محرم کی اہمیت اور حضرت امام حسین ؓ کا مقام

اللہ تعالیٰ نے قرآن کریم میں ایک سال میں بارہ مہینے رکھے ہیں اور ساتھ ہی ان میں سے چار مہینوں کو حرمت والا قرار دیا ہے۔ چنانچہ اللہ تعالیٰ فرماتا ہے کہ

اِنَّ عِدَّۃَ الشُّہُوۡرِ عِنۡدَ اللّٰہِ اثۡنَا عَشَرَ شَہۡرًا فِیۡ کِتٰبِ اللّٰہِ یَوۡمَ خَلَقَ السَّمٰوٰتِ وَالۡاَرۡضَ مِنۡہَاۤ اَرۡبَعَۃٌ حُرُمٌ ؕ ذٰلِکَ الدِّیۡنُ الۡقَیِّمُ ۬ۙ فَلَا تَظۡلِمُوۡا فِیۡہِنَّ اَنۡفُسَکُمۡ وَقَاتِلُوا الۡمُشۡرِکِیۡنَ کَآفَّۃً کَمَا یُقَاتِلُوۡنَکُمۡ کَآفَّۃً ؕ وَاعۡلَمُوۡۤا اَنَّ اللّٰہَ مَعَ الۡمُتَّقِیۡنَ ﴿۳۶﴾

(التوبہ: 36)

ىقىناً اللہ کے نزدىک جب سے اس نے آسمانوں اور زمىن کو پىدا کىا ہےاللہ کى کتاب مىں مہىنوں کى گنتى بارہ مہىنے ہى ہے اُن مىں سے چار حرمت والے ہىں ىہى قائم رہنے والا اور قائم رکھنے والا دىن ہے پس ان (مہىنوں) کے دوران اپنى جانوں پر ظلم نہ کرنا اور (دوسرے مہىنوں مىں) مشرکوں سے اکٹھے ہو کر لڑائى کرو جس طرح وہ تم سے اکٹھے لڑتے ہىں اور جان لو کہ اللہ متقىوں کے ساتھ ہے۔

نیز فرمایا کیا کہ

یَسۡـَٔلُوۡنَکَ عَنِ الشَّہۡرِ الۡحَرَامِ قِتَالٍ فِیۡہِ ؕ قُلۡ قِتَالٌ فِیۡہِ کَبِیۡرٌ ؕ وَصَدٌّ عَنۡ سَبِیۡلِ اللّٰہِ وَکُفۡرٌۢ بِہٖ وَالۡمَسۡجِدِ الۡحَرَامِ ٭ وَاِخۡرَاجُ اَہۡلِہٖ مِنۡہُ اَکۡبَرُ عِنۡدَ اللّٰہِ ۚ وَالۡفِتۡنَۃُ اَکۡبَرُ مِنَ الۡقَتۡلِ

(البقرہ: 218)

وہ تجھ سے عزت والے مہىنے ىعنى اس مىں قتال کے بارہ مىں سوال کرتے ہىں (ان سے) کہہ دے کہ اس مىں قتال بہت بڑا (گناہ) ہے اور اللہ کى راہ سے روکنا اور اس کا انکار کرنا اور مسجدِ حرام سے روکنا اور ان لوگوں کو وہاں سے نکال دىنا جو اس کے (حقىقى) اہل ہىں خدا کے نزدىک اس سے بھى بڑا (گناہ) ہے اور فتنہ قتل سے بھى بڑھ کر ہے۔

ان حرمت والے مہینوں میں رجب، ذی القعدہ، ذی الحجہ، اور محرم کے مہینے شامل ہیں۔حدیث میں آتا ہے کہ
کہ جاہلیت کے لوگ حج کے مہینوں میں عمرہ نہیں کرتے تھے جب اسلام آیا تو نبی اکرم صلی اللہ علیہ وسلم نے اس کی اجازت دے دی اور فرمایا عمرہ حج میں قیامت تک کے لیے داخل ہو چکا ہے۔ یعنی حج کے مہینوں میں عمرہ کرنے میں کوئی حرج نہیں ہے اور اشہر حج شوال ذی قعدہ اور ذی الحجہ کے دس دن ہیں کسی شخص کے لیے یہ مناسب نہیں کہ وہ حج کے مہینوں کے علاوہ کسی اور مہینے میں حج کا احرام باندھے اور حرمت والے مہینے یہ ہیں۔ رجب، ذی قعدہ، ذی الحجہ اور محرم۔ صحابہ کرام وغیرہم میں سے اکثر اہل علم اسی کے قائل ہیں۔

(جامع الترمذی کتاب الحج باب منہ حدیث نمبر932)

اسلام سے پہلے بھی عرب میں چار مہینوں کو حرمت والے مہینہ قرار دیا جاتا تھا۔ مکہ کے مشرکین کفر و شرک کی حالت میں بھی ان مہینوں کی عظمت و فضیلت کے قائل تھے۔اسلام کے آغاز تک ان مہینوں میں جہاد و قتال بھی منع تھا اور ساتھ ہی ان مہینوں میں عبادات و اتحاد کی خاص فضیلت رکھی گئی تھی اور اب بھی ان مہینوں میں عبادت کی فضیلت برقرار ہے۔ حج سے پہلے ایک مہینہ یعنی ذی القعدہ کو اس لیے حرمت والا قرار دیا گیا تاکہ وہ اس مہینے میں جنگ و جدال سے باز رہیں۔ ذی الحجہ کو اس لیے حرمت والا مہینہ قرار دیا تاکہ وہ مناسک حج ادا کر سکیں اور اس کے بعد ماہ محرم کو اس لیے حرمت والا قرار دیا تاکہ امن و سکون سے اپنے اپنے علاقوں میں لوٹ جائیں اور سال کے درمیان میں ماہ رجب کو اس لیے حرمت والا قرار دیا تاکہ جزیرۃ العرب کے دور دراز کے علاقوں میں سے آکر اگر کوئی عمره کرنا چاہے تو اس سے فارغ ہو کر اپنے وطن بآسانی لوٹ جائے۔

ان تمام مہینوں کی جہاں اپنی اہمیت ہے وہاں محرم کے مہینہ کی خاصیت اپنی جگہ ہے کیونکہ احادیث میں محرم کے بے شمار فضائل بیان کیے گئے ہیں۔ چنانچہ احادیث میں آتا ہے کہ

عن ابي هريرة قال قال رسول اللّٰہؐ افضل الصيام بعد شهر رمضان شهر اللّٰہ المحرم

(سنن ترمذی كتاب الصيام عن رسول اللّٰہؐ باب مَا جَاءَ فِي صَوْمِ الْمُحَرَّمِ)

حضرت ابوہریرہ رضی الله عنہ کہتے ہیں کہ رسول اللہ صلی اللہ علیہ وسلم نے فرمایا ماہ رمضان کے بعد سب سے افضل روزہ اللہ کے مہینےمحرم کا روزہ ہے۔

قال رسول اللّٰه صلى اللّٰه عليه وسلم افضل الصيام بعد رمضان شهر اللّٰه المحرم وافضل الصلاة بعد الفريضة صلاة الليل۔

(صحیح مسلم کتاب الصیام باب فَضْلِ صَوْمِ الْمُحَرَّمِ)

حضرت سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا سب روزوں میں افضل روزے رمضان کے بعد محرم کے روزے ہیں جو اللہ کا مہینہ ہے اور بعد نماز فرض کے تہجد کی نماز ہے۔

حضرت علی رضی الله عنہ کہتے ہیں کہ ایک شخص نے ان سے پوچھاماہ رمضان کے بعد کس مہینے میں روزہ رکھنے کا آپ مجھے حکم دیتے ہیں؟ تو انہوں نے اس سے کہا میں نےاس سلسلے میں سوائے ایک شخص کے کسی کو پوچھتے نہیں سنامیں نے اسے رسول اللہ صلی اللہ علیہ وسلم سے سوال کرتے سنا اور میں آپ کے پاس ہی بیٹھا ہوا تھا۔ اس نے پوچھا اللہ کے رسول ماہ رمضان کے بعد آپ مجھے کس مہینے میں روزہ رکھنے کا حکم دیتے ہیں؟ آپ نے فرمایا اگر ماہ رمضان کے بعد تمہیں روزہ رکھنا ہی ہو تو محرم کا روزہ رکھو وہ اللہ کا مہینہ ہے۔ اس میں ایک دن ایسا ہے جس میں اللہ نے کچھ لوگوں کی توبہ قبول کی اور اس میں دوسرے لوگوں کی توبہ قبول کرے گا۔

(صحیح مسلم کتاب الصیام باب فَضْلِ صَوْمِ الْمُحَرَّمِ)

حضرت ابن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم مدینہ میں تشریف لائے۔ دوسرے سال آپ صلی اللہ علیہ وسلم نے یہودیوں کو دیکھا کہ وہ عاشوراء کے دن (یعنی دس محرم) روزہ رکھتے ہیں۔ آپ صلی اللہ علیہ وسلم نے ان سے اس کا سبب معلوم فرمایا تو انہوں نے بتایا کہ یہ ایک اچھا دن ہے۔ اسی دن اللہ تعالیٰ نے بنی اسرائیل کو ان کے دشمن فرعون سے نجات دلائی تھی۔ اس لیے موسیٰ علیہ السلام نے اس دن کا روزہ رکھا تھا۔ آپ نے فرمایا پھر موسیٰ علیہ السلام کے شریک مسرت ہونے میں ہم تم سے زیادہ مستحق ہیں۔ چنانچہ آپ صلی اللہ علیہ وسلم نے اس دن روزہ رکھا اور صحابہ رضی اللہ عنہم کو بھی اس کا حکم دیا

(صحيح البخاري كِتَاب الصَّوْمِ بَابُ صِيَامِ يَوْمِ عَاشُورَاءَ)

حضرت ابن عباس رضی اللہ عنہما نے بیان کیا کہ میں نے نبی کریم صلی اللہ علیہ وسلم کو سوا عاشوراء کے دن کے اور اس رمضان کے مہینے کے اور کسی دن کو دوسرے دنوں سے افضل جان کر خاص طور سے قصد کر کے روزہ رکھتے نہیں دیکھا۔

(صحيح البخاري كِتَاب الصَّوْمِ بَابُ صِيَامِ يَوْمِ عَاشُورَاءَ)

حضرت سیدہ عائشہ رضی اللہ عنہا نے فرمایا عاشورے کا روزہ جاہلیت میں رکھا جاتا تھا پھر جب اسلام آیا تو اب چاہے کوئی رکھے چاہے چھوڑ دے

(صحيح مسلم كِتَاب الصِّيَام باب صَوْمِ يَوْمِ عَاشُورَاءَ)

حضرت سیدنا عبداللہ بن عباس رضی اللہ عنہما کہتے تھے جب رسول اللہ صلی اللہ علیہ وسلم نے عاشورے کے دن روزہ رکھا تو دوسروں کو بھی روزہ رکھنے کا حکم دیا تو لوگوں نے عرض کی کہ یارسول اللہ! یہ دن تو ایسا ہے کہ اس کی یہود و نصاریٰ تعظیم کرتے ہیں تو آپ صلی اللہ علیہ وسلم نے فرمایا جب اگلا سال آئے گا تو ان شاء اللہ تعالیٰ ہم نویں تاریخ کا روزہ رکھیں گے۔ آخر اگلا سال نہ آنے پایا کہ آپ صلی اللہ علیہ وسلم نے وفات پائی۔

(صحيح مسلم كِتَاب الصِّيَامِ باب أَيُّ يَوْمٍ يُصَامُ فِي عَاشُورَاءَ)

حضرت ابوقتادہ رضی اللہ عنہ نے روایت کی کہ ایک شخص رسول اللہ صلی اللہ علیہ وسلم کے پاس آیا اور عرض کیا کہ آپ روزہ کیونکر رکھتے ہیں؟ اس پر آپ صلی اللہ علیہ وسلم غصہ ہو گئے یعنی اس لیے کہ یہ سوال بے موقع تھا۔ اس کو لازم تھا کہ یوں پوچھتا کہ میں روزہ کیونکر رکھوں پھر جب سیدنا حضرت عمر رضی اللہ عنہ نے آپ صلی اللہ علیہ وسلم کا غصہ دیکھا تو عرض کرنے لگے رَضِينَا بِاللّٰهِ رَبًّا وَبِالإِسْلاَمِ دِينًا وَبِمُحَمَّدٍ نَبِيًّا نَعُوذُ بِاللّٰهِ مِنْ غَضَبِ اللّٰهِ وَغَضَبِ رَسُولِهِم راضی ہوئے اللہ تعالیٰ کے معبود ہونے پر اسلام کے دین ہونے پر اور محمد صلی اللہ علیہ وسلم کے نبی ہونے پر اور پناہ مانگتے ہیں ہم اللہ اور اس کے رسول کے غصہ سے۔ غرض سیدنا حضرت عمر رضی اللہ عنہ بار بار ان کلمات کو کہتے تھے یہاں تک کہ آپ صلی اللہ علیہ وسلم کا غصہ تھم گیا پھر سیدنا حضرت عمر بن خطاب رضی اللہ عنہ نے عرض کی کہ اے اللہ کے رسول! جو ہمیشہ روزہ رکھے وہ کیسا ہے؟ آپ صلی اللہ علیہ وسلم نے فرمایا نہ اس نے روزہ رکھا اور نہ افطار کیا۔ پھر کہا جو دو دن روزہ رکھے اور ایک دن افطار کرے وہ کیسا؟ آپ صلی اللہ علیہ وسلم نے فرمایا ایسی طاقت کس کو ہے۔ یعنی اگر طاقت ہو تو خوب ہے پھر کہا جو ایک دن روزہ رکھے ایک دن افطار کرے؟ آپ صلی اللہ علیہ وسلم نے فرمایا یہ روزہ ہے داؤد علیہ السلام کا پھر کہا جو ایک دن روزہ رکھے اور دو دن افطار کرے۔ آپ صلی اللہ علیہ وسلم نے فرمایا میں آرزو رکھتا ہوں کہ مجھے اتنی طاقت ہو۔ یعنی یہ خوب ہے اگر طاقت ہو پھر رسول اللہ صلی اللہ علیہ وسلم نے فرمایا تین روزے ہر ماہ میں اور رمضان کے روزے ایک رمضان کے بعد دوسرے رمضان تک یہ ہمیشہ کا روزہ ہے یعنی ثواب میں اور عرفہ کے دن کا روزہ ایسا ہے کہ میں امیدوار ہوں اللہ پاک سے کہ ایک سال اگلے اور ایک سال پچھلے گناہوں کا کفارہ ہو جائے اور عاشورے کے روزہ سے امید رکھتا ہوں ایک سال اگلے کا کفارہ ہو جائے۔

(صحيح مسلم كِتَاب الصِّيَامِ باب اسْتِحْبَابِ صِياَمِ ثَلاَثَةِ أَيَّامٍ مِنْ كُلِّ شَهْرٍ وَصَوْمِ يَوْمِ عَرَفَةَ وَعَاشُورَاءَ وَالاِثْنَيْنِ وَالْخَمِيسِ)

ان احادیث سے صاف ظاہر ہوتا ہے کہ اسلام میں رسول اللہ ﷺ نے محرم کے مہینہ کو خاص اہمیت دی۔ آپؐ محرم میں روزے رکھتے اور دوسروں کو بھی تلقین کرتے کہ رمضان کے بعد محرم کے مہینہ کے روزے بہترین روزے ہیں۔نیز دس محرم کا روزہ جسے عاشوریٰ کا کہا جاتا ہے زمانہ جہالیت میں بھی رکھا جاتا تھا۔ رسول اللہ ﷺ جب مدینہ تشریف لائے تو آپ نے دیکھا کہ یہود اس دن کو خاص اہمیت دیتے ہیں اور اس دن روزہ رکھتے ہیں۔چنانچہ رسول للہ ﷺ نے بھی اسے رکھنے کا حکم دیا نیز بعد میں یہ بھی فرمایا کہ امت مسلمہ اور یہود میں فرق کرنے کے لیے بہتر ہے کہ 9 یا 11 محرم کے کو بھی روزہ رکھا جائے۔

اسلامی تاریخ میں محرم کا مہینہ اس لیے بھی خاص اہمیت رکھتا ہے کہ محرم میں رسول اللہ ﷺ کے لخت جگر نواسے حضرت امام حسین ؓ کو بے دردی سے شہید کیا گیا نیز اہل بیت کے بے شمار افراد کو شہید کیا گیا۔ خواتین کی بے حرمتی کی گئی۔حالانکہ رسول اللہ ﷺ کی احادیث میں حضرت امام حسین ؓ کا مقام بہت بلند بیان کیا گیا ہے۔چنانچہ مندرجہ ذیل میں چند ایسی احادیث پیش کی جائیں گی جس سے حضرت امام حسین ؓ کا مقام و مرتبہ ہمارے سامنے ظاہر ہوگا۔

احادیث میں حضرت امام حسین ؓ کا مرتبہ

ام المؤمنین سیدہ عائشہ رضی اللہ عنہا سے روایت ہے رسول اللہ صلی اللہ علیہ وسلم صبح کو نکلے اور آپ صلی اللہ علیہ وسلم ایک چادر اوڑھے ہوئے تھے جس پر کجاووں کی صورتیں یا ہانڈیوں کی صورتیں بنی ہوئی تھیں کالے بالوں کی۔ اتنے میں سیدنا حسن رضی اللہ عنہ آئے آپ صلی اللہ علیہ وسلم نے ان کو اس چادر کے اندر کر لیا پھر سیدنا حسین رضی اللہ عنہ آئے ان کو بھی اندر کر لیا پھر سیدہ فاطمہ زہرا رضی اللہ عنہا آئیں ان کو بھی اندر کر لیا پھر سیدنا علی رضی اللہ عنہ آئے ان کو بھی اندر کر لیا بعد اس کے فرمایاِ اِنَّمَا یُرِیۡدُ اللّٰہُ لِیُذۡہِبَ عَنۡکُمُ الرِّجۡسَ اَہۡلَ الۡبَیۡتِ وَیُطَہِّرَکُمۡ تَطۡہِیۡرًا یعنی اللہ تعالیٰ جل جلالہ چاہتا ہے کہ دور کرے تم سے ناپاکی کو اور پاک کرے تم کو اے گھر والو۔

(صحيح مسلم كِتَاب فَضَائِلِ الصَّحَابَةِ باب فَضَائِلِ الْحَسَنِ وَالْحُسَيْنِ رَضِيَ اللّٰہُ عَنْهُمَا)

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا جس نے حسن و حسین سے محبت کی اس نے مجھ سے محبت کی اور جس نے ان دونوں سے دشمنی کی اس نے مجھ سے دشمنی کی۔

(سنن ابن ماجه باب فى فضائل اصحاب رسول اللّٰہؐ باب فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللّٰہُ عَنْهُمْ)

یعلیٰ بن مرہ رضی اللہ عنہ بیان کرتے ہیں کہ ہم نبی اکرم صلی اللہ علیہ وسلم کے ساتھ کھانے کی ایک دعوت میں نکلے دیکھا تو حسین رضی اللہ عنہ گلی میں کھیل رہے ہیں۔ نبی اکرم صلی اللہ علیہ وسلم لوگوں سے آگے نکل گئے اور اپنے دونوں ہاتھ پھیلا لیے حسین رضی اللہ عنہ بچے تھے ادھر ادھر بھاگنے لگےاور نبی اکرم صلی اللہ علیہ وسلم ان کو ہنسانے لگے یہاں تک کہ ان کو پکڑ لیا اور اپنا ایک ہاتھ ان کی ٹھوڑی کے نیچے اور دوسرا سر پر رکھ کر بوسہ لیا اور فرمایا حسین مجھ سے ہے اور میں حسین سے ہوں اللہ اس سے محبت رکھے جو حسین سے محبت رکھے اور حسین نواسوں میں سے ایک نواسہ ہے۔

(سنن ابن ماجه باب فى فضائل اصحاب رسول اللّٰہؐ بَابُ فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍؓ)

زید بن ارقم رضی اللہ عنہ کہتے ہیں کہ رسول اللہ صلی اللہ علیہ وسلم نے علی فاطمہ حسن اور حسین رضی اللہ عنہم سے فرمایا میں اس شخص کے لیے سراپا صلح ہوں جس سے تم لوگوں نے صلح کی اور سراپا جنگ ہوں اس کے لیے جس سے تم لوگوں نے جنگ کی۔

(سنن ابن ماجه باب فى فضائل اصحاب رسول اللّٰہؐ بَابُ فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللّٰہُ عَنْهُمْ)

ابو سعید خدری رضی الله عنہ کہتے ہیں کہ رسول اللہ صلی اللہ علیہ وسلم نے فرمایا حسن اور حسین اہل جنت کے جوانوں کے سردار ہیں۔

(سنن ترمذي كتاب المناقب عن رسول اللّٰہؐ باب مَنَاقِبِ الْحَسَنِ وَالْحُسَيْنِؓ)

اسامہ بن زید رضی الله عنہما کہتے ہیں کہ میں ایک رات کسی ضرورت سے نبی اکرم صلی اللہ علیہ وسلم کے پاس آیا آپ صلی اللہ علیہ وسلم نکلے تو آپ ایک ایسی چیز لپیٹے ہوئے تھے جسے میں نہیں جان پا رہا تھا کہ کیا ہے پھر جب میں اپنی ضرورت سے فارغ ہوا تو میں نے عرض کیا یہ کیا ہے جس کو آپ لپیٹے ہوئے ہیں؟ تو آپ نے اسے کھولا تو وہ حسن اور حسین رضی الله عنہما تھے جو آپ صلی اللہ علیہ وسلم کے کولہے سے چپکے ہوئے تھے۔ پھر آپ نے فرمایا یہ دونوں میرے بیٹے اور میرے نواسے ہیں اے اللہ میں ان دونوں سے محبت کرتا ہوں تو بھی ان سے محبت کر اور اس سے بھی محبت کر جو ان سے محبت کرے۔