حسین ایسا کہ سب حسینوں سے بالاتر ہے

یہ وہ زمیں ہے جو سب زمینوں سے بالاتر ہے
کہ اس کو حاصل نگیں، نگینوں سے بالا تر ہے

زبان ایسی کہ شہد جس سے مٹھاس مانگے
حسین ایسا کہ سب حسینوں سے بالاتر ہے

ہے اس میں عشقِ محمدیؐ کا چراغ روشن
ہمارا سینہ تمہارے سینوں سے بالاتر ہے

جسے قرینہ ہے نعت کہنے کا، معتبر ہے
کہ یہ قرینہ سبھی قرینوں سے بالاتر ہے

خدا کی نصرت بجز اطاعت نہ ہو گی ممکن
یہ پہلا زینہ تمام زینوں سے بالاتر ہے

(جواد جاذل)