• 29 فروری, 2024

تم اس کا گھر گراتے ہو خدا تم کو گرا دے گا

نہ پہلے اس نے چھوڑا ہے نہ آئندہ وہ چھوڑے گا
ہمیں خود پیار سے وہ دامنِ رحمت میں بھر لے گا

خدا کا گھر کسی بھی نام سے ہو اس کی حرمت ہے
تم اس کا گھر گراتے ہو خدا تم کو گرا دے گا

وہ قادر ہے توانا ہے اسے ہر شے پہ قدرت ہے
وہ لشکر ہاتھیوں کا بے طرح پامال کردے گا

دکھادے گا مسیحا کی صداقت ساری دنیا کو
کوئی بولے نہ بولے وہ خدا مالک ہے بولے گا

گزر کے امتحانوں سے ہی اگلا درجہ ملتا ہے
ہمیں منزل بہ منزل قرب کی راہوں پہ ڈالے گا

لگا دیتے ہو فتوی کفر کا اللہ والوں پر
وہ دھیما ہے مگر اس ظلم کی تم کو سزا دے گا

خدا کی ڈھیل پر اترانے والو! کچھ سنبھل جاؤ
کبھی گستاخ لوگوں کو نہ بخشا ہے نہ بخشے گا

خدا کا فعل شاہد ہے بھلا کس کی صداقت پر؟
ذرا اس بات پر بھی ٹھنڈے دل سے غور کیجے گا

(امۃ الباری ناصر۔ امریکہ)

پچھلا پڑھیں

ایک سبق آموز بات (کتاب)

اگلا پڑھیں

ارشاد باری تعالیٰ