مری صبح تُو، مری شام تُو

مری صبح تُو، مری شام تُو
مری زندگی میں مدام تُو

ترا ذکر ہے مرا مشغلہ
سرِ بزم تُو سرِعام تُو

مرے رتجگوں کا رفیق تُو
ہے سکوتِ شب کا کلام تُو

مرے قلب و جاں کا سکون بھی
مری دھڑکنوں کا نظام تُو

تری یاد ہے مری ہمسفر
مری چاہتوں کا امام تُو

تُو مری مراد اور منتہیٰ
ہے مرا سجود و قیام تُو

مری آرزو، مری جستجو
ہے مرا درود و سلام تُو

تجھے سوچتے مرا دن ڈھلے
سرِ صبح تُو، سرِ شام تُو

تری دلکشی مری جانِ جاں
مری سانس کا ہے دوام تُو

(انیس رئیس۔ جاپان)