جہاں میں حق کی ہیں آواز حضرت
ہیں کرتے آپ پر ہم ناز حضرت
ہمارے حضرت مسرور آقا
ہماری جان اور دَم ساز حضرت
خلافت سے ہمیں قلبی محبت
خدائی اِس میں ہیں انداز حضرت
اُلوہی نغمگی جس سے ہے اُٹھتی
وہ دین مصطفیٰؐ کا ساز حضرت
جہاں میں حق کی ہیں للکار کرتے
خُدا کے شیر یہ جانباز حضرت
بلاتے جب بھی قربانی کی خاطر
کریں پہلے وہ خود آغاز حضرت
گواہی اس کی دیتا ہے زمانہ
دِکھاتی ہے دُعا ، اِعجاز حضرت
ہے یاری آپ کی تو آسماں سے
فرشتے آپ کے ہمراز حضرت
یہ کچھ پل آپ کی صحبت میں رہنا
سمجھتے حکمراں اعزاز حضرت
ہمارے آپ ہیں محمود دِل کے
اور ہم ہیں آپ کے ایاز حضرت
تیرے دیوانے ہم ہیں تیرے عاشق
تمہی دلبر تمہی دَم ساز حضرت
تمہی ہو بادشاہ ربّ کے زمیں پہ
تمہی ہو دیں کے بھی شہباز حضرت
تمہیں دیکھیں تو آنکھیں وِرد کرتیں
محبت کی نمازِ ناز حضرت
مِری بستی کے ہجری چاند ہو تم
ہے تم پر مان اور ہے ناز حضرت
(عبدالجلیل عبادؔ۔ جرمنی)
