حضرت عمرؓ سے روایت ہے کہ مَیں نے آنحضرتؐ کو فرماتے ہوئے سنا کہ مَیں نے اپنے بعد صحابہ کے اختلاف کے بارہ میں اللہ تعالیٰ سے سوال کیا تو اللہ تعالیٰ نے میری طرف وحی کی کہ اے محمدؐ! تیرے صحابہ کا میرے نزدیک ایسا مرتبہ ہے جیسے آسمان میں ستارے ہیں۔ بعض بعض سے روشن تر ہیں۔ لیکن نور ہر ایک میں موجود ہے۔ پس جس نے اختلاف کے وقت تیرے کسی صحابی کی ایک بات میں بھی پیروی کی تو میرے نزدیک وہ ہدایت یافتہ ہو گا۔ حضرت عمر (رضی اللہ تعالیٰ عنہ) نے یہ بھی کہا کہ حضور (صلی اللہ علیہ وسلم) نے فرمایا کہ میرے صحابہ ستاروں کی طرح ہیں ان میں سے جس کی بھی تم اقتداء کرو گے ہدایت پا جاؤ گے۔
(مشکوٰۃ کتاب المناقب باب مناقب الصحابہ الفصل الثالث حدیث نمبر 6018)
