رمضان المبارک 2022ء
اور جماعت احمدیہ یونان کی مساعی
قرآن کریم میں ارشاد خداوندی ہے کہ
یٰۤاَیُّہَا الَّذِیۡنَ اٰمَنُوۡا کُتِبَ عَلَیۡکُمُ الصِّیَامُ کَمَا کُتِبَ عَلَی الَّذِیۡنَ مِنۡ قَبۡلِکُمۡ لَعَلَّکُمۡ تَتَّقُوۡنَ
(البقرہ: 184)
اے لوگو! جو ایمان لائے ہو تم پر (بھی) روزوں کا رکھنا (اسی طرح) فرض کیاگیا ہے جس طرح ان لوگوں پر فرض کیا گیا تھا۔ جو تم سے پہلے گذر چکے ہیں تا کہ تم (روحانی اور اخلاقی کمزوریوں سے) بچو۔
ایک اور آیتِ مبارکہ میں رمضان المبارک میں نازل کردہ ایک روحانی مائدہ کا ذکر ان اَلفاظ میں کیا گیا ہے:۔
شَہۡرُ رَمَضَانَ الَّذِیۡۤ اُنۡزِلَ فِیۡہِ الۡقُرۡاٰنُ ہُدًی لِّلنَّاسِ وَبَیِّنٰتٍ مِّنَ الۡہُدٰی وَالۡفُرۡقَانِ ۚ فَمَنۡ شَہِدَ مِنۡکُمُ الشَّہۡرَ فَلۡیَصُمۡہُ
(البقرہ: 186)
رمضان کا مہینہ وہ (مہینہ) ہے کہ جس میں قرآن اتار اگیا یہ تمام لوگوں کے لئے ہدایت اور کھلے دلائل اور حق و باطل میں امتیاز کا درس اپنے اندر رکھتا ہے۔ پس جو شخص نہ مریض ہو اور نہ مسافر، اس ماہ کو پائے تو اسے چاہیے کہ اس کے روزے رکھے۔ حضرت نبی کریمﷺ نے اپنی حیاتِ مبارکہ میں فرض روزوں کے ساتھ بہت سے نفلی روزوں کا بھی اہتمام فرمایا۔ آپؐ ایک موقع پر روزے کی افادیت کے متعلق فرماتے ہیں کہ:
’’جو شخص ایمان کے تقاضوں کے مطابق اور نفس کا احتساب کرتے ہوئے رمضان کو قائم کرتا ہے اس کے سارے گناہ بخش دئیے جاتے ہیں۔‘‘
اللہ تعالیٰ کے فضل و کرم سے جماعت احمدیہ یونان نے یکم رمضان المبارک 1445ھ مورخہ 3؍اپریل 2022ء بروز اتوار پہلا روزہ رکھا۔
درس القرآن انگلش آن لائن بذریعہ Zoom
گزشتہ سالوں کی طرح اس سال بھی انگریزی بولنے والے احباب جماعت کے استفادہ کے لئے مکرم مربی صاحب انگریزی میں شام 05:00 بجے سے لے کر 05:45 آن لائن بذریعہ زوم اور واٹس ایپ درس القرآن دیتے رہے جس میں ایک والیم کامنٹری سے ترجمہ اور تفسیری نکات پیش کرتے رہے۔ اس رمضان المبارک میں انگریزی میں دس پاروں کا درس مکمل کیا گیا۔ انگریزی درس القرآن میں حاضری 4 سے 5 خواتین و حضرات پر مشتمل رہی۔
درس القرآن اردو
انگریزی درس کے بعد عصر کی نماز با جماعت ادا کی جا تی تھی۔ جو احباب ایتھنز میں مقیم تھے وہ مسجد میں حاضر ہو کر درس القرآن میں شامل ہوتے۔ نماز عصر کے بعد قرآن کریم کے ایک پارہ کی تلاوت کی جاتی اور تلاوت کے بعد تفسیر صغیر سے ترجمہ پیش کیا جاتا اور بعض مقامات پر تفسیری نوٹس بھی پیش کئے جاتے رہے۔ مسجد میں حاضر ہونے والوں کی تعداد کم سے کم 8 اور زیادہ سے زیادہ 15 رہی۔ درس کا انتظام آن لائن بذریعہ زوم اور واٹس ایپ بھی ہوتا رہا۔ جس میں ایتھنز اور باہر کے شہروں، دیہاتوں اور جزائر کے احباب شامل ہوتے رہے۔ اس طرح کل حاضری بعض ایام میں 30 تک ہو جاتی رہی۔ درس القرآن شام 6 بجے تا 8 بجے تک جاری رہتا۔
درس حدیث و ملفوظات
نماز فجر کے بعد محترم مربی صاحب روزانہ درس حدیث آڈیوں میں ریکارڈ کر کے احباب جماعت تک پہنچاتے رہے۔ ایک احمدی دوست مکرم منیر احمد خالد صاحب یو ٹیوب کے ذریعہ سے اسے مختلف لوگوں تک پہنچاتے رہے۔ نماز مغرب و عشاء کے بعد ملفوظات حضرت مسیح موعودؑ کا درس بھی باقاعدگی کے ساتھ ہوتا رہا۔
مسجد میں افطاری کا انتظام
یکم رمضان المبارک سے افطاری کا انتظام مسجد میں جماعتی طور پر کیا جاتا رہا ہے۔ بعض احباب جماعت کو بھی اس کار خیر میں حصہ ڈالنے کی توفیق ملی۔
برکینا فاسو اور آئوری کوسٹ کی کمیونٹیز کو
افطاری کی دعوت
رمضان المبارک میں دو مختلف دنوں میں غیر از جماعت احباب کو مسجد میں دعوت دی گئی۔ مورخہ 30 اپریل بروز ہفتہ کو برکینا فاسو کی کمیونٹی کے چار غیر از جماعت مہمان تشریف لائے۔ انہیں جماعت کا تعارف اور جماعتی لٹریچر پیش کرنے کا بھی موقع ملا اور بعض تبلیغی موضوعات پر گفتگو بھی ہوئی۔ اور مورخہ 30 اپریل بروز ہفتہ کو آئوری کوسٹ کمیونٹی کے 7 خواتین و حضرات کو مسجد میں دعوت دی گئی۔ ان میں بعض مسلمان اور بعض غیر مسلم تھے۔ دونوں کمیونٹیز کے بعض مہمانوں نے نمازوں اور تراویح میں بھی شمولیت اختیار کی۔
نماز تراویح
نماز تراویح کا سلسلہ 2 اپریل 2022 سے مسجد میں شروع کیا گیا جو کہ یکم مئی تک باقاعدگی سے چلتا رہا۔ جس میں خدام و انصار شامل ہوتے رہے۔
نماز عید
نماز عید کا وقت 10:30 بجے رکھا گیا تا کہ مسجد میں ہی پیارے آقا حضرت امیر المومنین ایدہ اللہ تعالیٰ بنصرہ العزیز کا خطبہ عید سب مل کر ایم ٹی اے پر براہ راست دیکھ اور سن سکیں۔
اللہ تعالیٰ کے فضل و کرم سے اس بار یونان کی دو جماعتوں ایتھنز اور شمالی یونان کی جماعت کے شہر تھیسالو نیکی دو جگہوں پر نماز عید ادا کی گئی۔ایتھنز میں مکرم عطاء النصیر صاحب نیشنل صدر و مربی سلسلہ نے عید کا خطبہ اردو اور انگریزی دونوں زبانوں میں دیا اور حضور انور کی دعاوں کی مختلف تحریکات کی یاد دہانی کروائی۔ نماز عید پر ایتھنز میں کل حاضری 35 تھی۔ تھیسالونیکی میں نماز عید مکرم ذیشان ندیم صاحب نے پڑھائی۔ نماز عید کے لئے ایک ہوٹل میں حال کرائے پر لیا گیا جہاں 5 احباب نے نماز عید ادا کی۔ نماز عید کے بعد چائے اور مٹھائی کا انتظام کیا گیا اور خطبہ عید حضورِ انور کے بعد کھانے کا انتظام تھا۔
اللہ تعالیٰ رمضان المبارک کی برکات کو ہمیشہ ہماری زندگیوں میں قائم رکھے۔ آمین۔
(رپورٹ: ارشد محمود۔ نمائندہ الفضل آن لائن، یونان)
