پھر آمدِ رمضان ہے

شاد ہیں امت کے دل پھر آمدِ رمضان ہے
رحمتوں اور بخششوں کا ہو گیا سامان ہے

ہم سمیٹیں برکتیں اور شکر بھی کرتے رہیں
اس مبارک ماہ میں نازل ہوا قرآن ہے

حکمِ رب العالمیں دل سے بجا لائیں گے ہم
فرض ہے روزہ، یہی اللہ کا فرمان ہے

محض روزہ ہی نہیں، ہو جھوٹ سے بھی اجتناب
نیکیوں کے واسطے، دیکھو! کھلا میدان ہے

عمر بھر کی لغزشوں کو بخشوانے کے لیے
عاصیوں کے واسطے اک تحفۂ ذیشان ہے

کاسۂ دل رحمتوں سے اے خدا! بھر دے مرا
تیرے سب ناموں میں دوجا نام اک رحمٰن ہے

جنت الفردوس کے کھولے گئے ہیں در سبھی
شکر ہے کہ قید میں جکڑا ہوا شیطان ہے

(منصورہ فضل مؔن۔ قادیان)