چاند سورج اور زمیں میں فاصلے رکھتا ہے کون
کہکشاں میں کہکشاں کے سلسلے رکھتا ہے کون
حسن والے کس کی شہہ پر ناز کرتے ہیں یہاں
عاشقوں کے بستروں پر رتجگے رکھتا ہے کون
کون کہتا ہے کہ آؤ کامیابی کی طرف
ہر کسی کے واسطے یوں در کھلے رکھتا ہے کون
آسماں پر چاند سورج اور زمیں پر تیرا حسن
آئینے کے روبرو یہ آئینے رکھتا ہے کون
کون ہے جو کاٹتا ہے ظالموں کی شاہ رگ
غمزدوں کی چوکھٹوں پر قہقہے رکھتا ہے کون
باپ سے یہ کون کہتا ہے کہ بن جا سائباں
ماں کے دل میں شیر جیسے حوصلے رکھتا ہے کون
اک نگہہ سے کون کر دیتا ہے ذرے کو گہر
میرے مرشد کی دعا میں معجزے رکھتا ہے کون
کون کہتا ہے مبارک آج یہ لکھ دے غزل
خوبصورت شاعروں سے رابطے رکھتا ہے کون
(مبارک صدیقی۔لندن)
