جلسہ سالانہ جرمنی۔ قدم بقدم

سیدنا حضرت مسیح موعود علیہ السلام نے جماعت کے قیام کے جلد بعد احباب جماعت کے تقویٰ کا معیار بڑھانے، آخرت پر یقین میں اضافہ کرنے، باہمی محبت و اخوت اور مودت کا رشتہ مضبوط کرنے، ایمان اور یقین اور معرفت کو ترقی دینے والے حقائق و معارف اور ربانی باتوں کے سننے کے لئے جلسہ سالانہ کا آغاز فرمایا تھا۔ اس جلسہ کے شاندار مستقبل کے بارہ میں آپؑ نے فرمایا تھا:
’’اس جلسہ کو معمولی انسانی جلسوں کی طرح خیال نہ کریں۔ یہ وہ امر ہے جس کی خالص تائید حق اور اعلائے کلمہ اسلام پر بنیاد ہے۔ اس سلسلہ کی بنیادی اینٹ خدا تعالیٰ نے اپنے ہاتھ سے رکھی ہے اور اس کے لئے قومیں طیار کی ہیں جو عنقریب اس میں آ ملیں گی کیونکہ یہ اُس قادر کا فعل ہے جس کے آگے کوئی بات انہونی نہیں۔‘‘

(مجموعہ اشتہارات جلد اول صفحہ341)

مسیح پاک کی زبان مبارک سے نکلے ہوئے یہ خدائی الفاظ یوں تو ابتداء سے ہی اپنی شان دکھانے لگے تھے تاہم جب اس جلسہ کی شاخیں قادیان سے نکل کر پہلے ربوہ، امریکہ، انگلستان، غانا، نائیجیریا، انڈونیشیا،جرمنی اور پھر دنیا کے بہت سے ممالک پر سایہ فگن ہونے لگیں تو ان الفاظ کے پورا ہونے کی الگ ہی شان نظر آنے لگی۔ ان جلسوں میں دور دراز کے ممالک سے مختلف اقوام کے احباب جماعت کےشامل ہونے کا منظر سیدنا حضرت مسیح موعود ؑکے اِن الفاظ سے خوب واضح ہوتا ہے:
’’اس سلسلہ کی بنیادی اینٹ خدا تعالیٰ نے اپنے ہاتھ سے رکھی ہے اور اس کے لئے قومیں طیار کی ہیں جو عنقریب اس میں آ ملیں گی‘‘

جلسہ سالانہ کی انہی شاخوں میں سے ایک شاخ یورپ کے ایک اہم ملک جرمنی پر بھی سایہ فگن ہے۔ یہاں جلسہ سالانہ کا آغاز 1975ء میں ہوا جس میں شاملین کی تعداد قریباً 70تھی اور2017ء میں منعقد ہونے والے 42 ویں جلسہ سالانہ میں اللہ تعالیٰ کے فضل سے اس کاروان کی تعداد چالیس ہزار سے تجاوز کر چکی تھی، الحمدللہ۔صرف 70 افراد سے شروع ہوکر 40ہزار تک پہنچنے والے اس جلسے کی قدم بہ قدم، مرحلہ در مرحلہ ترقی کی مختصر کہانی اس مضمون میں پیش کرنے کی کوشش کی جائے گی۔

جلسہ سالانہ جرمنی کا آغاز اور ہمبرگ میں انعقاد

سب سےپہلا جلسہ سالانہ مسجد فضل عمر ہمبرگ میں 28/دسمبر 1975ء کو بروز اتوار صبح دس بجے سے شام چھ بجے تک منعقد ہوا۔ اس کا افتتاح اور اختتام مکرم مولانا فضل الٰہی اَنوری امیر و مبلغ انچارج جرمنی نے کیا۔ اس میں شامل ہونے والے احباب جماعت کی ایک فہرست ملی ہے جس میں ڈنمارک، فرینکفرٹ اور بعض دیگر شہروں سے شامل ہونے والے 63 احباب و خواتین کے نام لکھے ہیں جبکہ چند منتظمین کے نام اس کے علاوہ ہیں، اس طرح اس کی مجموعی حاضری 70 کے قریب تھی۔ اس اولین جلسہ سالانہ میں کل چھ تقاریر ہوئیں جن میں سے ایک تقریر ڈنمارک سے تشریف لائے ہوئے مکرم الحاج نوح سوین ہینسن (Mr Svend Hansen) نے بھی کی۔

اس جلسہ میں حاضرین کے مابین تلاوت قرآن کریم، نظم خوانی، تقریر اور عام دینی معلومات کے مقابلے بھی ہوئے۔ اس جلسہ کی انتظامی کمیٹی امام مسجد فضل عمر ہمبرگ محترم حیدر علی ظفر کی زیر نگرانی مندرجہ ذیل تین کارکنان پر مشتمل تھی:

1۔ مکرم نصیر الدین بٹ
2۔ مکرم مختار احمد
3۔ مکرم چوہدری رفیق احمد جاوید

(غیر مطبوعہ ریکارڈ تاریخ کمیٹی جرمنی)

جماعت احمدیہ جرمنی کا دوسرا جلسہ سالانہ 8 جنوری 1977ء کو مسجد فضل عمر ہمبرگ میں ہی منعقد ہوا۔ اس جلسہ کی انتظامی کمیٹی مندرجہ ذیل پانچ منتظمین پر مشتمل تھی:

1۔ مکرم سید منصور احمد
2۔ مکرم عبدالجلیل بٹ
3۔ مکرم رفیق احمد جاوید
4۔ مکرم خورشید احمد
5۔ مکرم عبدالرشید خالد

اس جلسہ میں ہمبرگ سے باہر کی 14 جماعتوں کے 29 اور ہمبرگ سے قریباً 120 نمائندگان نے شرکت کی۔ اس کا اِفتتاح اور اِختتام امیر و مبلغ انچارج جرمنی محترم حیدر علی ظفر نے کیا۔ آپ کے علاوہ مبلغ فرینکفرٹ محترم نواب منصور احمد خان اور دو نو احمدی جرمن دوستوں مکرم F. S. Kretschmar اور مکرم Herbert Gehrts نے بھی تقاریر کیں۔ اس ایک روزہ جلسہ کے چار اجلاسات ہوئے اور بعض علمی مقابلہ جات بھی ہوئے جن میں نمایاں پوزیشن حاصل کرنے والے احباب میں ڈنمارک سے تشریف لائے ہوئے نواحمدی ڈینش دوست مکرم کمال کرو نے انعامات تقسیم کئے۔

(اخبار احمدیہ جرمنی جنوری 1977ء)

تیسرا جلسہ سالانہ بھی اسی سال مسجد فضل عمر ہمبرگ میں منعقد ہوا۔ اس مرتبہ جلسہ کا دورانیہ بڑھادیا گیا اور 24، 25 دسمبر 1977ء کو دو روز تک جاری رہا۔ اب تک ہونے والے دونوں جلسے جماعت ہمبرگ کی طرف منسوب تھے اور اس تیسرے جلسے کو جلسہ سالانہ مغربی جرمنی کے نام سے موسوم کر دیا گیا۔ اس میں انگلستان، ناروے اور جرمنی کے 42 شہروں سے مجموعی طور پر 250 احباب جماعت شریک ہوئے جن میں قریباً 30 غیر از جماعت دوست بھی تھے، الحمدللّٰہ۔

اس جلسہ کے لئے پہلی مرتبہ مرکز ربوہ سے وکیل التبشیر صاحب کا پیغام موصول ہوا جسے مکرم چوہدری عبداللطیف سابق مبلغ جرمنی نے پڑھ کر سنایا۔ اس کی افتتاحی اور اختتامی تقاریر امیر و مبلغ انچارج محترم حیدر علی ظفر نے کیں۔ ان کے علاوہ محترم نواب منصوراحمد خان مبلغ فرینکفرٹ اور مکرم نور احمد بولستاد امیر جماعت ناروے اور بعض مقامی مقررین نے بھی تقاریر کیں۔

(اخبار احمدیہ جرمنی جنوری 1978ء)

اس جلسہ کی ایک خصوصیت یہ بھی تھی کہ اس کے دوسرے روز 25 دسمبر کو لجنہ اماء اللہ کا بھی ایک علیحدہ اجلاس منعقد ہوا۔ جس میں لجنہ کی حاضری 20 تھی۔

(اخبار احمدیہ جرمنی فروری 1978ء)

چوتھا جلسہ سالانہ جرمنی 24 اور 25 دسمبر 1978ء کو مسجد فضل عمر ہمبرگ میں ہی منعقد ہوا۔ اس کے انتظامات مبلغ ہمبرگ مکرم لئیق احمد منیر کے زیر نگرانی ایک کمیٹی نے کئے۔ اس کا افتتاح امیر و مبلغ انچارج مکرم نواب منصور احمد خان نے کیا۔ اس جلسہ کے مہمان خصوصی سویڈن سے مکرم عزت اولیوچ تھے۔اس جلسہ میں ایک مجلس سوال و جواب بھی ہوئی جو جملہ شرکاء کے لئے خاص دلچسپی کا باعث بنی۔ علاوہ ازیں حضرت خلیفۃ المسیح الثالث رحمہ اللہ کے دورۂ جرمنی و لندن کی متحرک فلم بھی دکھائی گئی۔ اس جلسہ کی حاضری 160 تک گئی۔

(غیر مطبوعہ ریکارڈ دفتر تاریخ جرمنی، فائل جلسہ)

1980ء میں منعقد ہونے والا دو روزہ جلسہ بھی 5 اور 6 اپریل کو مسجد فضل ہمبرگ میں منعقد ہوا۔ گزشتہ سال 1979ء میں بعض مجبوریوں کی وجہ سے جلسہ منعقد نہ ہوسکا تھا لہٰذا یہ جلسہ گنتی کے اعتبار سے پانچواں جلسہ سالانہ ہونے کے ساتھ ساتھ ہمبرگ میں ہونے والا آخری جلسہ بھی تھا کیونکہ گزشتہ سالوں کے دوران بہت سے احمدی ہجرت کرکے جرمنی آچکے تھے اور ان میں سے بیشتر احباب کو فرینکفرٹ کےگرد و نواح یا جرمنی کے وسطی و جنوبی علاقوں میں آباد کیا گیا تھا۔ اس اعتبار سے زیادہ تر احباب جماعت کا فرینکفرٹ پہنچنا نسبتاً آسان تھا، اس لئے انتظامی سہولت کے پیش نظر فیصلہ کیا گیا کہ آئندہ جلسہ سالانہ فرینکفورٹ میں ہو اکرے گا۔

پانچویں جلسہ سالانہ کا افتتاح اور اختتام امیر و مبلغ انچارج مکرم نواب منصور احمد خان نے کیا جب کہ لندن سے مکرم منیر الدین شمس نے بطور مہمان مقرر شرکت کی، آپ کی تقریر کا عنوان ’’انگلستان میں تبلیغ اسلام اور احمدیت کا مستقبل‘‘ تھا۔ اس جلسہ کے لئے ربوہ سے وکیل التبشیر محترم صاحبزادہ مرزا مبارک احمد کا پیغام بھی موصول ہوا۔ مقامی مقررین میں سے نو احمدی مکرم عبداللہ واگس ہاؤزر کی تقریر بعنوان ’’جلسہ سالانہ ربوہ اور قادیان کے دوران میرے تجربات‘‘ اور مکرم ہدایت اللہ ہیوبش کی تقریر بعنوان ’’مغربی معاشرہ میں اسلامی طرز عمل کیسے اپنایا جاسکتا ہے‘‘ خاص طور پر دلچسپی کے ساتھ سنی گئیں۔ اس جلسہ میں بھی دوسرے روز لجنہ اماءاللہ کا ایک الگ سیشن ہوا۔ جلسہ کے آخری اِجلاس کی حاضری اللہ تعالیٰ کے فضل سے 700 تک جا پہنچی جو مسجد فضل عمر کی گنجائش سے کئی گنا زیادہ تھی۔

(غیر مطبوعہ رپورٹ جلسہ 1980ء ریکارڈ تاریخ احمدیت جرمنی)

چنانچہ اس کے لئے مسجد کے عقبی لان اور سامنے والےباغیچہ میں مارکیاں لگا کر انتظامات میں وسعت پیدا کی گئی تھی۔ علاوہ ازیں احباب جماعت کوسڑک کے علاوہ ہمسایوں کے باغیچوں میں بھی بیٹھنا پڑا۔

(از یاد داشت محترم لئیق احمد منیر، منتظم اعلیٰ جلسہ)

جلسہ سالانہ جرمنی فرینکفرٹ میں

1981ء میں جلسہ سالانہ جرمنی کی تاریخ میں ایک نیا موڑ آیا اور اس جلسہ نے ہمبرگ سے سفر کر کے فرینکفرٹ میں آبسیرا کیا اور جماعت احمدیہ جرمنی کا چھٹا جلسہ سالانہ 19،18 اپریل 1981ء کوفرینکفرٹ کے ایک ہال Gallus Haus Frankfurtalle111 میں منعقد ہوا۔

اس جلسہ کو انتظامی لحاظ سے پہلی دفعہ دس مختلف شعبوں میں تقسیم کرکے مکرم عبداللہ واگس ہاؤزر صاحب کی سربراہی میں ایک وسیع انتظامی کمیٹی مقررکی گئی۔ اس جلسہ کے مہمان خصوصی جرمنی میں غانا کے سفیر مکرم عمانویل مہمایعقوبو (EMANUEL MAHMA YAKUBU) تھے۔ اسی طرح مکرم میر مسعود احمدصاحب ڈنمارک اور مکرم عبدالعزیز فرحاخن صاحب ہالینڈ سے اس جلسہ میں شامل ہوئے۔ حضرت خلیفۃ المسیح الثالثؒ نے ازراہِ شفقت تین صفحات پر مشتمل اپناخصوصی پیغام بزبان انگریزی جلسہ کے لئے ارسال فرمایا۔ علاوہ ازیں وکیل التبشیر صاحب کا بھی پیغام موصول ہوا۔ یہ پیغامات امیر و مبلغ انچارج مکرم نواب منصور احمد خان صاحب نے پڑھ کر سنائے۔ اس جلسہ کی حاضری 750 رہی جو ایک نیا ریکارڈ تھا۔

(اخبار احمدیہ جرمنی مئی 1981ء)

اگلے سال مؤرخہ10 اور 11 اپریل 1982ء کو ساتواں جلسہ بھی گزشتہ سال کی طرح فرینکفرٹ کے اسی ہال میں منعقد ہوا۔ اس کے لئے بھی حضرت خلیفۃ المسیح الثالثؒ اور وکیل التبشیر صاحب کے پیغامات موصول ہوئے۔ اس جلسہ میں مرکز لندن سے محترم مبارک احمد ساقی صاحب مبلغ سلسلہ بطور مہمان مقرر شامل ہوئے۔ اس جلسہ کی حاضری627 تھی۔

(رسالہ ‘‘تحریک جدید جون 1982 صفحہ10)

مؤرخہ2 اور3 اپریل 1983ء کومنعقد ہونے والے آٹھویں جلسہ سالانہ جرمنی میں مہمان خصوصی مبلغ اسپین مکرم کرم الٰہی ظفر صاحب تھے۔ علاوہ ازیں مبلغ انگلستان مکرم بشیر احمد آرچرڈ صاحب نے بھی بطور مہمان مقرر شرکت فرمائی۔ اس کی حاضری 630 تھی۔ یہ جلسہ فرانکفورٹ شہر کے وسط میں واقع ایک ہال Volksbildungsheim, Eschenheimer Anlage 40 میں منعقد ہوا۔ اس ہال کی ایک خاص بات یہ تھی کہ اس سے قبل یہاں حضرت خلیفۃ المسیح الرابع رحمہ اللہ کے ساتھ احباب جماعت کی اجتماعی ملاقات بھی ہوئی تھی۔

(اخبار احمدیہ جرمنی مارچ 1983ء صفحہ4)

مہمانوں کی رہائش کا انتظام فرینکفرٹ شہر اور مضافاتی بستیوں میں رہنے والے احمدیوں کے ہاں کیا گیا تھا جبکہ ضیافت کے لئے مسجد نور کے عقبی باغیچہ میں خیمہ لگا کر کیا گیا تھا۔ کھانا تیار بھی یہاں کیا جاتا تھا اور کھلایا بھی اسی جگہ جاتا تھا۔ جلسہ کے دوسرے روز خواتین نے جلسہ گاہ والے ہال کی دوسری منزل کے ایک کمرےمیں اپنا الگ جلسہ منعقد کیا۔

(از ریکارڈ وکالت تبشیر ربوہ، فائل جرمنی جنرل 1983ء صفحہ101)

ربوہ کی طرز پر اِنتظامی ڈھانچہ

1983ء کے جلسہ سالانہ کی ایک خصوصیت یہ بھی تھی کہ اس کے انتظامات کے لئے جلسہ سالانہ ربوہ کی طرز پر پہلی مرتبہ ایک وسیع انتظامی ڈھانچہ بنایا گیا جس کے لئے مکرم عبدالباسط طارق صاحب مبلغ سلسلہ کو افسر جلسہ سالانہ مقرر کیا گیا جبکہ افسر جلسہ گاہ کے طور پر مکرم ناز احمد ناصر صاحب کو افسر جلسہ گاہ خدمت کی توفیق ملی۔ ان ہر دو افسران کی زیر نگرانی مختلف شعبوں کے منتظمین نے جلسہ کے انتظامات بڑی خوبی کے ساتھ سرانجام دئیے۔

(غیر مطبوعہ ریکارڈ دفتر تاریخ جرمنی، فائل جلسہ سالانہ)

اس کے بعد ہر سال اسی طرز پر انتظامی ڈھانچہ تشکیل دیا جانے لگا جس کی تفصیل حسب ذیل ہے:

افسران جلسہ سالانہ جرمنی

سال	افسر جلسہ سالانہ	حوالہ
1983ء و 1984ء	مکرم عبدالباسط طارق	غیر مطبوعہ ریکارڈ دفتر تاریخ جرمنی، فائل جلسہ و اخبار احمدیہ جرمنی مئی 1984ءصفحہ 9
1985ء	مکرم عبداللہ واگس ہاؤزر	اخبار احمدیہ جرمنی جولائی 1985ءصفحہ 4
19871988-ء تا 1990ء	مکرم چوہدری محمد شریف خالد	اخبار احمدیہ جرمنی جون جولائی 1988ء صفحہ 21، اخبار احمدیہ جرمنی مئی 1989ء صفحہ 29
1991ء تا 2000ء	مکرم عبدالرحمٰن مبشر	اخبار احمدیہ اکتوبر و نومبر 1991ء صفحہ20، نومبر، دسمبر 1992ء صفحہ 35، جون جولائی 1992ء صفحہ27 و غیر مطبوعہ ریکارڈ دفتر تاریخ جرمنی فائل جلسہ سالانہ
2001ء	مکرم مبشر احمد طاہر	غیر مطبوعہ ریکارڈ دفتر تاریخ جرمنی فائل جلسہ سالانہ
2002ء تا 2008ء	مکرم زبیر خلیل صاحب	غیر مطبوعہ ریکارڈ دفتر تاریخ جرمنی فائل جلسہ سالانہ، اخبار احمدیہ متعلقہ سال
2009ء تا 2011	مکرم عبدالرحمٰن مبشر	غیر مطبوعہ ریکارڈ دفتر تاریخ جرمنی فائل جلسہ سالانہ و اخبار احمدیہ متعلقہ سال
2012ء تا 2014ء	مکرم مظفر عمران	غیر مطبوعہ ریکارڈ دفتر تاریخ جرمنی فائل جلسہ سالانہ
2015ء تا حال	مکرم محمد الیاس مجوکہ	غیر مطبوعہ ریکارڈ دفتر تاریخ جرمنی فائل جلسہ سالانہ

افسر ان جلسہ گاہ جرمنی

سال	افسر جلسہ گاہ	حوالہ
1983ء و 1984ء	مکرم ناز احمد ناصر	اخبار احمدیہ جرمنی مئی 1984ء صفحہ 9
1985ء و 1986    ء	مکرم ملک منصور احمد عمر	اخبار احمدیہ جرمنی جولائی 1985ء صفحہ 4و غیر مطبوعہ ریکارڈ دفتر تاریخ جرمنی، فائل جلسہ سالانہ
1987ء	مکرم لئیق احمد منیر	اخباراحمدیہ جرمنی   جولائی 1987ء صفحہ10
1988ء
1989ء تا 1990  ء	مکرم مولانا عطاء اللہ کلیم	اخبار احمدیہ جرمنی جون جولائی 1989ء صفحہ24، اخبار احمدیہ جرمنی جون 1990ء صفحہ36
1991ء  تا1992ء	مکرم عبدالشکور اسلم	غیر مطبوعہ ریکارڈ دفتر تاریخ جرمنی، فائل جلسہ سالانہ و اخبارِ احمدیہ جرمنی جون جولائی 1992ء صفحہ27
1993ء تا 1994    ء	مکرم مقصود الحق	غیر مطبوعہ ریکارڈ دفتر تاریخ جرمنی، فائل جلسہ سالانہ
1995ءتا 2014   ء	مکرم حیدر علی ظفر	غیر مطبوعہ ریکارڈ دفتر تاریخ جرمنی فائل جلسہ سالانہ و اخبار احمدیہ متعلقہ سال
2015ء تا    حال	مکرم مظفر عمران	غیر مطبوعہ ریکارڈ دفتر تاریخ جرمنی فائل جلسہ سالانہ

فرنکفرٹ کے مذکورہ بالا ہال میں آخری مرتبہ جلسہ سالانہ کا انعقاد 21 اور 22اپریل 1984ء کو ہوا۔ اس کے لئے بھی حضرت خلیفۃ المسیح الرابع رحمہ اللہ کا خصوصی ولولہ انگیز پیغام موصول ہوا۔ مبلغ انچارج ہالینڈ محترم عبدالحکیم اکمل صاحب اور ڈینش نو احمدی دوست مکرم سیون ہانسن بھی شریک ہوئے۔اس جلسہ میں جرمنی کی 58 میں سے 50 جماعتوں کی نمائندگی ہوئی اور اس طرح سے حاضری ایک ہزار سے تجاوز کر گئی جس میں 300 جرمن اور پاکستانی مہمان بھی شامل تھے۔ ایک شبینہ اجلاس بھی ہوا جس میں غیر از جماعت دوستوں کے ساتھ مجلس سوال و جواب بھی ہوئی۔

(از ریکارڈ وکالت تبشیر ربوہ، فائل جرمنی جنرل 1984ء صفحہ221)

جلسہ جرمنی کی تاریخ میں ایک نیا سنگ میل

جلسہ کی حاضری میں اللہ تعالیٰ کے فضل سے بڑھتی رہی اور 1983ء کے جلسہ میں اس قدر بڑھ گئی کہ بڑی اور کھلی جگہ کی ضرورت پڑگئی چنانچہ جماعت جرمنی نے وَسِّعْ مَکَانَکَ کا نظارہ یوں دیکھا کہ فروری 1985ء میں اللہ تعالیٰ نے جماعت جرمنی کو فرینکفرٹ کے جنوب میں 40 کلو میٹر دور گروس گیراؤ (Gross Gerau) نامی شہر کے نواح میں کئی ایکڑ پر مشتمل ایک وسیع قطعہ اراضی عطافرمایاتھا جس کا نام ناصرباغ رکھا گیا تھا، چنانچہ 1985ء کا جلسہ سالانہ جماعت کی اپنی خریدکردہ اسی جگہ پر منعقدہوا جس کی الگ ہی شان تھی۔ ناصر باغ کے کھلے اور وسیع میدانوں میں کہیں جلسہ گاہ کے لئے مارکیاں لگائی گئیں تو کہیں لنگر خانہ کے لئے۔ مختلف دفاتر بھی چھوٹے چھوٹے ٹینٹ لگا کر بنائے گئے۔ ایک میدان کو کار پاکنگ کے لئے مخصوص کیا گیا۔ گویا ایک چھوٹا سا شہر، چھوٹا ربوہ بنا دیا گیا۔ لاؤڈ سپیکر پر اذان، ذکر الٰہی، درود شریف کے ورد کے ساتھ ساتھ پاکیزہ نظموں،اعلانات اور نعرہ ہائے تکبیر نے قادیان اور ربوہ کے جلسوں کی یاد تازہ کر دی۔ احباب جماعت دور دراز سے قافلوں کی صورت میں بسوں اور کاروں میں پہنچتے تو ان کا روایتی انداز میں پر جوش استقبال کیا جاتا۔ ریلوے اسٹیشن سے بھی مہمانوں کو جلسہ گاہ لانے کا منظم انتظام کیا گیا تھا۔ غرضیکہ اپنی جگہ پر اور اتنی کھلی جگہ پر جلسہ کا اپنا ہی لطف تھا جس سے تمام شاملین جلسہ اپنے اپنے انداز اور ظرف کے مطابق محظوظ ہوتے اور جلسہ کی برکات سمیٹتے رہے، اَلْحَمْدُ لِلّٰہِ۔ اسی سال حضرت خلیفۃ المسیح الرابع رحمہ اللہ تعالیٰ نے جرمن نژاد محترم عبداللہ واگس ہاؤزر کو جماعت جرمنی کا نیشنل امیر مقرر فرمایا تھا اور یہ جلسہ انہی کی نگرانی میں انعقاد پذیر ہوا تھا۔

یہ جلسہ 22 اور 23 جون 1985ء کو منعقد ہوا۔ اس کی حاضری اللہ کے فضل سے بارہ سو سے تجاوز کرگئی جس میں آٹھ ممالک کی نمائندگی تھی جبکہ جرمن نژاد احمدی احباب کی تعداد 25 تھی۔ مکرم سید کمال یوسف صاحب اور مکرم مصطفیٰ ثابت صاحب بطور مہمان خصوصی اس جلسہ میں شریک ہوئے۔ اس جلسہ میں پہلی دفعہ اردو اور انگریزی تقاریر کا ترجمہ جرمن اور عربی زبان میں بھی کیا گیا۔

(از ریکارڈ وکالت تبشیر ربوہ، فائل جرمنی جنرل 1986ء صفحہ107)

اس کے بعد 1994ء تک تسلسل سے تمام جلسے ناصر باغ میں ہی منعقد ہوتے رہے اور ہر سال گزشتہ سال کے تجربات کی روشنی میں انتظامات میں وسعت اور بہتری لانے کی کوشش کی جاتی رہی۔ ان میں سے 1986ء کے جلسہ میں پہلی دفعہ دونوں دن خواتین کا جلسہ بھی منعقد ہوا۔

(غیر مطبوعہ ریکارڈ دفترتاریخ احمدیت جرمنی، فائل جلسہ سالانہ)

حضرت خلیفۃ المسیح کی جلسہ سالانہ جرمنی میں پہلی مرتبہ تشریف آوری

اب تک ہونے والے سالانہ جلسوں کے لئے خلفائے وقت کے محبت بھرے پیغامات تو موصول ہوتے رہے تھے لیکن خلیفہ وقت کا بنفس نفیس کسی جلسہ میں ورود نہ ہوا تھا۔ جماعت جرمنی کو یہ سعادت اور برکت پہلی مرتبہ 1987ء میں اُس وقت ملی جب حضرت خلیفۃ المسیح الرابع رحمہ اللہ تعالیٰ نے اپنےدورۂ ہالینڈ کے دوران اچانک پروگرام بنا کر اس جلسہ کو چند گھنٹوں کے لئے رونق بخشی۔

حضورانور نےجلسہ کے پہلے روز ناصر باغ کے میدان میں بنائے گئے جلسہ گاہ میں خطبہ جمعہ ارشاد فرمایا اور نمازیں پڑھائیں۔ حضورؒ کی آمد پر نعرے لگائے تو حضورانورؒ نے خطبہ جمعہ اِرشاد فرمانے سے قبل فرمایا کہ خطبہ جمعہ کے لئے جب امام آتا ہے تو اس وقت نعرے لگائے جاتے ہیں اور نہ ہی خطبہ جمعہ کے دوران۔ حضورؒ نے خطبہ جمعہ میں جماعت احمدیہ جرمنی کو پہلی صدی کے ختم ہونےتک ایک ہزار جرمن خدا کے حضور پیش کرنے کا ٹارگٹ دیا۔ نماز جمعہ کے فوراً بعد جلسہ کی افتتاحی اجلاس کی کارروائی حضور ؒ کی ہی صدارت میں شروع ہوئی۔ تلاوت اور نظم کے بعد فضانعروں سے گونج اُٹھی تو حضورؒ نے فرمایا کہ نعرے ’’کسی ترتیب سے لگائیں‘‘ پھر حضورانورؒ نے خود نعرے لگوائے اور اسیران راہِ مولیٰ کا نعرہ لگاتے ہوئے حضورؒ کی آواز بھّرا گئی۔ نعروں کے بعد حضورؒ نے فرمایا کہ آئیں اب دعا کرلیں۔ دعا کے بعد حضورؒ نے جلسہ کی کارروائی کوجاری رکھنے کا ارشادفرمایا اور خود اَلسَّلَامُ عَلَیْکُمْ کہہ کر تشریف لےگئے۔ اس جلسہ کے موقع پر پہلے روز حضور کے ساتھ جرمن تبلیغی نشست شام پانچ بجے ہوئی جس کے بعد بیعت کی تقریب بھی ہوئی جس میں پانچ جرمن اور عرب احباب نے حضورؒ کے دستِ مبارک پر بیعت کرنے کی سعادت حاصل کی۔ اس جلسہ کی ایک خصوصیت یہ بھی تھی کہ یہ جلسہ پہلی مرتبہ تین دن جاری رہا۔

(اخبار احمدیہ جرمنی مئی و جون 1987ء صفحہ10-9)

جماعت احمدیہ جرمنی کو یہ غیر معمولی اعزاز اور خوش نصیبی حاصل ہے کہ7 198ء سے لے کراب تک کےتمام جلسہ ہائےسالانہ میں (1999ء، 2002ء اور 2006ء کے علاوہ) حضرت خلیفۃ المسیح بنفس نفیس رونق افرروز ہوتے رہےہیں۔ اَلْحَمْدُ لِلّٰہِ۔

ناصر باغ میں ہونے والے جماعت جرمنی کے تیرہویں جلسہ سالانہ 1988ء کو حضرت امیر المؤمنین خلیفۃ المسیح الرابع رحمہ اللہ نے اپنے بابرکت وجود سے فیضیاب کیا اور ولولہ انگیز افتتاحی و اختتامی خطابات کے علاوہ ایک روح پرور مجلس عرفان میں احباب جماعت کے سوالات کے جوابات بھی عطا فرمائے۔ سوئٹزرلینڈ سے مکرم مسعود احمد جہلمی صاحب نے بطور مہمان مقرر شرکت فرمائی اور اس جلسہ کی حاضری پانچ ہزار سے زائد رہی۔

صد سالہ جشن تشکر کے سال کا عظیم الشان جلسہ سالانہ

جماعت احمدیہ کے قیام پر سو سال پورے ہونے پر سارے عالم احمدیت میں 1989ء کےسال جشن تشکر منایا گیا۔ اس سال12 تا 14 مئی کو جرمنی میں ہونے والا جلسہ سالانہ کئی اعتبار سےایک خاص شان کا حامل تھا۔ حضرت امیر المؤمنین خلیفۃ المسیح الرابع رحمہ اللہ نے حاضرین جلسہ کو تین بصیرت افروز خطابات سے نوازا۔ تیسرا خطاب حضور نے خواتین کے پنڈال میں تشریف لے جا کر فرمایا اور جلسہ جرمنی میں ایسا پہلی مرتبہ ہوا۔ جرمن مہمانوں کے ساتھ مجلس سوال و جواب بھی منعقد ہوئی جس میں 350 مہمان شامل ہوئے۔ مجموعی حاضری 7000 سے زائد رہی جس میں 15 ممالک کے 165 نمائندگان بھی شامل تھے۔ علاوہ ازیں مقامی شہر کی انتظامیہ کے دو ارکان اور مغربی جرمنی میں کینیا کے سفیر نے بھی شرکت کی۔ اس سال تمام تقاریر کا جرمن اور انگریزی زبانوں میں رواں ترجمہ پیش کیا گیا۔

اس جلسہ میں ایک خصوصی سیشن سیرت النبی ﷺ کے عنوان سے بھی ہوا جس میں لندن سے تشریف لائے ہوئے مہمانوں مکرم مولانا عطاء المجیب راشدصاحب ، مکرم بشیر احمد خان رفیق صاحب ، مولانا مبارک احمد ساقی صاحب اور اور سپین سے تشریف لائے ہوئےمکرم مولانا کرم الٰہی ظفر صاحب نے خطاب کیا۔

اس جلسہ کے اختتامی اجلاس میں جشن تشکر کے موقع پر تیار کی گئی ایک خصوصی یادگار پلیٹ امیر صاحب جرمنی نے حضور رحمہ اللہ کی خدمت میں پیش کی، اسی طرح مکرم عبدالسمیع عارف صاحب نے منارۃ المسیح کا ایک خوبصورت ماڈل حضور کی خدمت میں پیش کرنے کی سعادت پائی۔ موصوف نے جلسہ کے سٹیج کے لئے بھی لکڑی سے منارۃ المسیح تیار کیا تھا جس میں مقررین نے کھڑے ہو کر تقاریر کی تھیں۔ اسی جلسہ کے موقع پر حضرت خلیفۃ المسیح الرابع رحمہ اللہ نے جماعت جرمنی سے اپنے غیر معمولی پیار کا اظہار فرماتے ہوئے سومساجد سکیم عطا فرمائی تھی۔

(اخبار احمدیہ جرمنی جولائی 1989ء صفحہ23 تا 26)

1990ء کے جلسہ سالانہ میں تاریخ میں ایک نیا سنگ میل آیا جب جلسہ کی حاضری دس ہزار تک پہنچ گئی تھی۔ یہ جلسہ یکم تا 3 جون 1990ء کو ناصر باغ گروس گیراؤ میں منعقد ہوا۔ اب ناصر باغ کے اندر کار پارکنگ کی گنجائش نہ رہی تھی چنانچہ اس کے لئے اس کے جنوبی طرف واقع ایک بہت بڑے زرعی کھیت کو کرائے پر حاصل کیا گیا۔ جلسہ کی حاضری ہر سال تیزی سے بڑھتی چلی جا رہی تھی حتی کہ 26تا28 اگست 1994ء کو ناصرباغ میں منعقد ہونے والے جلسہ کی حاضری 23ہزار تک پہنچ گئی اور اس کے لئے ناصر باغ جیسی وسیع وعریض کھلی زمین بھی ناکافی ہوگئی۔ اور 3500 گاڑیوں کی پارکنگ کے لئے ہمسایہ کا کھیت بھی ناکافی ہوگیا۔

(الفضل انٹرنیشنل 9 ستمبر 1994ء صفحہ اول)

گاڑیوں کی کثرت کے پیش نظر اس جگہ ٹریفک کے مسائل بھی پیدا ہوگئے جس کی وجہ سے 1994ء کے بعد مقامی شہری انتظامیہ نے ناصر باغ میں جلسہ منعقد نہ کرنے کا مشورہ دیا۔

ناصر باغ سے مئی مارکیٹ تک

ناصر باغ بھی دیکھتے دیکھتے چھوٹا پڑ گیا گویا وَسِّعْ مَکَانَکَ کا الہامی حکم ایک مرتبہ پھر پورا کرنے کا وقت آگیا۔ چنانچہ فرینکفرٹ کے نواح میں کسی بڑی جگہ کی تلاش میں جلسہ کی انتظامیہ فرینکفرٹ سے 90کلومیٹر دور ایک معروف شہر من ہائم کی مائی مارکیٹ Maimarkt پہنچی تو اس کے وسیع وعریض احاطہ میں ہال اور دیگر سہولتوں کے پیش نظر اسی جگہ کو جلسہ گاہ بنانے کا فیصلہ کرنے پر مجبور ہوگئی۔ چنانچہ 8تا 10 ستمبر 1995ء کو اسی جگہ جماعت احمدیہ جرمنی کا 20 واں جلسہ سالانہ منعقد ہوا۔

مردانہ جلسہ گاہ مئی مارکیٹ کے مسقف حصہ میں بنایا گیا جس کی وسعت کے پیش نظر فکر تھا کہ کیسے بھرے گا مگر اللہ تعالیٰ نے ایسا فضل فرمایا کہ پہلے روز ہی آخر تک بھر گیا۔ جلسہ کی مجموعی حاضری 17 ہزار سے زیادہ رہی جس میں 30 ممالک کے افراد شامل تھے۔ لجنہ اماء اللہ کے لیے مارکی لگا کر جلسہ گاہ بنائی گئی تھی۔ اس کے علاوہ کھانے کے لئے بھی مارکیاں لگا کر وسیع پیمانہ پر انتظام کیا گیا تھا۔ ایک حصہ پرائیویٹ خیمہ جات کے لئے مخصوص کیا گیا تھا۔ گاڑیوں کے لئے بہت بڑی پارکنگ اس احاطہ سےباہر تھی۔ یہاں رجسٹریشن اور داخلہ کے لئے باقاعدہ انتظام کی وجہ سے حفاطتی انتظامات میں بہت سہولت ہوگئی۔ اسی طرح احاطہ کے اندر پختہ سڑکوں اور بیوت الخلاء کی سہولت بھی موجود تھی۔ ایک بہت بڑی سہولت یہ بھی تھی کہ حضرت امیر المومینن کی رہائش کے لئے بھی یہاں جگہ میسر آگئی تھی جس کے نتیجہ میں حضور انور جلسہ گاہ میں رہائش رکھتے اورجہاں فرینکفرٹ سے جلسہ گاہ تک کے روزانہ کا سفر بچتا وہاں حضور اقدس کی جلسہ گاہ میں ہمہ وقت موجودگی سے احباب جماعت برکات جلسہ سے کئی گنا مستفیض ہوتے، تمام نمازیں حضور کی اقتداء میں ہوتیں، بہت سی ملاقاتیں جلسہ کے دوران ہو جاتیں اور کئی دیگر پروگراموں میں بھی حضور اقدس کے لئے بآسانی تشریف لانا ممکن ہو جاتا۔ غرضیکہ بہت سے پہلوؤں کے اعتبار سے یہ جگہ ہمارے جلسہ کے لئے بے حد موزوں ثابت ہوئی اور یہاں اللہ تعالیٰ کے فضل سے 16 سال (2010ء) تک بڑی سہولت اور کامیابی کے ساتھ جلسے منعقد ہوتے رہے۔

من ہائیم میں ہونے والے جلسوں کا مختصر تذکرہ

جلسہ سالانہ 15تا 17 اگست 1997ء کی خاص بات حضرت خلیفۃالمسیح الرابعؒ کی بابرکت شمولیت کے علاوہ خاندان حضرت مسیح موعودعلیہ السلام کی بعض بزرگ ہستیوں کی جرمنی کے جلسہ میں شمولیت بھی تھی۔ ان بزرگان میں مکرم صاحبزادہ مرزا منصور احمد ناظر اعلیٰ ربوہ، مکرم صاحبزدہ مرزا مسرور احمد سَلَّمَہٗ رَبَّہٗ (خلیفۃ المسیح الخامس ایدہ اللہ تعالیٰ)، مکرم سید میر محمود احمدناصر، مکرم مرزاعمر احمد مع بیگم صاحبہ شامل تھے۔ مجموعی حاضری 21 ہزار تھی جس میں 30 سے زائد ممالک سے تشریف لانے والے مہمان شامل تھے۔اس جلسہ سے حضور انور رحمہ اللہ نے خطاب فرماتے ہوئے جماعت جرمنی کو سو مساجد منصوبہ کی یاددہانی کرائی اور اس کے لئے اپنی طرف سے نیزمرحومہ اہلیہ اور بچیوں کی طرف سے مجموعی طور پر ڈیڑھ لاکھ مارک کے وعدہ کا اعلان فرمایا۔

(الفضل انٹرنیشنل لندن 12ستمبر 1997ء صفحہ16)

اگلے سال ہونے والے 23 ویں جلسہ سالانہ 1998ء کے انتظامات کے لئے 62 شعبہ جات قائم کئے گئے تھے جن میں 4 ہزار کارکنان نے رضاکارانہ خدمات انجام دیں۔ حاضری 23 ہزار سے زائد تھی۔

جلسہ سالانہ 1999ء کے لئے حضرت خلیفۃ المسیح الرابع رحمہ اللہ تعالیٰ تشریف نہ لا سکے۔ اس سال امیر و مبلغ انچارج غانا مکرم عبدالوہاب آدم مہمان خصوصی تھے۔ آپ نے ہی لوائے احمدیت لہرایا اور اپنے مخصوص لہجہ کے ساتھ اردو زبان میں خطاب کیا جو سامعین کے لئے خاص دلچسپی کا باعث بنا۔

سال 2000ء میں جلسہ سالانہ جرمنی کی سلور جوبلی کا سال تھا۔ اس جلسہ میں جرمنی سمیت 40 مختلف ممالک سے تشریف لائے ہوئے 33ہزار مہمانوں نے شرکت کی۔ مہمان مقررین میں پاکستان سے محترم مولانا محمد اعظم اکسیر جبکہ لندن سے مولانا نصیر احمد قمر شامل تھے۔ اس موقع پر دس زبانوں میں رواں ترجمہ کا انتظام بھی کیا گیا۔

مرکزی جلسہ سالانہ 2001ء کا جرمنی میں انعقاد

2001ء میں برطانیہ کےبہت سے علاقے Foot & Mouth نامی بیماری کی زد میں تھے جس کی وجہ سے برطانیہ میں جلسہ سالانہ ملتوی کرنا پڑا۔ چنانچہ جماعت جرمنی کی درخواست پر حضرت خلیفۃ المسیح الرابع رحمہ اللہ نے مرکزی جلسہ سالانہ کی میزبانی کا شرف جماعت جرمنی کو عطا فرما دیا اور اس طرح سے اس سال جرمنی میں ہونے والا 21 واں جلسہ سالانہ انٹرنیشنل مرکزی جلسہ قرار پایا۔ ایک رپورٹ کے مطابق 60سے زائد ممالک کے 48,600 افراد کی اس جلسہ میں شمولیت ہوئی۔ انٹرنیشنل جلسہ ہونے کی وجہ سے اس سال عالمی بیعت بھی جرمنی کے جلسہ میں ہی ہوئی۔ جس میں 300 سے زائد اقوام کے 8 کروڑ 10 لاکھ 6ہزار سات سو اکیس افراد کی بیعت ہوئی۔ ایم ٹی اے کے ذریعہ اس جلسہ کی تمام کارروائی براہِ راست تمام دنیا میں نشر کی گئی۔ اس جلسہ کے موقع پر جرمنی کے صدر عزت مآب یوہانس راؤ اور بہت سے حکومتی و غیر حکومتی عمائدین کے خیر سگالی کے پیغامات بھی موصول ہوئے جو اس جلسہ میں پڑھ کر سنائے گئے۔

(الفضل انٹرنیشنل جلد8 شمارہ36 ،07؍ستمبر 2001ء صفحہ اول)

اس مرکزی جلسہ کے موقع پر حضرت خلیفۃ المسیح الرابع رحمہ اللہ آخری مرتبہ جرمنی تشریف لائے تھے اور حضور رحمہ اللہ نے خطبہ جمعہ سے افتتاح فرمایا اور مرکزی جلسہ کی طرز پر دوسرے اور تیسرے روز خطابات فرمائے۔ اس سال قادیان سے مکرم صاحبزادہ مرزا وسیم احمد، ربوہ سے مکرم نواب منصور احمد خان اور لندن سے مکرم مولانا منیر الدین شمس اور مولانا نصیر احمد قمر نے بطور مہمان مقرر شرکت فرمائی۔

(احمدیہ جرمنی ستمبر 2001ء صفحہ اول و دوم)

حضرت خلیفۃ المسیح الرابع رحمہ اللہ جلسہ سالانہ 2002ء کے لیے اپنی شدید علالت کے باعث تشریف نہ لا سکے تھے جس کی وجہ سے جلسہ کا ماحول اداس رہا تاہم خلافت احمدیہ کے 23 ہزار پروانوں نے حضور اقدس کی صحت و درازیٔ عمر کے لئے پرسوز دعاؤں سے فضا کو معمور رکھا۔ اس سال قادیان سے مکرم مولانا حکیم محمد دین، ربوہ سے مکرم مولانا دوست محمد شاہد اور مکرم صاحبزادہ مرزا غلام احمد اور لندن سے مکرم عطاء المجیب راشد نے شرکت فرمائی اور حاضرین سے خطاب کیا۔

خلافت خامسہ کے دور کا پہلا جلسہ سالانہ جرمنی

22تا 24 اگست 2003ء کو منعقد ہونے والا جماعت احمدیہ کا 28واں جلسہ خلافت خامسہ کے دور کا پہلا جلسہ تھا جس میں حضرت خلیفۃ المسیح الخامس ایدہ اللہ تعالیٰ نے ویزہ کی مشکلات کے باوجود تشریف لاکر اپنے وجود باجود سے برکت بخشی اور 31 ہزار شاملین جلسہ کو اپنے خطابات سے نوازا۔ اِس جلسہ کے مہمان مقررین میں وکیل اعلیٰ تحریک جدید پاکستان مکرم چوہدری حمید اللہ اور وکالت تبشیر لندن میں متعین مبلغ سلسلہ مکرم اخلاق احمد انجم شامل تھے۔

2004ء کے جلسہ سالانہ جرمنی کا افتتاح بھی حضرت خلیفۃ المسیح الخامس ایدہ اللہ تعالیٰ نے خطبہ جمعہ سے فرمایا، اس سے قبل حضور نے ایک مختصر تقریب میں حسب معمول و روایت لوائے احمدیت لہرایا۔ دوسرے روز حسب معمول لجنہ اماء اللہ سے خطاب فرمایا اور تیسرے روز حضور انور کے اختتامی خطاب سے جلسہ ختم ہوا۔ اس جلسہ میں ربوہ سے ناظر اصلاح و ارشاد مکرم راجہ نصیر احمد اور کینیڈا سے مبلغ سلسلہ مکرم مبارک احمد نذیر نے بطور مہمان مقرر شرکت فرمائی۔ دوسرے روز جرمن مہمانوں کے ساتھ ایک نشست بھی ہوئی جس میں حضور انور نے بھی خطاب فرمایا۔

30ویں جلسہ سالانہ جرمنی 2005ء کا عنوان ’’وصیت‘‘ تھا کہ امسال حضرت امیر المومنین ایدہ اللہ تعالیٰ نے جلسہ برطانیہ کے موقع پر احباب جماعت کو نظام وصیت کی طرف خصوصی توجہ دلائی تھی۔ چنانچہ اس جلسہ میں پاکستان سے مکرم مجیب الرحمٰن ایڈووکیٹ نے تشریف لاکر ’’نظام وصیت کے ذریعہ نظام نو کی بنیاد‘‘ کے موضوع پر خطاب فرمایا۔ علاوہ ازیں محترم مولانا مبشر احمد کاہلوں مفتی سلسلہ بھی امسال مہمان مقرر تھے۔

(غیر مطبوعہ ریکارڈ دفتر تاریخ جرمنی، فائل جلسہ)

جلسہ سالانہ جرمنی 2006ء اپنے آقا حضرت امیر المومنین ایدہ اللہ تعالیٰ کی موجودگی سے محروم رہا۔ تاہم اس سال حضور ایدہ اللہ تعالیٰ نے احباب جماعت کے نام ایک محبت بھرا پیغام ارسال فرمایا۔ لندن سے مکرم مولانا لئیق احمد طاہر اور مکرم مولانا نصیر احمد قمر نے تشریف لاکر خطاب فرمایا۔ اس جلسہ میں 29 ممالک کے 20 ہزار احباب نے شرکت کی۔

(اخبار احمدیہ جرمنی ستمبر 2006ء صفحہ-13)

31 اگست و یکم اور 2 ستمبر 2007ء کو جماعت احمدیہ جرمنی کا 32 واں جلسہ سالانہ منعقد ہوا۔ اس جلسہ میں حضرت امیر المومنین ایدہ اللہ تعالیٰ نے یہ خوشخبری سنائی کہ جماعت جرمنی نے اپنے پچاس فیصد چندہ دہندگان کو نظام وصیت میں شامل کرکے اپنا ٹارگٹ پورا کر دیا ہے جو حضور نے جماعت جرمنی کو دیا تھا۔ اس جلسہ کی حاضری 28 ممالک سے تشریف لائے ہوئے 26 ہزار سے زائد مہمانوں پر مشتمل تھی۔اس جلسہ کے مہمان مقرر قادیان سے تشریف لائے ہوئے مکرم مولانا محمد عمر ناظر اصلاح و ارشاد تھے۔جلسہ کے انتظامات کے لئے 5 ہزار سے زائد رضاکار دن رات مصروف عمل رہے۔

(اخبار احمدیہ جرمنی ستمبر 2007ء صفحہ اول)

ہر چند کہ گزشتہ کئی سال سے جلسہ کی تقاریر بالخصوص حضور انور کے خطابات ایم ٹی اے کے ذریعہ ساری دنیا میں رواں نشر کئے جارہے تھے تاہم اس جلسہ کے دوران مکمل کارروائی اور دیگر پروگرام بھی جلسہ گاہ میں قائم کئے گئے عارضی ٹرانسمیشن سٹیشن کے ذریعہ سے نشر کئے جانے لگے۔ اس کے بعد سے ہر جلسہ پر یہی معمول چلا آرہا ہے۔

(غیر مطبوعہ ریکارڈ دفتر تاریخ جرمنی، فائل جلسہ)

صد سالہ خلافت جو بلی

2008ء کے سال ہونے والا جلسہ سالانہ صد سالہ خلافت جوبلی سے منسوب تھا۔ چنانچہ جلسہ کی تمام تقاریر خلافت سے متعلق مختلف عناوین پر تھیں۔ اس جلسہ میں 40 ممالک سے 37 ہزار مہمانوں نے شرکت کی۔ 9 زبانوں میں تقاریر کا رواں ترجمہ پیش کیا گیا۔ حضور انور ایدہ اللہ تعالیٰ نے پہلے لوائے احمدیت لہرایا پھر خطبہ جمعہ ارشاد فرمایا۔ دوسرے روز مستورات سے اور تیسرے روز اختتامی خطاب فرمایا۔ امسال ربوہ سے ناظر اصلاح و ارشاد مکرم سید محمود احمد شاہ مہمان مقرر تھے۔ علاوہ ازیں ناظر اعلیٰ پاکستان محترم صاحبزادہ مرزا خورشید احمد اور وکیل التعلیم تحریک جدید مکرم چوہدری مبارک مصلح الدین بھی تشریف لائے تھے۔جلسہ کے انتظامات خوش اسلوبی سے انجام دینے کے لئے 5 ہزار سے زائد کارکنان نے خدمت کی توفیق پائی۔

(اخبار احمدیہ جرمنی اگست وستمبر 2008ء صفحہ1 و 4)

جماعت احمدیہ جرمنی کا 34واں جلسہ سالانہ 14 تا 16 اگست 2004 ء کو من ہائم کی مئی مارکیٹ میں منعقد ہوا جس میں 44 ممالک سے آئے ہوئے 32 ہزار سے زائد شمع خلافت کے پروانوں نے شرکت کی۔ امسال مہمان مقرر ناظر تعلیم ربوہ مکرم سید طاہر احمد شاہ تھے۔ جملہ تقاریر کے 9 زبانوں میں رواں ترجمہ کا پہلی مرتبہ جدید آلات کے ذریعہ انتظام کیا گیا تھا۔

(اخبار احمدیہ جرمنی ستمبر 2009ء صفحہ اول)

26 تا28 جون 2010ء کو ہونے والا جلسہ جرمنی سانحہ لاہور کے فوراًبعد احباب جماعت کے کسی بھی جگہ پر اتنی بڑی تعداد میں اجتماع کا پہلا موقع تھا۔ اس اعتبار سے اگر ایک طرف ہر آنکھ اشکبار تھی تو دوسری طرف حضرت امیر المومنین ایدہ اللہ کے ولولہ انگیز خطابات سے ہر احمدی کے دل میں ایک خاص جذبہ جوش مار رہا تھا۔ چنانچہ اس موقع پر حضور انور نے حضرت مصلح موعودؓ کی نظم؏ ’’دشمن کو ظلم کی برچھی سے‘‘ اور حضرت خلیفۃ المسیح الرابع رحمہ اللہ کی نظم ؏ ’’دو گھڑی صبر سے کام لو ساتھیو!‘‘ خاص طور اپنے اختتامی خطاب سے پہلے پڑھوائیں۔ ان نظموں کو سن کر حاضرین کا جوش قابل دید تھا۔ حضور انور کے خصوصی ارشاد پر محترم امیر صاحب جرمنی نےاسی سانحہ کے حوالے سے شہادت کے موضوع پر تقریر فرمائی نیز مکرم ہدایت اللہ ہیوبش مرحوم نے بھی اس موقع کے لئے اپنے جذبات کو جرمن نظم میں ڈھالا۔ اس سال جلسہ کے لئے مکرم عبدالسمیع خان ایڈیٹر روزنامہ الفضل ربوہ بطور مہمان مقرر تشریف لائے تھے۔

(اخبار احمدیہ جرمنی اگست و ستمبر 2010ء صفحہ اول و دوم)

گزشتہ 15 برس سے من ہائیم کی مئی مارکیٹ میں جلسہ سالانہ جرمنی کا انعقاد ہوتا چلا آرہا تھا، جیسا کہ مندرجہ بالا اعداد و شمار سے واضح ہے کہ حاضری میں ہر سال مسلسل اضافہ ہوتا چلا جا رہا تھا، اسی اعتبار سے انتظامات میں بھی وسعت لانی پڑتی تھی۔ جس کی وجہ سے بالآخر اتنی بڑی یہ جگہ بھی چھوٹی پڑ گئی اور وَسِّعْ مَکَانَکَ کے الہامی حکم پر عمل کرنے کا ایک دفعہ پھر وقت آگیا کیونکہ حاضری بڑھتے بڑھتے 2010ء کے جلسہ میں 25 ہزار سے زیادہ ہوگئی تھی۔

نئی اور بہت بڑی جلسہ گاہ کارلسروئے کنونشن سنٹر
(Karlsruhe Messegelände)

سیدنا حضرت خلیفۃ المسیح الخامس ایدہ اللہ تعالیٰ بنصرہ العزیز کی منظوری سے 26-24جون 2011ء کو جرمنی کا 36واں جلسہ سالانہ پہلی دفعہ جرمنی کے شہر کارلسروہے کے کنونشن سنٹر Messegelände DM Arena میں منعقدہوا۔ یہ جگہ فرینکفرٹ سے جانب جنوب 160 کلومیٹر کے فاصلہ پر ہے۔ اس کنونشن سنٹر میں ایک جیسے چار بڑے ہال ہیں اور ہر ہال 12,500 مربع میٹر رقبہ کا ہے جس میں 160,000 لوگوں کے لئے گنجائش ہے۔ علاوہ ازیں کئی ہزار مربع میٹر پر مشتمل بہت سے چھوٹے بڑے ہال، گیلریاں اور کمرے ہیں۔ یہ کمپلیکس ہر قسم کی جدید سہولتوں سے آراستہ، صاف ستھرا اور نہایت خوبصورت ہے۔ ان چار ہالوں میں سے دو ہالوں کو مردانہ و زنانہ جلسہ گاہوں کے طور پر استعمال کیا گیا جبکہ باقی دونوں ہالوں کو مردوں اور خواتین کے کھانے اور رہائش کے علاوہ جماعتی دفاتر کے لئے استعمال کیا گیا۔ اس کمپلیکس کے عین درمیان میں ایک وسیع سبزہ زار ہے جہاں پرچم کشائی کے لئے چبوترہ بنایا جاتا ہے اور ایم ٹی اے کے مختلف پروگراموں کے لئے بھی اس جگہ خوبصورت ماحول میسر آجاتا ہے۔ حضور انور ایدہ اللہ کی رہائش اور دفاتر بھی اسی کمپلیکس کے اندر ہوتے ہیں۔ چنانچہ حضور انور بڑی سہولت سے جلسہ کے دوران مختلف پروگراموں کے لئے تشریف لاتے ہیں اور اپنا فیض شاملین جلسہ میں بانٹتے ہی۔ اَلْحَمْدُ لِلّٰہِ۔

جماعت جرمنی کے اس 36 ویں جلسہ سالانہ کے لئے حضرت امیرالمومنین ایدہ اللہ تعالیٰ از راہ شفقت جرمنی تشریف لائے اور اپنے روح پرور خطابات سے نوازا، طلبہ و طالبات کے ساتھ علیحدہ علیحدہ طویل نشستوں میں بھی رونق افروز ہوئے اور نو احمدیوں کو بھی شرف ملاقات بخشا۔ اس سال حضور انور ایدہ اللہ کی خصوصی اجازت سے مکرم مرزا محمد الدین ناز نے ربوہ سے تشریف لاکر اور مکرم مولانا نسیم مہدی نے کینیڈا سے تشریف لاکر خطاب فرمایا۔ اس جلسہ کے موقع پر ایک اہم تقریر ’’خلافت سے زندہ تعلق‘‘ کے موضوع پر مکرم مولانا منیر احمد جاوید پرائیویٹ سیکرٹری کی تھی۔

اس کی کل حاضری 26,872 (چھبیس ہزار آٹھ سو بہتّر) تھی۔ جو 66 مختلف ممالک سے بسوں اور پبلک ٹرانسپورٹ کے علاوہ اپنی ذاتی گاڑیوں میں بھی تشریف لائے تھے۔ ان ذاتی گاڑیوں کی تعداد شعبہ پارکنگ کے مطابق 13,680 تھی۔ ان مہمانوں کی ضیافت کےلئے کھانے کی کل 912 دیگیں تیار کی گئیں۔

(اخبار احمدیہ جرمنی جولائی اگست 2011ء صفحہ54 تا 65)

اس وسیع جگہ پر جلسہ سالانہ گزشتہ سات سال سے بڑی کامیابی اور خوش اسلوبی کے ساتھ منعقد کیاجا رہا ہےاور حاضرین کی بڑھتی ہوئی تعداد کے پیش نظر ہر سال انتظامات میں وسعت لائی جا رہی ہے۔ چنانچہ گزشتہ سال 42 ویں جلسہ سالانہ کے لئے بہت سے اِنتظامات اس کمپلیکس کے سامنے سڑک کی دوسری جانب پارکنگ میں کرنے پڑے۔ چنانچہ لنگر خانہ اور کھانے کی مارکیاں اس میدان میں لگائی گئیں، بازار تو پہلے سےہی اسی میدان میں لگایا جاتا تھا۔ اس طرح سے 1500 کے قریب پرائیویٹ خیمہ جات کے لئے اَور بھی دور کا میدان مخصوص کرنا پڑا۔ غرضیکہ 40 ہزار سے زائد حاضری کے لئے اب یہ جگہ بھی چھوٹی ہوچکی ہے اور یہ اعداد و شمار دراصل سیدنا حضرت مسیح موعودعلیہ السلام کی پیش گوئیوں پر مہر تصدیق ثبت کرتے ہیں۔ چنانچہ اب حضور انور ایدہ اللہ تعالیٰ نے جماعت جرمنی کو حدیقۃ المہدی کی طرح کوئی کھلی جگہ تلاش کرنے کی ہدایت فرمائی ہے تاکہ اپنی ضرورت کے مطابق انتظامات میں وسعت کی جا سکے۔ اللہ کرے کہ پیارے آقا کی خواہش اور منشاء کےعین مطابق جماعت جرمنی کو جلد ایسی جگہ عطا فرمادے۔ آمین۔

(محمد الیاس منیر۔ جرمنی)