یہ وہ ہی صحن ہے جس میں نمازِ عید پڑھنی تھی
مگر اب خوں میں لت پت مسکنِ آہ وبکا ہو کر
یہ وہ ہی ہاتھ ہےجس پر حنا میں نے رچانی تھی
وہی اب خون سے رنگین ہے تن سے جدا ہو کر
مرا بازو کہاں ہے ماں؟ جسے پھولوں کے گجروں سے
بڑے ہی شوق سے اور ناز سے میں نے سجانا تھا
مرے پاؤں کہاں ہیں جن پہ چل کر کتنے چاؤ سے
مجھے بھی عید پڑھنے کے لیے مسجد میں جانا تھا
چلو چھوڑو! یہ سب کچھ ہی، مجھے بس یہ تو بتلا دو
مرے بابا کہاں ہیں ماں؟ ابھی تو تھے یہیں بیٹھے
ابھی شیرینی لینے کے لیے بازار جاتے تھے
ذرا بھیجو نا بھائی کو، کہ وہ جا کر پتہ کرلے
نہیں رک جاؤ، ڈرتی ہوں کہیں ایسا نہ ہوجائے
کہ میرا بھائی میرے بابا کی مانند کھوجائے
نجانے آج ہی کیونکر یہ آتش بازی کرتے ہیں
ابھی تو عید میں کچھ دن ہیں، گولے کیوں برستے ہیں؟
سنا تھا عید کی رنگینیوں میں سب ہی ہنستے ہیں
مگر کیوں ہر طرف سے سسکیوں کا شور برپا ہے؟
نجانے کون ظالم ہے جو بچوں کو ڈراتا ہے
مجھے انساں نہیں لگتا جو ماؤوں کو رلاتا ہے
زمینی اِن خداؤں کو ذرا جاؤ، یہ بتلاؤ
تمہارا کیا بنے گا جب مدد اللہ کی آئے گی؟
تمہاری چھین لی جائیگی چھت، تو کیا کروگے تم؟
تمہارے ہاتھ اور بازو کٹیں گے کیا کرو گے تب؟
رکو! تم کو بتاتی ہوں کہ اب انجام کیا ہوگا
تم اپنی ظلم کی پاداش میں جلتے رہوگے سب
سہارا تم نہ پاؤگے میں جب رو کر یہ پوچھوں گی
نہ جس میں باپ کا سایہ، نہ جس میں پیار کی ٹھنڈک
یہ کیسی عید ہے یاربّ؟
(سدرۃ المنتہیٰ۔ کینیڈا)
