ہر طرف دشتِ بے اماں سے دُھواں

ہر طرف دشتِ بے اماں سے دُھواں
اُٹھ رہا ہے یہاں وہاں سے دُھواں

راکھ بکھری پڑی ہے گلیوں میں
اور اُٹھتا ہے ہر مکاں سے دھواں

لُٹ گیا ہے وطن میں امن و سکوں
اور اِدھر رنجِ رائیگاں سے دھواں

رہبروں کا اُصول کذب و ریا
خلقتِ شہر کی زُباں سے دھواں

سب سُلگتے ہیں منبر و محراب
واعظوں کے ہر اک بیاں سے دھواں

بے یقیں ہو گئی ہے خلقِ خُدا
ہر طرف چھا گیا گُماں سے دھواں

جل رہی ہے زمین پاؤں تلے
اور نکلتا ہے سائباں سے دھواں

حاکمِ وقت! دیکھ اُٹھتا ہے
یہ ترے سنگِ آستاں سے دھواں

بھر گیا ہے دلِ حزیں میں مرے
غمِ جاناں غمِ جہاں سے دھواں

(ڈاکٹر فضل الرحمن)