أَعُوذُ بِوَجْهِ اللّٰهِ الْعَظِيمِ. الَّذِي لَيْسَ شَيْءٌ أَعْظَمَ مِنْهُ. وَبِكَلِمَاتِ اللّٰهِ التَّامَّاتِ الَّتِي لاَ يُجَاوِزُهُنَّ بَرٌّ وَلاَ فَاجِرٌ. وَبِأَسْمَاءِ اللّٰهِ الْحُسْنَى كُلِّهَا. مَا عَلِمْتُ مِنْهَا وَمَا لَمْ أَعْلَمُ. مِنْ شَرِّ مَا خَلَقَ وَبَرَأَ وَذَرَأَ
(مؤطا امام مالک کتاب الشعر باب ما یومر بہ من التعوذ حدیث نمبر 1775)
ترجمہ: مَیں اپنے عظیم شان والے اللہ کی پناہ میں آتا ہوں کہ جس سے عظیم تر کوئی شے نہیں ۔اور کامل اور مکمل کلمات کی پناہ میں بھی کہ جن سے کوئی نیک و بد تجاوز نہیں کر سکتا ۔اور اللہ کی تمام صفات حسنہ جو مجھے معلوم ہیں یا نہیں معلوم، ان سب کی پناہ طلب کرتا ہوں اس مخلوق کے شر سے جسے اس نے پیدا کیا اور پھیلایا۔
یہ سید ومولیٰ پیارے نبی حضرت محمدﷺ کی خدا تعالیٰ کی پناہ میں آنے اور تمام زمینی و آسمانی شرور سے بچنے کی جامع اور بابرکت دعا ہے۔
ہمارے پیارے امام سیّدنا حضرت مرزا مسرور احمد خلیفۃ المسیح الخامس ایَّدہ اللہ تعالیٰ بنصرہ العزیز اس دعا کی طرف ہماری رہنمائی کرتے ہوئے فرماتے ہیں:
پھر ایک اور دعا آنحضرت ﷺ سے مروی ہےکہ(مندرجہ بالا دعا) پس یہ سنت ہے جو آنحضرت ﷺ قائم فرما گئے اور یہ زمانہ ایسا ہے کہ ہر احمدی کو سب سے بڑھ کر یہ دعائیں کرتے رہنا چاہئے اور بہت زیادہ استغفار کرنا چاہئے۔
(خطبات مسرور جلد3 صفحہ620)
پیارے آقا ایک اور جگہ اس دعا کی طرف توجہ دلاتے ہوئے فرماتے ہیں:
تو اس وقت مَیں آنحضرتﷺ کی ایک دعا سامنے رکھتا ہوں جس کو مَیں پہلے بعض حوالوں سے بیان کر چکا ہوں اور وہ دعا یہ ہے (مندرجہ بالا دعا) اس میں تمام زمینی و آسمانی شرور سے بچنے اور خداتعالیٰ کی پناہ میں آنے کی دعا ہے۔ آنحضرتﷺ کی تو ہر دعا ہی بہت جامع ہے، اور برکتیں سمیٹنے والی ہے۔ لیکن جن چند مسنون دعاؤں کو روزانہ مَیں سامنے رکھتا ہوں ان میں سے ایک یہ بھی ہے، اس لئے ذہن میں آ گئی۔ تواللہ تعالیٰ ہماری دعائیں قبول فرمائے اور ہر احمدی کو ہر شر سے بچائے۔
(خطبہ جمعہ 5؍ دسمبر 2008ء)
(مرسلہ:مریم رحمٰن)
