مرا مرزا

لاریب کہ ممدوحِ جہاں ہے مرا مرزا
اللہ کی قدرت کا نشاں ہے مرا مرزا

نام اس کا ہے طاہرؒ تو وہ ہے خود بھی مطہّر
محبوبِ حق و روحِ جہاں ہے مرا مرزا

ربوہ میں وہ رہتا ہے دعاؤں میں ہے مصروف
محو رُخِ دلدار نہاں ہے مرا مرزا

یکتا ہے وہ ہمدردیٔ مخلوقِ خدا میں
تسکینِ دل و راحتِ جاں ہے مرا مرزا

سیرت میں ہے آئینہ تو صورت میں گلِ تر
عکسِ رُخِ خلّاقِ جہاں ہے مرا مرزا

توحید کی جوت اس نے ہر اک دل میں جگائی
اک عاشقِ رب دو جہاں ہے مرا مرزا

ظاہر میں تو بیٹھا ہے وہ ربوہ کی زمیں پر
باطن میں خدا جانے کہاں ہے مرا مرزا

ہوتی ہے سدا بارشِ انوار الٰہی
وہ نور کی بستی ہے جہاں ہے مرا مرزا

لیتا ہوں سلیمؔ اس رُخِ انور کی بلائیں
صد رشکِ حسینانِ جہاں ہے مرا مرزا

(سلیم شاہجہانپوری)
(ماہنامہ تحریک جدید، نومبر1983ء)