قرآن کریم خوش الحانی سے پڑھنا اور سننا
حضرت مسیح موعودؑ سیر کے واسطے تشریف لے گئے خدام ساتھ تھے۔ حافظ محبوب الرحمٰن صاحب جو کہ اخویم منشی حبیب الرحمٰن صاحب رئیس حاجی پورہ اور بھائی جان منشی ظفر احمد صاحب کے عزیزوں میں سے ہیں ساتھ تھے۔ حضرت نے حافظ صاحب کی طرف اشارہ کر کے فر مایا کہ:
’’یہ قرآن شریف اچھا پڑھتے ہیں اور میں نے اسی واسطے ان کو یہاں رکھ لیا ہے کہ ہر روز ان سے قرآن شریف سنا کریں گے۔ مجھے بہت شوق ہے کہ کوئی شخص عمدہ صحیح خوش الحانی سے قر آن شریف پڑھنے والا ہو تو اس سے سنا کروں۔‘‘
پھر حافظ صاحب موصوف کو مخاطب کر کے حضرت نے فرمایا کہ:
’’آج آپ سیر میں کچھ سنائیں گے‘‘
چنانچہ تھوڑی دور جا کر آپ نہایت سادگی کے ساتھ ایک کھیت کے کنارے زمین پر بیٹھ گئے اور تمام خدام بھی زمین پر بیٹھ گئے اور حافظ صاحب نے نہایت خوش الہانی سے سورہ دہر پڑھی۔ جس کے بعد آپ سیر کے واسطے آ گے تشریف لے گئے۔
(اخبار بدر نمبر17 جلد6 مئورخہ 25 اپریل 1907ء صفحہ7)
(داؤد احمد عابد۔ استاد جامعہ احمدیہ برطانیہ)
