ہم جن کو ڈھونڈتے رہے قلبِ حزیں کے ساتھ
جلوہ نما ہوئے ہیں وہ طرزِ حسیں کے ساتھ
کچھ دیر تک رہا تھا جو بادل کی اوٹ میں
نکلا ہے ماہتاب پھر تابِ جبیں کے ساتھ
رعنائیاں ہیں ان کی پھر بامِ عروج پر
تکنے لگے ہیں پھر ہمیں چشمِ حسیں کے ساتھ
طاہر کے ہے وجود سے بزمِ جہاں سجی
زینت انگشتری کی ہے جیسے نگیں کے ساتھ
اُڑتی ہیں ان کی آہ سے ہر آن ظلمتیں
ہے جن کے دل کا رابطہ عرشِ بریں کے ساتھ
کر پیش ان کے سامنے نذرانہ اشک کا!
جا ان کی بارگاہ میں دُرثمیں کے ساتھ
ہتھیار پھینک دے پرے ، اللہ پہ رکھ نظر
تسخیر کر جہاں فقط کارِ جبیں کے ساتھ!
کھل جائیں تیری آنکھ پر اسرارِ آسماں
چُھو جائے گر جبیں تری خاکِ زمیں کے ساتھ
بیمار تھا مسیحا تو تڑپے تھے ہم ضرور
شافی کو دیکھتے رہے نورِ یقیں کے ساتھ
اسلامؔ غم نہ کھا اگر ، کہ کم ہو روشنی!
کچھ بدلیاں بھی ہوتی ہیں ماہِ مبیں کے ساتھ
(عبدالسلام اسلام ۔لندن)
