(یہ نظم 1932ء میں قیام فلسطین کے دوران لکھی گئی)
سر زمین معرفت، اے جلوہگاہِ قدسیاں
اے نشان ذاتِ حق، اے مہبطِ کرّو بیاں
اے کہ تیرے نام پر سَو بار جان و دل فدا
اے کہ زندہ تجھ سے ہے اسلامیوں کی داستاں
اے کہ تو ہے منبعِ علم و ہدیٰ، فہم و ذکاء
اے کہ تو ہے اس جہاں میں درسگاہِ عارفاں
برتر از چرخِ چہارم تیرا رتبہ کیوں نہ ہو
جب کہ ہے نازل ہوا تجھ میں مسیحائے زماں
وہ جری باطل شکن معمورِ حق احمد ؑ نبی
جس کی تقدیروں سے گونجے بارہا ہفت آسماں
ہاں وہی تو جس نے باطل کر دیا پیوندِ خاک
جس نے قُم کہہ کر کئے زندہ ہزاروں نیم جاں
مردہ روحوں کیلئے لایا جو پیغامِ حیات
چشمۂ کوثر بنا ہے جو برائے تشنگاں
دشتِ ظلمت میں بھٹکتے تھے جہاں کے فلسفی
آفتابِ حق سے مغرب ہوگیا اب نکتہ داں
پاسبانِ اُمّت احمدؑ ہوا محمود حق
حُسن و احساں میں جو ہے مثلِ مسیحائے زماں
یاد ہے وہ درس ِ قرآں روح پرور دلربا
مسجدِ اقصیٰ میں ہاں وہ مجمع پیر و جواں
فلسفیٔ غرب دیکھا منطقیٔ شرق بھی
پر نہ پایا اپنے آقا سا کوئی شیریں بیاں
’’چھوٹی بستی‘‘ لوگ کہتے ہیں حقارت سے تجھے
پر سمجھتا ہوں تجھے میں اِس زمیں کی کہکشاں
یادِ ایّام کہ تُو تھی جب ہماری درسگاہ
اور ہمارا مسکن و ماویٰ تھی اے جنت نشاں
ایک مدت کیلئے گو ہم جدا تجھ سے ہوئے
ہر دلِ مضطر میں ہیں انوار تیرے ضوفشاں
’’آہ کیسی خوش گھڑی ہوگی کہ بانیلِ مرام
باندھیں گے رخصتِ سفر کو ہم برائے قادیاں‘‘
(مولانا ابو العطاء جالندھری)
