں کا رزق تقسیم کیا جاتا ہے۔
- انسان کی تقدیر لکھی جاتی ہے۔
- اس رات کی عبادت سےسال بھر کے گناہ بخش دئیے جاتے ہیں۔
- اس رات اللہ تعالیٰ قبیلہ بنی کلب کی بکریوں ( یہ قبیلہ بکریاں پالا کرتا تھا) کے بالوں سےبھی زیادہ بندوں کی مغفرت فرماتا ہے۔
- اس رات انسانوں کےاعمال اللہ تعالیٰ کے حضور پیش کئے جاتےہیں۔
- اس رات اللہ تعالیٰ مختلف حاجات کا نام لے لے کر بلاتا ہے کہ کوئی ہے جو مجھ سےسوال کرنے والا یا کچھ مانگنےوالا۔ میں اس کی مراد پوری کروں گا۔ مثلاً کوئی مجھ سےبخشش طلب کرنے والا ہےاس بخش دوں۔ کوئی مجھ سےرزق طلب کرنےوالا ہےاسے میں رزق دوں۔ کوئی ہے جو مصیبت سےنجات مانگے میں اسے نجات دوں۔
- اس رات آئندہ پیدا ہونے والوں اور مرنے والوں کی فہرست تیار ہوتی ہے۔
15 شعبان کی بعض بدعات و رسوم
چراغاں کرنا
شبِ براءت کے موقع پر بعض لوگ گھروں، مسجدوں اور قبرستانوں میں چراغاں کرتے ہیں، یہ بھی اسلامی طریق کے خلاف ہے اور غیرمسلموں کے تہوار دیوالی کی نقل اور مشابہت ہے۔
نصف شعبان کی رات کو چراغاں کرنے کی رسم کے متعلق علامہ ابن دحیہ کا خیال ہے کہ سب سے پہلے یہ رسم یحییٰ بن خالد برمکی کے زمانہ سے شروع ہوئی کہ جب مجوسی اسلام لائے تو انہوں نے عام لوگوں میں ملمع سازی کی باتوں کے ذریعہ یہ رسم پھیلا دی۔ علامہ ابن دحیہ نے اس رسم کا ذکر ملک کامل سے کیا تو انہوں نے تمام شہروں سے اس مجوسی بدعت کا قلع قمع کیا۔
(عمدۃ القاری شرح صحیح بخاری کتاب الصوم باب صوم شعبان)
حضرت ملا علی قاری ؒ فرماتے ہیں کہ :
’’سب سے پہلے چراغاں اور آتش بازی کا مظاہرہ کرنے والے برامکہ تھے جو آتش پرست تھے۔ جب وہ مسلمان ہوئے تو انہوں نے ملمع سازی کر کے ان رسوم کو دین میں داخل کر دیا۔ ان کا اصل مقصد آتش پرستی تھا۔ اس طرح وہ مسلمانوں کے ساتھ مل کر آگ کی طرف رکوع اور سجود کرتے تھے۔ ‘‘
(کتاب الصلاۃ باب قیام شہر رمضان فصل الثانی)
حضرت سید زین العابدین ولی اللہ شاہ صاحب رضی اللہ عنہ شرح بخاری میں ’’شب برات‘‘ کے متعلق تحریر کرتے ہیں کہ:
’’نصف شعبان کی رات کو چراغاں کرنے کے بارے میں بھی بعض روایات ہیں جو عندالتحقیق وضعی ثابت ہوئی ہیں اور معلوم ہوا ہے کہ اِس بدعت کا پس منظر ایران کے آتش پرست مجوسیوں کی رسم تھی جو وہ پندرہویں شعبان کو منایا کرتے تھے …اہل عراق کا زردشتیوں کے رسم و رواج سے متاثر ہونا یا اُسے اختیار کرنا کوئی اچنبھے کی بات نہیں۔ خود ہمارے ملک میں دیوالی وغیرہ ہندوانہ رسوم اور پیدائش، شادی و غمی وغیرہ کی رسوم سے مسلمان جس قدر متاثر ہیں وہ محتاج بیان نہیں۔ انگریزوں کی حکومت کے زمانہ میں اُن کی تقلید کی جاتی تھی۔‘‘
(شرح بخاری جلد سوم صفحہ 646 زیر عنوان کتاب الصوم باب صوم شعبان)
حلوا بنانا اور تقسیم کرنا
حضرت اقدس مسیح موعود علیہ السلام نے نصف شعبان کی نسبت فرمایا کہ :
’’یہ رسوم حلوا وغیرہ سب بدعات ہیں۔ ‘‘
(بدر 26؍ ستمبر 1907ء صفحہ 7، ملفوظات جلد پنجم صفحہ 297)
حضرت مصلح موعود رضی اللہ عنہ سے سوال ہوا کہ کیا شب برات کے روز حلوہ مانڈہ وغیرہ تیار کرنا احمدیوں کے لئے جائز ہے؟
آپ نے فرمایا : ’’نہیں بدعت ہے۔‘‘
(الفضل30؍ اپریل 1954ء)
آتش بازی کرنا
حضرت خلیفۃ المسیح الاول رضی اللہ عنہ سے سوال ہوا کہ جو دن نصف شعبان کاہے جس میں حلوہ سیویاں کھائی جاتی ہیں اور آتش بازی چلائی جاتی ہے آیا کہ اور دنوں سے فضیلت والا ہے یا نہیں؟ حضورؓ نے فرمایا :
’’یہ سب باتیں لغو ہیں۔ شریعت میں اس کا کوئی اصل نہیں۔ احادیث صحیحہ سے ثابت نہیں۔‘‘
(بدر نمبر49,48جلد9،13؍ اکتوبر1910ء)
عید منانا
حضرت خلیفۃ المسیح الاولؓ فرماتے ہیں کہ:
’’شب برات کی عید۔ گیارہویں۔ بارہ وفات محرم کے معاملاتِ موجود، شرع اسلام میں ثابت نہیں۔‘‘
(بدر نمبر 12 جلد 9 13؍ جنوری1910ء)
رزق تقسیم ہونا
حضرت خلیفۃ المسیح الرابع رحمہ اللہ سے سوال ہوا کہ بعض لوگ شب برأت بڑے زوروشور سے مناتے ہیں۔ وہ کہتے ہیں کہ اس رات اللہ میاں رزق تقسیم کرتے ہیں اس کی کیا حقیقت ہے؟ حضورؓ نے فرمایا :
’’غلط ہے۔ رزق تو روزانہ تقسیم ہورہا ہے۔ یہ وہم ہیں لوگوں کے۔ غیر احمدی لوگوں کو پاگل بنا رہے ہوتے ہیں یعنی غیر احمدی مولوی۔ اللہ تعالیٰ تو ہر وقت رزق دیتا ہے۔ زمین و آسمان کا رازق ہے۔ سمندر کی تہہ میں کوئی کیڑا نہیں جس کو خدا رزق نہ دے رہا ہو۔ اس کا رزق تو بے انتہا ہے کیا وہ صرف شب برأت پر دیتا ہے۔ باقی راتیں بھوکے مر جاتے ہیں سب، باقی دنوں میں؟ غلط باتیں بنائی ہوئی ہیں لوگوں نے۔‘‘
(لجنہ سے ملاقات۔ الفضل 7؍ جولائی 2000ء ریکارڈنگ 16؍ جنوری 2000ء)
(محمد انور شہزاد)
