اس درجہ بدل جاتے ہیں اندازِ دھرم بھی
دیتا ہے کلیسا میں اذاں شیخِ حرم بھی
روشن ہیں جبینوں پہ تیرے نام کے سجدے
پہلو میں چھپائے ہوئے پھرتے ہیں صنم بھی
خاموش زبانوں کے مفاہیم کو سمجھو
لب بستوں سے قائم ہے محبت کا بھرم بھی
میں ذات کی گہرائی میں اترا تو یہ جانا
پندار میں شامل ہے نصیبا بھی، کرم بھی
کہہ دیتا ہوں سچ بات سرِ عام جبھی تو
نالاں ہیں برہمن بھی، فقیہان حرم بھی
جاں کلمہٴ توحید پہ کرتے ہیں نچھاور
لہراتے ہیں دنیا میں محمدؐ کا علم بھی
ہم چادرِ زہرا کے تقدس کے امیں ہیں
سینوں میں چھپا رکھا ہے شبیر کا غم بھی
تاریکیاں ہوتی ہیں اجالوں کی پیامی
راتوں سے ہی ملتا ہے سویروں کو جنم بھی
عابدؔ! تری ہر بات نرالی ہے جہاں سے
ہنستے ہوئے سہتے ہو زمانے کے ستم بھی
(لئیق احمد عابدؔ)
