خدا کی بشر پر عنایت ہے ماں
محبّت کی لاریب مورت ہے ماں
ترے مصحفِ رُخ کو دل سے پڑھوں
تجھے دیکھنا بھی عبادت ہے ماں
تری ذات میں موجِ کوثر رواں
تری آنکھ میں جوئے شفقت ہے ماں
ہمیشہ اٹھاتی ہے بچوں کے ناز
ہیں خوش بخت، جن کی سلامت ہے ماں
ترے دم سے ہے برکتوں کا نزول
ترے پاؤں کے نیچے جنت ہے ماں
سراپا محبّت کی آماجگاہ
گلابوں کی خوشبو، لطافت ہے ماں
سبھی کام بگڑے سنور جاتے ہیں
مری ہر دعا کی ضمانت ہے ماں
نہیں تیرا کوئی بھی نعم البدل
عطا میں عطا بیش قیمت ہے ماں
بچائے بلاؤں سے بشرؔیٰ! مجھے
دعاؤں سے کرتی حفاظت ہے ماں
(بشریٰ سعید عاطف۔ مالٹا)
