آؤ اپنے عہد کے مامور کی باتیں کریں
وادی ایمن میں بیٹھیں طور کی باتیں کریں
اک جہاں ہے ظلمت چاہ ضلالت میں اسیر
نار سے اس کو نکالیں نور کی باتیں کریں
ہر غلط فہمی کو ان کی دور کرنے کے لئے
مهدی موعود کے منشور کی باتیں کریں
خون باطل کا نہ ہو اعلائے حق کی راہ میں
دار پر بھی حضرت منصور کی باتیں کریں
وہ جو تھا دستور دیں خیر القروں کے دور میں
عہد حاضر میں اسی دستور کی باتیں کریں
گر چہ ہے سیل حوادث راہزن تسکین دل
غم سے گزریں حضرت مسرور کی باتیں کریں
اک نگاہ لطف کی ہے آرزو خاکی مجھے
آپ ان سے طالب مہجور کی باتیں کریں
نوٹ:۔ منصور اور مسرور حضرت مسیح موعودعلیہ السلام کے الہامی نام ہیں۔
(عبدالرحمان خاکی مرحوم)
(ماہنامہ خالد جنوری ۱۹۹۵ء)
