کسی کو زعمِ ہشیاری بہت ہے
ہمیں بس یار کی یاری بہت ہے
مسلماں وہ مجھے کہتے ہیں کافر
کہ جن کا دین سرکاری بہت ہے
مجھے اک آہ بھرنی ہے شبِ غم
مجھے بس اتنی تیاری بہت ہے
وہ میرے ساتھ ہے وہ بولتا ہے
مجھے یہ بات ہی پیاری بہت ہے
دروغ و شور و غوغا اس کا پیشہ
ہمیں بس راست گفتاری بہت ہے
اسے اک بار دیکھا پر نہ دیکھا
کہ وہ جلوہ مجھے بھاری بہت ہے
زباں پہ رام اور پہلو میں خنجر
مرے محسن میں فنکاری بہت ہے
مجھے کیا فکر خستہ پیرہن کی
کہ مجھ کو اس کی ستاری بہت ہے
وہ ساز و باز کرتے ہیں عدو سے
وفا بس نام عیاری بہت ہے
ہے دستورِ وطن بالکل نرالا
یہاں دیں پر گرفتاری بہت ہے
مجھے دیتے ہیں غم ہر سو اگرچہ
انہیں دعوائے غم خواری بہت ہے
متانت ڈھونڈ کر لاؤ کہیں سے
یہاں انداز بازاری بہت ہے
کریم ان کو بچھڑنے کی تمنا
ہمیں پاسِ وفاداری بہت ہے
(کریم احمد شریف۔ امریکہ)
