مجلس انصاراللہ کے سالِ نو کے آغاز پر مؤرخہ 2جنوری 2022ء کو مجلس انصاراللہ ناروے نے امسال نئے شامل ہونے والے انصار اور سابق صدر مجلس انصاراللہ ناروے و دیگر عہدہ داران کے اعزاز میں ایک پروقار تقریب کا انعقاد کیا۔
یہ تقریب نماز مغرب و عشاء کی ادائیگی کے بعد بیت النصر اوسلوکے مسرور ہال میں ہوئی۔ تقریب کا آغاز تلاوت قرآن کریم سے ہوا۔ رانامبشر محمود صاحب نے سورۃ الاحقاف کی آیات 16 اور 17 کی تلاوت کی جس میں اللہ تعالیٰ نے انسان کو چالیس سال کی عمر میں پہنچنے کو ایک پختہ عمر قرار دیتے ہوئے اللہ تعالیٰ کی نعماء کا شکر ادا کرنے اور اپنی اور اپنی اولاد کی اصلاح کی طرف توجہ دلائی ہے۔ اس کے بعد محترم صدر مجلس انصاراللہ ناروے ڈاکٹر احمد رضوان صادق صاحب نے انہیں آیات کی تفسیر حضرت مسیح موعودؑ کے ارشادات کی روشنی میں بیان کی۔ پھر تمام مہمانوں کو خوش آمدید کہتے ہوئےتوجہ دلائی کہ عمر کے اس حصہ میں پہنچ کر انسان کی سوچوں،اور اخلاق میں پختگی کے ساتھ پاک روحانی تبدیلی بھی آنی چاہیئے۔آپ نے کہا کہ اگر انصار سال نو کے آغاز پر ایک ارادہ کے ساتھ اپنی اخلاقی حالت کو مزید بہتر بنانے کی شروعات کر دیں مثلاً اپنی کسی ایک کمزوری کو دور کرنے کا تہیہ کرکے اس پر کوشش کرنا شروع کردیں اور اسی طرح ایک نئی نیکی جاری کرنے کا تہیہ بھی کر لیں تو کچھ ہی عرصہ میں آپکی شخصیت میں ایک انقلاب آ سکتا ہے۔ مثلا! اگر کوئی ناصر صرف یہ عہد کرے کہ میں اس سال اپنے غصہ پرکنٹرول کرنے کی کوشش کرونگا۔ اور ہر وقت اس پر کوشش کرتا رہے۔ اور اسکے ساتھ ساتھ ایک نیکی مثلاً باقاعدگی سے تہجد ادا کرنے کا تہیہ کرلے تو بہت سی برائیوں سے بچنے اور نیکیاں کمانے کو موجب ہو گا۔
اسکے بعد مجلس انصاراللہ کا مختصر تعارف پیش کرتے ہوئے مجلس کے قیام کے اغراض و مقاصد میں سے ایک نہایت اہم مقصد سے متعلق بتایا کہ سب سے بڑی اور اہم ذمہ داری انصار پر اپنی تربیت،اور تربیت اولاد ہے۔ پھر امسال نئے شامل ہونے والے 17 انصار کو خوش آمدید کہتے ہوئے محترم صدر مجلس نے ان کاتعارف کرایا۔ محترم صدر مجلس حضور ایدہ اللہ تعالیٰ بنصرہ العزیز سے منظور کردہ مجلس عاملہ انصاراللہ ناروے کے اراکین کو کھڑا کر کے فرداً فرداً تمام عہدیداران کا تعارف بھی پیش کیا۔ اور محترم صدر صاحب انصاراللہ ناروے ڈاکٹر احمد رضوان صادق صاحب نے سابق صدر انصاراللہ محترم رانا نعیم احمد خان صاحب اور اُنکی عاملہ کی خدمات کو سراہتے ہوئے اُن کا شکریہ ادا کیا اور ان کو پھول بھی پیش کیے۔
آپ نے اپنی گذارشات کا اختتام حضرت مصلح موعود ؓ کے اس شعر پر کیا۔
میری تو حق میں تمہارے یہ دعا ہے پیارو
سر پہ اللہ کا سایہ رہے، ناکام نہ ہو
سابق صدر مجلس انصاراللہ ناروے محترم رانا نعیم احمد خان صاحب نے بھی تمام انصار، اور اپنی مجلس عاملہ اور زعما ءکا شکریہ ادا کیا کہ تمام احباب نے انکے ساتھ بھر پور تعاون کیا اور ہر موقع پر انصار نے تعاون کیا اور نیز محترم نیشنل امیر صاحب جماعت احمدیہ ناروے ظہور چوہدری صاحب اور مشنری انچارج ناروے چوہدری شاہد محمود کاہلوں صاحب نے بھی ہر موقع پر رہنمائی فرمائی اور انکا تعاون بھی شامل حال رہا۔ انہوں نے نئے آنے والے صدر مجلس انصاراللہ ناروے محترم ڈاکٹر احمد رضوان صادق صاحب اور انکی مجلس عاملہ اور زعماء کیلئے نیک خواہشات کا اظہار کیا۔
پروگرام کے اختتام پر مشنری انچارج و نائب امیر محترم چوہدری شاہد محمود کاہلوں صاحب نے دعا کرائی۔ آخر میں کھانا پیش کیا گیا۔
(رپورٹ: رانامبشر محمود۔ قائد عمومی مجلس انصاراللہ ناروے)
