مرے من کا دیا جاناں
بجھا جائے، جلا جاناں
ہے دل میں تُو، کہوں میں کیوں
کہاں ہے تو کجا جاناں
کوئی تجھ بن رواداری
نہیں مجھ کو روا جاناں
زمانے کے ستم ہم کو
کریں گے کیا جدا جاناں
نہ نورِ مہ تری ضَو سا
نہ خاور کی ضیا جاناں
بہت ڈھونڈا نہیں پایا
ہو تجھ سا باوفا جاناں
ہر اک ذرّہ مرا انگ انگ
تری بخشش، عطا جاناں
سراپا درگزر ہے تُو
مجسّم میں خطا جاناں
مدام اُس پر میں ہوں راضی
تری جو بھی رضا جاناں
دے کیوں دستک کسی در پر
ترے در کا گدا جاناں
ضرور اک دن سنے گا تُو
مری آہ و بُکا جاناں
تجھے چوموں لپٹ جاؤں
پہ آڑے ہے حیا جاناں
تمنّا ہے میں کہلاؤں
ترا عاشق ترا جاناں
ترے پا پر مرا سر ہو
اور آ جائے قضا جاناں
(م م محمود)
