صبح شام کی دعا
حضرت ابو ہریرہؓ اور ابو راشد الحرانی ؓ بیان کرتے ہیں کہ حضرت ابو بکر صدیق ؓ نے رسول خدا صلی اللہ علیہ وسلم کی خدمت میں عرض کیا کہ اے اللہ کے رسولؐ! مجھے کچھ ایسے دُعائیہ کلمات سکھا دیں جو مَیں صبح و شام دہرایا کروں تو رسول کریم صلی اللہ علیہ وسلم نے یہ دُعا سکھائی اور فرمایا کہ صبح و شام یا بستر پر جاتے ہوئے یہ دُعا پڑھا کرو:
اَللّٰھُمَّ فَاطِرَ السَّمٰوَاتِ وَالْاَرْضِ،عَالِمِ الْغَیْبِ وَالشَّھَادَۃِ رَبَّ کُلِّ شَیْءٍ وَّمَلِیْکَہٗ اَشْھَدُ اَنْ لَّآ اِلٰہَ اِلَّا اَنْتَ اَعُوْذُبِکَ مِنْ شَرِّ نَفسِیْ،وَشَرِّ الشَّیْطَانِ وَشِرْکِہٖ،وَاَنْ اَقْتَرِ فَ عَلٰی نَفْسِیْ سُوْٓءً،اَوْ اَجُرَّہٗٓ اِلٰی مُسْلِمٍ
(ابو داؤد کتاب الادب)
ترجمہ: اے اللہ! زمین و آسمان کے پیدا کرنے والے! غیب اور حاضر کو جاننے والے!ہر ایک چیز کے ربّ اور مالک! مَیں گواہی دیتا ہوں کہ تیرے سوا کوئی معبود نہیں۔ مَیں اپنے نفس اور شیطان کے شر اور اُس کے شرک سے تیری پناہ میں آتا ہوں اور اس بات سے بھی کہ میں خود کسی برائی کا مرتکب ہو کر اپنا نقصان کر لوں یا کسی مسلمان کو کوئی گزند پہنچاؤں۔
(مناجات رسولؐ از خزینۃ الدعا مرتبہ علامہ ایچ ایم طارق ایڈیشن2014ء صفحہ112)
(مرسلہ: عائشہ چوہدری۔جرمنی)
