تم ہو رہبر تو پھر مجھے کیا غم

تجھ سے کچھ اِس طرح ہوں وابستہ
روح جیسے بدن میں پیوستہ
دام پھیلا رکھے ہیں کیوں اتنے
طائرِ دل تو آپ ہے پھنستا
پیار کی اک نظر مری قیمت
دیکھ! مَیں کس قدر ہؤا سستا
زیست کی ڈور ٹوٹ بھی جائے
عشق سے پر نہ ہوں گے وارستہ
مقتلِ حسن کو چلا ہوں مَیں
جاں بکف، مستعد، کمر بستہ
میں نے حق بات کی سرِ محفل
بر محل، بے دریغ، برجستہ
مَیں دوراہے سے تو گزر آیا
اب ہے درپیش مجھ کو چَورستہ
تم ہو رہبر تو پھر مجھے کیا غم
کتنا مشکل ہے عشق کا رستہ!
اِس کو سودائے دشتِ دامن ہے
اشک دل کے نگر نہیں بستا
ہے نشاطِ غمِ وفا بھی عجیب
دل کبھی روتا ہے، کبھی ہنستا
چشمِ گلباز زخم زخم ہوئی
جب سجا اشک اشک گلدستہ
کتنی راتوں کو پائمال کِیا
تب کھلا رازِ عشق سربستہ

(میر انجم پرویز)
(جون 1999ء۔ ربوہ)