دل حزیں ہے آج تجھ کو چھوڑ کر جاتے ہیں ہم
تجھ سے وہ رشتہ پرُانا توڑ کر جاتے ہیں ہم
یاد ہے اک ایک لمحہ جو گزارا تھا یہاں
کیا ہی اچھا وقت تھا گزرا جو تیرے درمیاں
بے ہنر تھا ناسمجھ تھا جبکہ یاں آیا تھا میں
ہاں مگر اخلاص سے بھر پور دل لایا تھا میں
علم کی دولت سے دامن تو نے میرا بھر دیا
وَاقفِ اسرارِ عالم تو نے مجھ کو کردیا
ہیں سبھی تعریف کے قابل اساتذہ کرام
جِن کے ہاتھوں نے پلائے اُلفتِ احمد کے جام
رفعتیں جن کی ثریا سے فزوں تر ہو گئیں
ہر قدم پر جن کی باتیں میری رہبر ہو گئیں
کیا کریں مجبور ہیں اب چھوڑ کر جاتے ہیں ہم
تجھ سے وہ رشتہ پرانا توڑ کر جاتے ہیں ہم
مجھ سے بڑھ کر آئیں گے، طُلاّب بے شک آئیں گے
علم سے بھر کر وہ دامن اپنا واپس جائیں گے
شمسّ بے ماید خدا سے کرتا ہے یہ التجا
اپنی رحمت سے تجھے آباد رکھے وہ سدا
تجھ پہ ہو بارش خدا کے فضل کی لیل و نہار
رحمت مولیٰ رہے تجھ پر سدا لیل و نہار
(ڈاکٹر محمد جلال شمس ۔ لندن)
