حضرت جندبؓ بیان کرتے ہیں کہ آنحضرتﷺ نے فرمایا جو شخص محض شہرت کی خاطر کوئی کام کرتا ہے اللہ تعالیٰ اس کو اس رنگ میں شہرت دے گا کہ آخر کار اس کے عیب لوگوں پر ظاہر ہو جائیں گے۔ ان میں وہ رسوا اور بدنام ہو جائے گا۔ اور جو شخص ریاکاری سے کام لے گا اللہ تعالیٰ اس کی ریا کاری سب پر ظاہر کر دے گا۔
(بخاری کتاب الرقاق باب الریاء و السمعۃ)
حضرت محمود بن لبیدؓ بیان کرتے ہیں کہ آنحضرتﷺ نے ایک دفعہ باہر نکل کر فرمایا کہ اے لوگو! شرکِ خفی سے بچو۔ صحابہؓ نے عرض کیا حضورﷺ شرکِ خفی کیا ہے؟ آپؐ نے فرمایا: ایک شخص سنوار کر نماز پڑھتا اور اس کی خواہش و کوشش یہ ہوتی ہے کہ لوگ مجھے اس طرح نماز پڑھتے دیکھیں اور بزرگ سمجھیں، یہی دکھاوے کی خواہش شرکِ خفی ہے۔
(الترغیب و الترھیب، کتاب الاخلاص، الترغیب فی الاخلاص و الصدق والنیۃ الصالحۃ، صفحہ74حدیث نمبر 45)
