حمد میں تیری بیاں کیسے کروں کمزور ہوں
دے مجھے طاقت خدایا تا چلے یہ کاروبار
ہم کسی کے عشق میں اتنا کبھی روئے نہ تھے
تیری یادوں نے ہمیں پھر کیوں رلایا بار بار
کیوں کروں غیروں کے آگے درد میں اپنا بیاں
دور کر دے گا میرا غم وہ میرا ہے غمگسار
ٹھوکریں کھا کر سنبھل جاتی ہوں ربّ میرا بھی ہے
تھام لیتا ہے مجھے آ کر میرا پروردگار
ترے احسانوں کو کر کے یاد اے میرے خدا
رو رہا ہے دل میرا آنکھیں ہیں میری اشکبار
صبح سے پھر شام تک اور شام سے پھر صبح تک
ہوبیاں تیری ہی بس حمدوثناء لیل ونہار
اے خدا کمزور ہوں میں, بخش دینا تو مجھے
اپنے فضلوں سے لگا کشتی میری دریا کے پار
زندگانی میں کبھی آئے نہ درد و رنج و غم
پھیر دے میری طرف مولیٰ مرے رحمت کی دھار
میں بہت کمزور ہوں اور ناتواں بندی تیری
دے مجھے ہمت کروں میں شکر تیرا بے شمار
ہوں مصائب راہ میں یا راحت و آرام ہو
بس ترا ہی شکر ہو دورِ خزاں ہو یا بہار
فضل کے سائے میں اپنے ہم کو رکھنا تو سدا
التجاء یہ ہے مری سن لے خدا میری پکار
(امۃ الحئی تحسین۔قادیان)
