ظاہر رضائے یار کے عنواں ہوئے تو ہیں
پورے تمہاری دید کے ارماں ہوئے تو ہیں
ہم نے بھی اپنے صبر کا دامن بہم رکھا
آخر تمہارے ہجر کے درماں ہوئے تو ہیں
ان تیز و تند موسموں کی دھوپ چھاؤں میں
اک سائبانِ خیر کے ساماں ہوئے تو ہیں
کرتا نہ کیوں میں شکر ترے التفات کا
رستے لِقائے یار کے آساں ہوئے تو ہیں
بجھنے کو تھی حیات جو ہوتا نہ تیرا ہاتھ
تھے مضمحل چراغ، فروزاں ہوئے تو ہیں
دیدارِ یار کیا ہوا، قوسِ قزح کے رنگ
زینت سرائے دیدۂ گِریاں ہوئے تو ہیں
(عبدالشکور کلیولینڈ۔ اوہائیو، امریکا)
