دوسروں کے گھر میں جاتے وقت اس بات کا خیال رکھنا ضروری ہے کہ دروازہ کھٹکھٹانے یابیل بجانے پر اگر اہل خانہ کی طرف سے پوچھا جائے کہ، کون ہے؟ تو اپنا نام لے کر بتایا جائے۔ یہ سنت رسول ہے حدیث شریف میں آیا ہے حضرت جابرؓ بیان کرتے ہیں کہ آپ ﷺ کی خدمت میں حاضر ہوئے دروازہ کھٹکھٹایا، حضورﷺ نے فرمایا کون ہے؟ حضرت جابرؓ نے فرمایا، میں، اسپر آپ ﷺ نے اسکو ناپسند کیا اور یہ چاہا کہ نام لیا جائے۔ چنانچہ پھر بعد میں صحابہؓ نام لے کر اجازت لیا کرتے تھے۔ (بخاری) یہ بظاہر چھوٹی سی بات گھروں میں داخل ہونے والے اسلامی آداب میں سے ایک حکمت اور دانائی لیے ہوئے ہےکہ اہل خانہ صورت حال کے مطابق آنے والے کے لیے دروازہ کھولے بات کرے یا اندر آنے کی اجازت دے۔ آجکل تو فون پر ہی پہلے سے آنے کے وقت کی اطلاع دے دی جاتی ہے مگر اگر اچانک جانا پڑ جائے تو اس اسوہ رسول پر عمل کر کے اپنی ملاقات کو خوشگوار بنایا جا سکتا ہے۔
(مرسلہ:ناصرہ احمد۔کینیڈا)
