جب سے ہوئی ہے انکی شریعت الگ الگ
مسجد الگ الگ ہے، امامت الگ الگ
رحلوں پہ رکھ کے بیٹھے ہیں قرآن سامنے
پڑھنے لگے تو سب کی تلاوت الگ الگ
باطن میں شیخ و پنڈت و واعظ سبھی ہیں ایک
ظاہر میں گرچہ شکل و شباھت الگ الگ
اک قدرِ مُشترک ہے جہالت مُلاؤں میں
منبر پہ آگئے تو حکایت الگ الگ
رکھتے ہیں یہ یقیں کہ نبوت تمام شد
اور بانٹ لی ہے سب نے خلافت الگ الگ
مقتول جنتی ہے تو قاتل بھی ہے شہید
دونوں کو مل گئی ہے ضمانت الگ الگ
سمجھا رہا ہوں کب سے مگر مانتے نہیں
کرنی پڑے گی ان کی حجامت الگ الگ
(ڈاکٹر فضل الرحمن)
