ہے ہم فقیروں پہ فضل اس کا، بیاں کروں ناں تو کیا کروں میں
دیارِ دل میں ہے یار بستا، بیاں کروں ناں تو کیا کروں میں
میں شکر تیرا خدائے محسن ادا کروں بھی تو کیا کروں گا
ہے مجھ سے عاصی پہ رحم اتنا، بیاں کروں ناں تو کیا کروں میں
میں خود کو دیکھوں تو شرم آتی ہے کس قدر ہیں مرے دعاوی
مگر ہے مجھ پر نگاہِ یکتا، بیاں کروں ناں تو کیا کروں میں
مجسموں سے نکال کر روح ہم کو بخشی ہمارے رب نے
یہ ہم پہ فضلِ خدا ہے کتنا، بیاں کروں ناں تو کیا کروں میں
ستم ظریفوں نے بے کسوں کا بہا دیا ہےجو خونِ ناحق
میں اس لہو کا ہوں ایک قطرہ، بیاں کروں ناں تو کیا کروں میں
خدا کرے ہو تمام عمر اب اسی سفر میں تمام اپنی
یہی ہے اب میرے دل کی آشا، بیاں کروں ناں تو کیا کروں میں
(حافظ مستنصر احمد قاہر)
