محض اللہ تعالی کے فضل سے 27 نومبر 2020 بروز جمعۃالمبارک بیت اللطیف کے افتتاح کی تقریب ہوئی۔بیت اللطیف ریجن امبور کے ایک گاؤں گیچیم میں تعمیر کی گئی ہے۔اس گاؤں کے امام محترم عیسٰی انجائے صاحب نے چند سال قبل بیعت کی اور جماعت احمدیہ حقہ اسلامیہ میں داخل ہوئے۔ اس وقت گاؤں میں ایک کچی اور بالکل چھوٹی سی مسجد تھی۔مسجد کیا ایک چھوٹا سا کمرہ تھا لیکن جب انہوں نے بیعت کی تو بہت مخالفت ہوئی یہاں تک کہ ہمارے معلم اور عیسٰی انجائے صاحب اپنے ہی گھر میں نمازیں ادا کرنے لگے اور جمعہ بھی وہیں پڑھتے تھے اور اہل گاؤں کی طرف سے شدید مخالفت کا سامنا کرنا پڑا۔
شروع میں تو یہ اور معلم صاحب ہی تھے پھر اس گاؤں کے مؤذن محترم داودا صاحب بھی ساتھ شامل ہو گئے اور انہوں نے بیعت کر لی۔اور دو احباب کے ساتھ جمعہ ہوتا رہا۔
آج یہ وقت بھی آیا ہے کہ سوائے تین گھروں کے جوکہ کسی اور جگہ سے آکر یہاں آباد ہوئے ہیں سارا گاؤں اللہ کےفضل سےاحمدی ہے الحمدللہ۔محترم عیسٰی انجائےصاحب تو اب اس دنیا میں نہیں رہے، گزشتہ سال وفات پاگئے تھے انہوں نے ایک ایکڑ زمین جماعت کے نام برائے مسجداپنی زندگی میں کردی تھی۔ ان کے بیٹے مکرم عثمان انجائے صاحب اب قائد مجلس ہیں اللہ تعالیٰ ان کو اپنے والد صاحب کے نقش قدم پر چلنے کی توفیق عطا کرے۔مسجد بیت اللطیف مکمل طور پر اپنی مدد آپ کے تحت بنائی گئی ہے اور اس خوبصورت مسجد کی تعمیر میں لجنہ اماء اللہ نے نمایاں کام سر انجام دیا ۔پانی لانے کا کام تعمیر کے لئےمکمل طور پر لجنہ اماء اللہ نے کیا اور اسی طرح خدام اور اطفال نے بھی بھر پوروقارعمل کیا۔مسجد کی تعمیر تین ماہ کے عرصہ میں مکمل ہوئی۔ مسجد میں 150 افراد کےنماز پڑھنے کی گنجائش موجود ہے۔مسجد میں بجلی بھی پہنچائی گئی اور لاؤڈ اسپیکر کا بھی انتظام ہے ۔الحمد للہ علی ذلک
اسی طرح پانی کا انتظام بھی ہےاور وضوکرنے کے لیے مزید ٹوٹیاں لگائی جارہی ہیں۔جب یہ مسجد مکمل ہوئی تو حضور پرنور کی خدمت اقدس میں نام کے لیے لکھا گیا۔حضور نے ازراہ شفقت اس مسجد کا نام بیت اللطیف عطا فرمایا۔ افتتاح کے موقع پر حاضری 332 رہی۔لجنہ نے کھانا تیار کیا اور سارے حاضرین کی خدمت میں پیش کیا گیا ۔ اس تقریب میں آٹھ گاؤں کے امام اور چیف شریک ہوئے ۔محترم امیر صاحب نے افتتاح کے موقع پر مسجد کی اہمیت پر روشنی ڈالی اور دعا کی کہ اللہ تعالی اس مسجد کو ہمیشہ نمازیوں سے بھرا رکھے اور بتایا کہ مسجد کی اصل رونق اورخوبصورتی تو مسجد کے آباد ہونے میں ہے۔ الحمدللہ یہ پروگرام بہت اچھا رہا اور سب گاؤں کے لوگ بہت خوش تھے۔صدر جماعت مکرم داؤدا صاحب اور خاکسار نے امیر صاحب اور ان کے وفد کا شکریہ ادا کیا جو کہ ڈاکار سے آئے تھے اور دعا کے ساتھ اس تقریب کا اختتام ہوا۔
(رپورٹ: ظفر اقبال ساہی)
