شش جہت جس کی بڑی شاں سےپذیرائی ہے
دل اُسی حُسن کے شاہکار کا شیدائی ہے
اُس کا صناع بھی زمانوں سے حسیں ہے جس نے
حسنِ بے مثل کی تشکیل یہ فرمائی ہے
چاند تاروں سے حسیں تر ہے رُخِ یار کا حسن
اُس کی آواز میں اک پیار کی شہنائی ہے
با حیا آنکھوں کی دنیا میں نہیں کوئی نظیر
اُس کی زلفوں نے فضا دہر کی مہکائی ہے
پھول جھڑتے ہیں وہ لب پیار سے کھولے جب جب
دیکھنے والوں نے ہی بات یہ بتلائی ہے
اک جھلک دیکھے کوئی اس کا ہی ہو رہتا ہے
لوگ کہتے ہیں یہ دیوانہ ہے سودائی ہے
اک وفا پیار کا باندھا ہے تعلق اس سے
لاکھ دنیا کہے ’’ساجن ترا ہرجائی ہے‘‘
میں سرِمو نہ پھروں گا کبھی اُس سے ہرگز
عمر بھر ساتھ نبھانے کی قسم کھائی
منسلک اُس سے رہوں گا تو ملے گی عزت
ٹوٹ کر بکھرا تو پھر سمجھ کہ رسوائی ہے
بحرِ الفاظ سے جب ڈوب ڈوب کے نکلا
تب کہیں غزل نما نظم یہ بن پائی ہے
اور بھی لاکھوں حسیں ہوں گے مجھ سے دنیا میں
صورت و سیرتِ ’’مسرور‘‘ بہت بھائی ہے
ہو عطا نورِ بصارت رُخِ زیبا دیکھوں
دستِ قدرت کو مسیحائی کی زیبائی ہے
وہ بہت صاحبِ اوصاف حمیدہ ہے خلیقؔ
تب ہی دستارِ خلافت اُسے پہنائی ہے
(عبدالحمید خلیقؔ)
