محض خداتعالیٰ کے فضل و کرم سے امسال مجلس انصاراللہ ناروےاور مجلس خدام الاحمدیہ ناروے کو اپنا سالانہ اجتماع ایک ساتھ مورخہ 13۔14اگست 2022ء کو بیت النصر اوسلو میں منعقد کرنے کی توفیق ملی، الحمدللہ۔ گزشتہ دوسال کرونا کی وبانے جہاں تمام دنیا میں نظام زندگی کو متاثرکیا وہاں جماعتی و تنظیمی پروگرام اور اجتماعات بھی متاثر ہوئے۔ دو سال بعد منعقد ہونے والے اجتماع میں امسال انصار نے تمام پروگراموں میں بڑھ چڑھ کر حصہ لیا اور حاضری بھی ریکارڈ رہی۔الحمدللہ۔ اجتماع کا نصاب اردو اور ناروئجین زبانوں میں تمام انصار کو بذریعہ زعماء مجالس کئی ماہ پہلے بھیج دیا گیا تھا۔ حاضری کے لئے بھی خصوصی یادہانی کروائی جاتی رہی۔
پہلا دن مورخہ 13؍ اگست 2022ء بروز ہفتہ
دن کا آغاز نماز تہجد اور فجر کی نماز سے کیا گیا۔ 09:30بجے رجسٹریشن کے ساتھ ناشتہ اور انصار کے لئے شوگراوربلڈپریشرٹیسٹ کرنے کا انتظام کیا گیا تھا جس سے بہت سے انصار نے استفادہ کیا۔ ڈاکٹر صاحبان نے انصار کو مفید مشوروں سے بھی نوازا۔
تقریب پرچم کشائی
پرچم کشائی کی تقریب مسجدبیت النصر کے گراسی پلاٹ میں منعقد ہوئی۔ مجلس انصاراللہ کا جھنڈامکرم ڈاکٹراحمدرضوان صادق صاحب صدرمجلس انصاراللہ ناروے نے جبکہ نارویجیئن جھنڈا مکرم یونیب سرور صاحب نائب صدرخدام الاحمدیہ ناروے نے بلند کیا۔ اس کے بعد صدرمجلس انصار اللہ ناروے نے اجتماعی دعا کروائی اور نعرہ ہائے تکبیر بلند ہوئے۔
افتتاحی تقریب
مجلس انصاراللہ ناروے اور مجلس خدام الاحمدیہ ناروے کے اجتماع کی مشترکہ افتتاحی تقریب زیرصدارت مکرم چوہدری شاہد محمود کاہلوں صاحب نائب امیرومشنری انچارج ناروے ہوئی۔ پروگرام کا آغاز تلاوت قرآن پاک سے ہوا۔ مکرم عطاء الودود صاحب نے سورۃ احزاب آیت 41تا58 کی تلاوت پیش کی جبکہ اُردو ترجمہ عزیزم راحیل احمد ناصر صاحب نےپڑھا۔ اس کے بعدتمام حاضرین نے کھڑے ہوکر صدر مجلس انصار اللہ مکرم احمد رضوان صادق صاحب کے ساتھ عہددہرایا۔ کلام محمود سے نظم
بڑھتی رہے خدا کی محبت خدا کرے
حاصل ہو تم کو دید کی لذت خدا کرے
مکرم ومحترم عبدالمنعم ناصرصاحب نے خوش الحانی سے پیش کی۔
افتتاحی خطاب میں مکرم چوہدری شاہد محمود کاہلوں صاحب نے بتایا کہ آج اللہ تعالیٰ کے فضل واحسان کے ساتھ مجلس انصار اللہ ناروے 34واں جبکہ مجلس خدام الاحمدیہ ناروے 41واں اجتماع منعقد کرنے کی توفیق پارہی ہے۔یہ اجتماعات ہماری تربیت کا ذریعہ ہوتے ہیں۔جیسا کہ حضرت مصلح موعود ؓ نے بھی مجالس کے قیام کی غرض تربیت ہی بیان کی ہے۔ اس کے بعد آپ نے بتایا کہ اسلام کی بنیاد تقویٰ پر ہے۔ حضرت مسیح موعود علیہ السلام نے فرمایا:
ہر نیکی کی جڑیہ اتقاء ہے
اگر یہ جڑ رہی سب کچھ رہاہے
آپ نے تقویٰ پیداکرنے کی کوشش اور اس میں بڑھنے کی تلقین کی۔ اس کے علاوہ بنیادی اسلامی عقائد کا ذکر کیا۔باجماعت نماز کے قیام کے ساتھ تلاوت قرآن کریم اور قرآن حفظ کرنے کی طرف توجہ دلائی۔ اور بتایا کہ اگر ہم ان اُمورکی حفاظت کرلیں تو پھر ہم اپنے بچوں کی اچھی تربیت کرسکتے ہیں۔اللہ تعالیٰ ہمیں اس کی توفیق دے۔ آمین
آخر پر مکرم چوہدری شاہد محمودکاہلوں نائب امیرومشنری انچارج نے دعا کروائی۔
دعا کے بعد مکرم ڈاکٹر صفدرصاحب قائدتربیت انصاراللہ نے مقابلہ جات کے سلسلہ میں ضروری عمومی ہدایات دیں۔ اسی طرح مکرم طاہرمحمود صاحب قائد صحت وجسمانی نے ورزشی مقابلہ جات کے بارہ میں ہدایات دیں۔ جس کے بعد مقابلہ جات شروع ہوئے۔
ورزشی مقابلہ جات
ورزشی مقابلہ جات کے لئے تمام انصارمسجد بیت النصر کے قریب ہی میدان میں جمع ہوئے۔موسم اللہ تعالیٰ کے فضل سے بہت ہی خوشگوار تھا۔ان مقابلوں میں گولہ پھینکنا (صفِ اول،دوئم)، 100میٹردوڑ (صفِ اول،دوئم)،400 میٹردوڑ، فٹ بال، رسہ کشی اور میوزیکل چیئر کے مقابلے شامل تھے۔
تمام انصار نے جوش وخروش سے مقابلوں میں حصہ لیا۔ اور ایک دوسرے کی حوصلہ افزائی بھی کی۔ مقابلوں کی جگہ پر شکنجبین اور پھلوں سے ریفریشمنٹ کا بھی انتظام تھا جسے تمام انصار نے بہت پسند کیا۔ تمام ورزشی مقابلہ جات آج کے دن ہی مکمل ہوئے۔ مقابلوں کے بعد 4بجے نماز ظہر وعصرادا کی گئی جس کے بعد کھاناتقسیم کیا گیا۔
علمی مقابلہ جات
شام 5بجے علمی مقابلہ جات کا آغاز تلاوت قرآن کریم سے ہوا۔ آج کے علمی مقابلوں میں تلاوت قرآن پاک،حفظ قرآن کریم،نظم اور دینی معلومات کا پرچہ شامل تھے۔یہ مقابلے تقریبا 07:30بجے شام ختم ہوئے۔ آخر میں تمام حاضرین کی خدمت میں کھانا پیش کیا گیا۔
دوسرا دن مورخہ 14اگست 2022ء بروزاتوار
آج بھی صبح نماز تہجد کا اہتمام کیا گیا۔ آج کے پروگرام کی باقاعدہ کاروائی سے پہلے ناشتہ کا بھی انتظام کیا گیا۔ جس میں روایتی ناشتے کے علاوہ نہایت لذیذ پائے بھی پیش کئے گئے جسے انصار نے بہت پسند کیا۔گذشتہ روز کی طرح آج بھی بلڈ پریشر اور شوگرٹیسٹ کی سہولت دی گئی تھی جس سے انصار نے بھرپور فائدہ اٹھایا۔
دوسرا اجلاس
پروگرام کے مطابق 10:45بجے دوسرے دن کا باقاعدہ آغاز زیرصدارت مکرم احمدرضوان صادق صاحب صدرمجلس انصار اللہ ناروے ہوا۔ مکرم صداقت احمد بشارت صاحب نے سورۃ جمعہ کی تلاوت اور ترجمہ پیش کیا۔ جبکہ نظم مکرم راناطاہرمحمودصاحب نے کلام محمود سے پڑھی۔
ہو فضل تیرا یارب
یا کوئی ابتلاء ہو
راضی ہیں ہم اُسی میں
جس میں تیری رضاہو
مکرم احمدرضوان صادق صاحب صدرمجلس انصار اللہ ناروے نے اپنے خطاب میں حضرت مسیح موعود علیہ السلام کی کتاب اسلامی اصول کی فلاسفی سے استفادہ کرتے ہوئے سادہ الفاظ میں انسان کی طبعی، اخلاقی اور روحانی حالتوں، جنہیں قرآن کریم نے نفس امارہ، نفس لوامہ اور نفس مطمئنہ کی حالتیں کہا ہے، کا تفصیل سے ذکرکیا۔ نیز ان ذرائع کا بھی ذکر کیا جن سے ہم اپنی حالتوں کو بہتر بناسکتے ہیں۔ اور بتایا کہ حضرت مسیح موعود علیہ السلام نے فرمایا ہے کہ اپنی روحانی حالت کو بہتر بنانے اور لقاء الٰہی کے لئے سلام اور دعاء فاتحہ ہی بہترین ذرائع ہیں۔ اس کے علاوہ صدر صاحب نے مل کر حافظ قرآن بننے کی طرف توجہ دلائی۔ جس میں ساٹھ انصار آدھ آدھ پارہ حفظ کرکے پورے قرآن کے حافظ بن سکتے ہیں۔ انصار کو آدھ سپارہ حفظ کرنے کے لئے دو سال کا ٹارگٹ دیا گیا۔ آخر میں صدر مجلس نے تمام شاملین اور کارکنان کا شکریہ ادا کیا۔
علمی مقابلہ جات
آج کے مقابلوں میں تقریر، فی البدیہہ تقریر،کوئز ازکتاب دیباچہ تفسیر القرآن و عام سوالات اور بیت بازی شامل تھے۔یہ تمام مقابلے بہت دلچسپ رہے۔اور ان مقابلوں میں انصار نے بڑھ چڑھ کر حصہ لیا۔ 3بجے نماز ظہر وعصر ادا کی گئی اور کھانا تقسیم ہوا۔
اختتامی تقریب وتقسیم انعامات
4بجے مشترکہ اختتامی تقریب زیرصدارت مکرم چوہدری ظہور احمد صاحب نیشنل امیرناروے ہوئی۔ مکرم صداقت احمد بشارت صاحب نے سورة جمعہ آیت 1تا5کی تلاوت مع ترجمہ پیش کی۔مکرم احمد رضوان صادق صاحب صدر مجلس انصار اللہ ناروے نے عہددہرایا۔ زین محمود صاحب نے درثمین سے کلام
نورفرقان ہے جوسب نوروں سے اجلا نکلا
پاک وہ جس سےیہ انوار کا دریانکلا
خوش الحانی سے پڑھا۔
اس کے بعد مکرم چوہدری ظہور احمد منیرصاحب نیشنل امیرناروےنے مقابلے جیتنے والے خدام و انصار میں انعامات تقسیم کئے۔اور حاضرین سے خطاب فرمایا۔ آپ نے اجتماع کا مقصد تقوی میں ترقی کرنا بتایا۔اور بتایا کہ قرآن پاک کے شروع میں اللہ تعالیٰ نے ہمیں بتا دیا کہ یہی وہ کتاب ہدایت جس میں کوئی شک نہیں۔اس سلسلہ میں آپ نے احادیث اور اقتباسات حضرت مسیح موعود علیہ السلام پیش فرمائے۔آخرمیں دعا کروائی اور یہ اجتماع اختتام پذیر ہوا۔
اللہ تعالیٰ کے فضل سے اجتماع کے تمام پروگرام بخوبی انجام پائےاور انصار کی حاضری 115رہی۔ الحمد للّٰہ
(عامر حسین خالد محمود۔ ناروے)
