ہر ایک دل ہے دُکھی جان اک عذاب میں ہے

ہر ایک دل ہے دُکھی جان اک عذاب میں ہے
اجل تلاش میں امتحاں نصاب میں ہے

اٹھائے پھرتا ہے ہر کوئی یاں صلیب اپنی
دکھوں کا بوجھ سدا عالم شباب میں ہے

کہانی حضرت انساں کی کیا سناؤں تمہیں
کبھی ثواب میں ہے اور کبھی عذاب میں ہے

یہ کیا طلسم ہے دنیا میں جو بھی آؤے ہے
ہر ایک لمحہ ہر اک سال اک سراب میں ہے

کریں ہیں جان فدا حسن بے مثال پہ جس
ہزار داغ اس ہی حسن ماہ تاب میں ہے

میں خوب جانوں ہوں واعظ کی ہر نصیحت کو
ہر ایک نیکی محض خواہش ثواب میں ہے

عبث ہے شکوہ کوئی آسماں سے مت کیجو
یہاں سکون فقط مستئ شراب میں ہے

ہمارے زخم جگر حسن نو بہار بنے
اگرچہ شوخئ رنگ پتئی گلاب میں ہے

چہار سمت نئی ابتلاؤں کا گھیرا
کوئی علاج بھی اسکا تیری کتاب میں ہے

پلک جھپکتے بدلتا ہے زیست کا منظر
یہ ہی تو ایک سبق ہستئ حباب میں ہے

تمام نامے میرے نامہ بر نے کھول لیے
رقیب کس لیے کس کار کے عتاب میں ہے

کبھی نہ بھول کے خود آپ ہم کو یاد کیے
یہی تو ایک فرق ہم میں اور جناب میں ہے

کبھی تو آپ بھی ملنے کو آئیے صاحب
غریب خانہ بھی دولت کدے کے ساتھ میں ہے

خوشا نصیب کسی نے ہے ہم کو یاد کیا
خوشی سے جشن طرب روح اضطراب میں ہے

کہا تھا تم نے کبھی حال دل سنایا کرو
سو آج ساری غزل آپ کے حساب میں ہے

(محمد امجد خان۔ آسٹریلیا)