ظہورِ نورِ حق کامل ہوا ہے
منور ذرہ ذرہ ہو گیا ہے
وجودِ آدمیت کا تو باعث
ترے دم سے زمانہ جی رہا ہے
ملائک نے جو آدم کو کیا تھا
حقیقت میں تجھے سجدہ ہوا ہے
کہیں یاسین کہیں طٰہٰ ترا نام
کہیں حبلِ خدا تیری ثنا ہے
تو تاجِ مرسلیں، طیب، امیں ہے
تو ہی بدرالدجیٰ، شمس الضحیٰ ہے
ملائک اور جواہر میں نہیں ہے
جو نورِ حق تِرے دل میں بھرا ہے
جبیں انسانیت کی تجھ سے روشن
سبھی داغوں کو تو نے دھو دیا ہے
خدا نے جس قدر جلوے اتارے
تو سب جلووں کا مجمع بن گیا ہے
ترِے ہاتھوں میں روشن شمعِ دیں ہے
تو ہی دنیا کی آنکھوں کی ضیا ہے
ہر اک تو نے بتایا رازِ فطرت
معارف کا دفینہ تجھ سے وا ہے
مہ و خورشید کو کرتا ہے حیراں
وہ دل یادوں سے تیری جو بھرا ہے
( مقبول احمد ظفر مرحوم۔مربی سلسلہ)
