سوچیں مری رہتی ہیں ہر وقت عبادت میں
خامہ ہے رواں میرا سرکارؐ کی مدحت میں
دنیا میں نظر آیا آقاؐ نہ کوئی تجھ سا
دیکھا ہی نہیں کوئی سیرت میں نہ صورت میں
الفاظ معطر ہوں خوشبو سے بہاروں کی
اشعار رقم کر دوں گل ہائے عقیدت میں
مجھ کو وہؐ چھپا لیں گے پردے میں شفاعت کے
صد شکر کہ ہوں شامل میں آپؐ کی امت میں
ہر ایک سے پیش آئے وہؐ نرمی و الفت سے
مسرور تھا ہر ذی روح اُس سایۂ شفقت میں
اخلاص کے وہؐ اعلیٰ درجوں پہ رہے فائز
اکمل ہیں محمد ہی شوکت میں وجاہت میں
ہو حاضری کا مجھ کو بھی حکم اگر بشرؔیٰ!
نعتیں میں سناؤں گی دربارِ رسالت میں
(بشریٰ سعید عاطف۔ مالٹا)
